ສປປ ລາວ ຈະໄດ້ເປັນເຈົ້າພາບຈັດກອງປະຊຸມເຈົ້າໜ້າທີ່ອາວຸໂສ ເວທີປຶກສາຫາລືຂອບການຮ່ວມມືອາຊີຕາເວັນອອກ ແລະ ອາເມລິກາລາຕິນ ຫຼື ຟີແລັກ ຄັ້ງທີ 19 (The 19th FEALAC Senior Official’s Meeting) ແລະ ກອງປະຊຸມກ່ຽວຂ້ອງອື່ນໆ ເຊິ່ງຈະມີຜູ້ແທນຫຼາຍປະເທດ ໃນລະຫວ່າງວັນທີ 19-22 ພະຈິກ 2018 ທີ່ຈະມາເຖິງນີ້ ເພື່ອທົບທວນຄືນຄວາມຄືບໜ້າໃນການຈັດຕັ້ງປະຕິບັດແຜນງານໃໝ່ຂອງຟີແລັກ ແລະ ບັນຫາອື່ນໆ ທີ່ຈະນຳສະໜີຕໍ່ກອງປະຊຸມລັດຖະມົນຕີຕ່າງປະເທດຟີແລັກ ຄັ້ງທີ 9 ທີ່ພາກພື້ນອາເມລິກາລາຕິນ ໃນປີ 2019 .

ໃນກອງປະຊຸມດັ່ງກ່າວ, ລວມທັງກອງປະຊຸມ 4 ໜ່ວຍງານທີ່ກ່ຽວຂ້ອງຄື: ໜ່ວຍງານການຮ່ວມມືທາງດ້ານສັງຄົມ-ການເມືອງ ແລະ ການພັດທະນາແບບຍືນຍົງ; ໜ່ວຍງານດ້ານວັດທະນະທໍາ, ຊາວໜຸ່ມ, ເພດຍິງ-ຊາຍ ແລະ ກິລາ; ໜ່ວຍງານດ້ານການຄ້າ, ການລົງທຶນ, ການທ່ອງທ່ຽວ ແລະ ວິສາຫະກິດຈຸນລະພາກ, ຂະໜາດນ້ອຍ ແລະ ຂະໜາດກາງ; ແລະ ໜ່ວຍງານດ້ານວິທະຍາສາດ, ເຕັກໂນໂລຊີ, ນະວັດຕະກໍາ ແລະ ການສຶກສາ ເຊິ່ງຈະມີຄະນະຜູ້ແທນເຂົ້າຮ່ວມທັງໝົດປະມານ 200 ກ່ວາຄົນ ຈາກປະເທດສະມາຊິກ ລວມທັງຜູ້ຕາງໜ້າຈາກ ກອງເລຂາອິນເຕີເນັດຟີແລັກ ແລະ 2 ຄະນະກຳມາທິການ ຂອງອົງການສະຫະປະຊາຊາດ (UNs) ຄື: ຄະນະກຳມາທິການເສດຖະກິດ ແລະ ສັງຄົມ ແຫ່ງ ອາຊີ-ປາຊີຟິກ (ESCAP) ແລະ ຄະນະກໍາມາທິການເສດຖະກິດ ແຫ່ງ ລາຕິນອາເມລິກາ ແລະ ກາຣີບຽນ (ECLAC).

ການເປັນເຈົ້າພາບກອງປະຊຸມຄັ້ງນີ້, ສປປ ລາວ ເປັນປະທານຮ່ວມຝ່າຍອາຊີ ແລະ ປະເທດ ກົວເຕມາລາ ເປັນປະທານຮ່ວມຝ່າຍ ອາເມລິກາລາຕິນ ໂດຍຈະໄດ້ທົບທວນຄືນຄວາມຄືບໜ້າໃນການຈັດຕັ້ງປະຕິບັດແຜນງານໃໝ່ຂອງຟີແລັກ (The New FEALAC Action Plan) ທີ່ໄດ້ຮັບຮອງເອົາໃນກອງປະຊຸມລັດຖະມົນຕີຕ່າງປະເທດຟີແລັກ ຄັ້ງທີ 8 ທີ່ ປູຊານ ສ.ເກົາຫລີ ໃນເດືອນ ສິງຫາ 2017 ລວມທັງການນຳໃຊ້ກອງທຶນຟີແລັກ, ການຄັດເລືອກປະເທດປະສານງານພາກພື້ນຟີແລັກ, ການກຳນົດແຜນກິດຈະກຳຕ່າງໆ ໃນຕໍ່ໜ້າ ຂອງຟີແລັກ ແລະ ບັນຫາອື່ນໆ ເພື່ອນຳສະໜີຕໍ່ກອງປະຊຸມລັດຖະມົນຕີຕ່າງປະເທດຟີແລັກ ຄັ້ງທີ 9 ທີ່ຈະຈັດຂຶ້ນຢູ່ພາກພື້ນອາເມລິກາລາຕິນ ໃນປີ 2019.

ການຮ່ວມມື FEALAC ໄດ້ຖືກສ້າງຕັ້ງຂຶ້ນໃນປີ 1999, ປະຈຸບັນມີສະມາຊິກທັງໝົດ 36 ປະເທດ, ໃນນັ້ນຝ່າຍອາຊີຕາເວັນອອກ ມີ 16 ປະເທດ ແລະ ອາເມລິກາລາຕີນ ມີ 20 ປະເທດ ເຊິ່ງ ສປປ ລາວ ກໍເປັນໜື່ງໃນບັນດາປະເທດຮ່ວມສ້າງຕັ້ງຂອບການຮ່ວມມືດັ່ງກ່າວ.