ໂຮງໝໍມະໂຫສົດ ຈະເປີດໃຫ້ບໍລິການກວດພະຍາດເຂດນອກຕະຫຼອດ 24 ຊົ່ວໂມງ ໃນເດືອນ ມັງກອນ 2019 ພ້ອມທັງມີການປັບປຸງຂອດການບໍລິການດ້ວຍການຫຼຸດຂັ້ນຕອນການກວດພະຍາດໃຫ້ສັ້ນລົງ ໂດຍສະເພາະການບໍລິການຫຼາຍທາງເລືອກ ໃຫ້ແກ່ຄົນເຈັບເລືອກກວດສຸຂະພາບໄດ້ກັບທຸກທ່ານໝໍທີ່ຕ້ອງການ ຖ້າໃນກໍລະນີຕ້ອງການກວດເລືອດ ກໍສາມາດເຈາະເລືອດກວດຢູ່ກັບທີ່ເລີຍ. ປັດຈຸບັນ, ໄດ້ກະກຽມສຳເລັດແລ້ວ 70% ແລະ ຈະເປີດທົດລອງໃນເດືອນ ທັນວາ 2018 ນີ້.
ທ່ານ ພິສິດ ພຸດສະຫວັດ, ຜູ້ອຳນວຍການໃຫຍ່ໂຮງໝໍມະໂຫສົດໃຫ້ການສຳພາດໃນວັນທີ 12 ພະຈິກ 2018 ວ່າ: ເພື່ອອຳນວຍຄວາມສະດວກໃຫ້ແກ່ປະຊາຊົນໄດ້ເຂົ້າເຖິງການກວດ ແລະ ປິ່ນປົວສຸຂະພາບໄດ້ຢ່າງທົ່ວເຖິງ ແລະ ວ່ອງໄວທັນໃຈ ຈຶ່ງໄດ້ຫັນປ່ຽນຈາກການກວດເຂດພາຍນອກທີ່ເປີດສະເພາະແຕ່ໂມງລັດຖະການ ມາເປັນການບໍລິການກວດສຸຂະພາບຕະຫຼອດ 24 ຊົ່ວໂມງ ໃນທຸກໆວັນ. ປັດຈຸບັນ, ກະກຽມສຳເລັດແລ້ວ 70% ຄາດວ່າເດືອນ ທັນວາ 2018 ຈະສາມາດເປີດທົດລອງ ແລະ ເດືອນ ມັງກອນ 2019 ຈະເປີດໃຫ້ບໍລິການຢ່າງເຕັມຮູບແບບ ພ້ອມທັງເປີດບໍລິການທາງເລືອກໃຫ້ຄົນເຈັບ ສາມາດເລືອກກວດສຸຂະພາບໄດ້ກັບທຸກທ່ານໝໍ ທີ່ຄົນເຈັບຕ້ອງການຕື່ມອີກ.
ນອກຈາກນັ້ນ, ໄດ້ຂະຫຍາຍຫ້ອງກວດພະຍາດທັງໝົດ 21 ຫ້ອງ ທັງປັບປຸງໃຫ້ມີຄວາມວ່ອງໄວ ໂດຍໄດ້ຫຼຸດຜ່ອນຂັ້ນຕອນການກວດພະຍາດສັ້ນລົງເປັນຕົ້ນ: ແຕ່ລະຫ້ອງກວດຈະມີແພດຊ່ຽວຊານກັບພະຍາບານປະຈຳຢູ່ ຖ້າໃນກໍລະນີຕ້ອງການກວດເລືອດກໍສາມາດເຈາະເລືອດກວດໄດ້ກັບທີ່. ເວົ້າລວມໃນການປັບຂອດການບໍລິການຄັ້ງນີ້ ເພື່ອແນ່ໃສ່ໃຫ້ປະຊາຊົນໄດ້ເຂົ້າເຖິງການບໍລິການທີ່ມີຄຸນນະພາບ, ວ່ອງໄວປະທັບໃຈ ແລະ ອີງໃສ່ນະໂຍບາຍ 5 ດີ 1 ພໍໃຈທີ່ກະຊວງສາທາລະນະສຸກວາງອອກ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: ໜັງສືພິມວຽງຈັນໃໝ່