ທ່ານ ບໍ່ແສງຄຳ ວົງດາລາ, ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຄາດວ່າກາງປີ 2019 ອົງການ UNESCO ຈະຮັບຮອງເອົາໄຫຫີນຊຽງຂວາງເຂົ້າເປັນມໍລະດົກໂລກຢ່າງເປັນທາງການ ແລະ ຈະກາຍເປັນມໍລະດົກໂລກແຫ່ງທີ 3 ຂອງ ສປປ ລາວ ຖັດຈາກເມືອງຫລວງພະບາງ ແລະ ວັດພູຈຳປາສັກ.
ວັນທີ 28 ພະຈິກ 2018, ຂະບວນຄາລາວານ ຖວທ ໄດ້ເດີນທາງເຖິງແຂວງ ຊຽງຂວາງ, ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງ ຖວທ ໃຫ້ການສຳພາດວ່າ: ຫຼັງຈາກທີ່ ສປປ ລາວ ເຮົາໄດ້ຍື່ນເອກະສານຕ່າງໆ ຢ່າງຄົບຖ້ວນຕໍ່ອົງການ UNESCO ເພື່ອສະເໜີໄຫຫີນຊຽງຂວາງ ເຂົ້າເປັນມໍລະດົກໂລກໄປແລ້ວກ່ອນຫນ້ານີ້ ແລະ ຕົ້ນເດືອນ ຕຸລາ 2018 ອົງການດັ່ງກ່າວ, ໄດ້ສົ່ງຄະນະວິຊາການກ່ຽວຂ້ອງມາກວດກາຕົວຈິງຢູ່ ແຂວງຊຽງຂວາງ ເປັນທີ່ຮຽບຮ້ອຍແລ້ວ. ໃນຂະນະດຽວກັນ, ຖວທ ໄດ້ສົ່ງຄະນະວິຊາການທີ່ກ່ຽວຂ້ອງໄປປ້ອງກັນບົດກ່ຽວກັບການຂໍສະເໜີໄຫຫີນຊຽງຂວາງ ເຂົ້າເປັນມໍລະດົກໂລກທີ່ນະຄອນຫຼວງປາຣີ, ປະເທດຝຣັ່ງ ຮຽບຮ້ອຍແລ້ວ, ຄາດວ່າໃນກາງປີ 2019 ອົງການ UNESCO ຈະຮັບຮອງເອົາໄຫຫີນຊຽງຂວາງ ເຂົ້າເປັນມໍລະດົກໂລກຢ່າງເປັນທາງການ ເຊິ່ງຈະກາຍເປັນມໍລະດົກໂລກແຫ່ງທີ 3 ຂອງລາວ ຖັດຈາກເມືອງຫລວງພະບາງ ແລະ ວັດພູຈຳປາສັກ.
ສຳລັບໄຫຫີນຊຽງຂວາງທີ່ສະເຫນີເຂົ້າເປັນມໍລະດົກໂລກມີທັງໝົດ 999 ຫນ່ວຍໃນ 11 ແຫ່ງ ໂດຍກວມເອົາ 4 ເມືອງຄື: ເມືອງ ແປກ, ພູກູດ, ຜາໄຊ ແລະ ເມືອງຄໍາ. ນອກຈາກນັ້ນ, ຖວທ ໄດ້ມອບເງິນອຸປະຖຳມູນຄ່າ 16 ລ້ານກີບໃຫ້ແກ່ແຂວງ ຊຽງຂວາງ ເພື່ອນຳໃຊ້ເຂົ້າໃນການບູລະນະທົ່ງໄຫຫີນ 1 ມູນຄ່າ 10 ລ້ານກີບ; ວັດເພຍວັດ ແລະ ວັດພະເຈົ້າອົງຫລວງ (ວັດລະ 3 ລ້ານກີບ).
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: Lao National Radio