ພິທີລົງນາມສັນຍາສຳປະທານໂຄງການເຂື່ອນໄຟຟ້ານ້ຳພູນ ແລະ ໂຄງການເຂື່ອນໄຟຟ້ານ້ຳບີ 1, 2 ແລະ 3 ໄດ້ຈັດຂຶ້ນວັນທີ 11 ທັນວາ 2018 ທີ່ກະຊວງແຜນການ ແລະ ການລົງທຶນ ລະຫວ່າງທ່ານ ຄຳລຽນ ພົນເສນາ ຮອງລັດຖະມົນຕີກະຊວງແຜນການ ແລະ ການລົງທຶນ ກັບທ່ານ ບຸນອູ້ມ ສີວັນເພັງ ປະທານສະພາບໍລິຫານບໍລິສັດ ນ້ຳພູນພາວເວີ ຈຳກັດ ແລະ ທ່ານ ຄຳລຽນ ພົນເສນາ ກັບທ່ານ ບຸນສະຫຼອງ ສຸດທິດາຣາ ປະທານສະພາບໍລິຫານບໍລິສັດ ນ້ຳບີພາວເວີ ຈຳກັດ ມີທ່ານຮອງເຈົ້າແຂວງ ຮອງລັດຖະມົນຕີ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ. ໂຄງການດັ່ງກ່າວ, ຈະເລີ່ມລົງມືກໍ່ສ້າງໃນຕົ້ນປີ 2019 ນີ້ ແລະ ຄາດໝາຍສຳເລັດໃນທ້າຍປີ 2023.
ໂຄງການເຂື່ອນໄຟຟ້ານ້ຳພູນຕັ້ງຢູ່ເມືອງປາກລາຍ ແຂວງໄຊຍະບູລີ ມີກຳລັງການຕິດຕັ້ງ 45 MW ຈະຜະລິດກະແສໄຟຟ້າໄດ້ 190 ລ້ານ KWh ສາມາດສ້າງລາຍຮັບສະເລ່ຍ 15 ລ້ານໂດລາຕໍ່ປີ ເພື່ອເປັນການປະກອບສ່ວນເຂົ້າໃນການພັດທະນາປະເທດຊາດ ໂດຍເຮັດໃຫ້ຕົວເລກ GDP ເພີ່ມຂຶ້ນ. ໃນໄລຍະສຳປະທານນັ້ນ ລັດຖະບານຈະໄດ້ຮັບຜົນປະໂຫຍດປະມານ 6,5 ລ້ານໂດລາ/ປີ . ໂຄງການດັ່ງກ່າວ, ໂດຍບໍລິສັດ ນ້ຳພູນພາວເວີ ຈຳກັດ ໄດ້ເຊັນສັນຍາ ກໍ່ສ້າງກັບບໍລິສັດ Power China Chengdu Engineering Corporation Limited ໃນວັນທີ 31 ກໍລະກົດ 2017 ດ້ວຍມູນຄ່າ 99,99 ລ້ານໂດລາສະຫະລັດ ເຊິ່ງຈະເລີ່ມລົງມືທຳການກໍ່ສ້າງໃນຕົ້ນປີ 2019 ແລະ ຄາດໝາຍສຳເລັດແມ່ນໃນທ້າຍປີ 2021 ແລະ ເລີ່ມສົ່ງຂາຍກະແສໄຟຟ້າໃນຕົ້ນປີ 2022.
ສໍາລັບໂຄງການເຂື່ອນໄຟຟ້ານ້ຳບີ1, 2 ແລະ 3 ຈະມີການກໍ່ສ້າງພ້ອມກັນທັງ 3 ເຂື່ອນ ເຊິ່ງແຕ່ລະເຂື່ອນປະກອບມີເຄື່ອງຈັກຜະລິດໄຟຟ້າເຂື່ອນລະ 2 ໜ່ວຍ ແລະ ເຂື່ອນໄຟຟ້ານ້ຳບີ 1 ມີກຳລັງຕິດຕັ້ງ 52 MW, ເຂື່ອນໄຟຟ້ານ້ຳບີ 2 ມີກຳລັງຕິດຕິດຕັ້ງ 71 MW ແລະ ເຂື່ອນໄຟຟ້ານ້ຳບີ 3 ມີກຳລັງຕິດຕັ້ງ 12 MW; ລວມທັງ 3 ເຂື່ອນມີກໍາລັງທັງໝົດ 135 MW, ສາມາດຜະລິດພະລັງງານໄຟຟ້າໄດ້ 554 ລ້ານ KMh/ປີ, ສ້າງລາຍຮັບໃຫ້ແກ່ບໍລິສັດປະມານ 35 ລ້ານໂດລາສະຫະລັດ/ປີ ແລະ ສ້າງລາຍຮັບໃຫ້ແກ່ລັດຖະບານ ສະເລ່ຍປະມານ 18 ລ້ານໂດລາ/ປີ. ຕະຫຼອດໃນໄລຍະອາຍຸການສຳປະທານ ແລະ ພາຍຫຼັງສິ້ນສຸດສຳປະທານ ທາງບໍລິສັດຈະໄດ້ມອບຊັບສິນທັງໝົດຂອງໂຄງການໃຫ້ແກ່ລັດຖະບານ ເພື່ອສືບຕໍ່ຄຸ້ມຄອງ ແລະ ທຳການຜະລິດຕໍ່ໄປໂດຍບໍ່ຄິດຄ່າໃດໆ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: ໜັງສືພິມວຽງຈັນໃໝ່