ປີ 2018 ຂະແໜງພາສີ ສາມາດເກັບລາຍຮັບເພີ່ມຂຶ້ນຫຼາຍກວ່າ 336 ຕື້ກີບ ທຽບໃສ່ປີ 2017 ແຕ່ຍັງບໍ່ໍບັນລຸເປົ້າໝາຍທີ່ສະພາແຫ່ງຊາດຮັບຮອງທີ່ຕົວເລກ 7.200 ຕື້ກີບ, ດ້ານທ່ານຮອງນາຍົກ ໄດ້ເນັ້ນໃຫ້ເພີ່ມທະວີວຽກງານຕ້ານ ແລະ ສະກັດກັ້ນການລັກລອບພາສີຢູ່ຊາຍແດນ.
ກອງປະຊຸມສະຫຼຸບຕີລາຄາວຽກງານຮອບດ້ານປະຈໍາປີ 2018, ກໍານົດທິດທາງແຜນການ ແລະ ມາດຕະການຈັດຕັ້ງປະຕິບັດ ປະຈໍາປີ 2019 ຂອງຂະແໜງພາສີທົ່ວປະເທດ ຈັດຂຶ້ນວັນທີ 4 ມັງກອນ 2019, ທີ່ນະຄອນຫຼວງວຽງຈັນ ໃຫ້ກຽດເຂົ້າຮ່ວມໂດຍທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ພ້ອມດ້ວຍຫົວໜ້າ-ຮອງຫົວໜ້າ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ທ່ານ ບຸນປະເສີດ ສີກຸນລະບຸດ, ຮັກສາການຫົວໜ້າກົມພາສີ ກະຊວງການເງິນ ລາຍງານກ່ຽວກັບການຈັດຕັ້ງປະຕິບັດແຜນລາຍຮັບ ແລະ ວຽກງານວິຊາສະເພາະຂອງຂະແໜງພາສີໃນປີ 2018 ຢູ່ໃນທ່າມກາງສະພາບແວດລ້ອມທີ່ມີຄວາມທ້າທາຍຫຼາຍດ້ານ ເຊັ່ນ: ຕົວເລກແຜນຈັດເກັບລາຍຮັບທີ່ສະພາແຫ່ງຊາດໄດ້ຮັບຮອງໃນຂະແໜງພາສີ 7.200 ຕື້ກີບ ແຕ່ຜ່ານການຈັດເກັບລາຍຮັບຕົວຈິງສາມາດປະຕິບັດໄດ້ 6.637 ຕື້ກີບ ເທົ່າກັບ 92,18% ຂອງແຜນປີ ຖ້າທຽບໃສ່ໄລຍະດຽວກັນເພີ່ມຂຶ້ນ 5,33% ຫຼື ເທົ່າກັບ 336 ຕື້ກີບ ໃນນັ້ນ, ລາຍຮັບຂັ້ນສູນກາງ (ກົມພາສີ) ສາມາດປະຕິບັດໄດ້ 58 ຕື້ກວ່າກີບ ເທົ່າກັບ 114,84% ຂອງແຜນປີ, ພະແນກ PCA ປະຕິບັດໄດ້ 97,69% ຂອງແຜນປີ, ກອງຄຸ້ມຄອງພາສີ I ໄດ້ 85,67%, ກອງຄຸ້ມຄອງພາສີ II ໄດ້ 109,30%, ພາສີ III ໄດ້ 106,05%, ພາສີ IV ໄດ້ 80,18%, ພາສີV ໄດ້ 90,27%, ພາສີ VI ໄດ້ 89,73 ແລະ ກອງຄຸ້ມຄອງພາສີ VII ໄດ້ 98,89% ຂອງແຜນປີ.
ໂອກາດດັ່ງກ່າວ, ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໃຫ້ກຽດໂອ້ລົມ ແລະ ໃຫ້ທິດຊີ້ນໍາກ່ຽວກັບວຽກງານດັ່ງກ່າວຄື: ໃນໄລຍະຜ່ານມາເຫັນວ່າຍັງມີບາງດ້ານຕ້ອງໄດ້ປັບປຸງ ໂດຍສະເພາະກອງກວດກາພາສີປະຈໍາແຂວງ, ພະແນກຕ້ານ ແລະ ສະກັດກັ້ນການລັກລອບສິນຄ້າໜີພາສີ, ການຊັບຊ້ອນ ແລະ ຈັດວາງພະນັກງານເຈົ້າໜ້າທີ່ພາສີ ໃຫ້ສອດຄ່ອງກັບພາລະບົດບາດ ກັບການຈັດຕັ້ງປະຕິບັດໜ້າວຽກຕົວຈິງ. ພ້ອມນັ້ນ, ຈົ່ງເພີ່ມທະວີວຽກງານຕ້ານ ແລະ ສະກັດກັ້ນການລັກລອບໜີພາສີຕາມເຂດຊາຍແດນ, ໃຫ້ຂຸ້ນຂ້ຽວປັບປຸງນິຕິກໍາເພື່ອເປັນເງື່ອນໄຂ ແລະ ທ່າແຮງບົ່ມຊ້ອນໃນການຈັດເກັບລາຍຮັບເຂົ້າງົບປະມານ, ຄຸ້ມຄອງດ້ານລາຄາການແຈ້ງພາສີ, ແກ້ໄຂລົດບໍ່ຖືກຕ້ອງ, ຄຸ້ມຄອງການນໍາເຂົ້າວັດຖຸອຸປະກອນ, ພາຫະນະກົນຈັກ ແລະ ສິນຄ້າອື່ນໆ, ສົ່ງເສີມໃຫ້ມີການຜະລິດພາຍໃນໃຫ້ຫຼາຍຂຶ້ນ, ຫຼຸດຜ່ອນພາສີຂອງບັນດາໂຄງການລົງທຶນຕ່າງໆໃຫ້ນໍາໃຊ້ຖືກຕ້ອງຕາມເປົ້າໝາຍ ເພື່ອເປັນການຮັບປະກັນໃຫເກ່ການຈັດເກັບລາຍຮັບເຂົ້າງົບປະມານແຫ່ງລັດ ຕາມແຜນທີ່ວາງໄວ້.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: ກະຊວງການເງິນ