ເຈົ້າຄອງນະຄອນຫຼວງ ແລະ ຫົວໜ້າພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ເນັ້ນໃຫ້ປະຊາຊົນລາວບັນດາເຜົ່າ ຜູ້ທີ່ມີຈຸດປະສົງຈະເຮັດຜາສາດເຜິ້ງຂາຍ ຫຼື ແຫ່ຖວາຍພະທາດຫຼວງ ໃຫ້ໃຊ້ວັດຖຸດິບໃນການເຮັດຜາສາດເຜີ້ງຈາກທຳມະຊາດພຽງຢ່າງດຽວ.
ໃນໂອກາດບຸນນະມັດສະການພະທາດຫຼວງວຽງຈັນ ທີ່ຈະຈັດຂຶ້ນໃນວັນທີ 16-22 ພະຈິກ 2018, ທ່ານເຈົ້າຄອງນະຄອນຫຼວງ ແລະ ຫົວໜ້າພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ໄດ້ເນັ້ນໃຫ້ປະຊາຊົນລາວບັນດາເຜົ່າ ກໍຄືຊາວນະຄອນຫຼວງວຽງຈັນ ຕະຫຼອດເຖິງອົງການຈັດຕັ້ງພັກ-ລັດ, ບໍລິສັດ-ຫ້າງຮ້ານ, ຊາວຄ້າຂາຍ ແລະ ຊາວສາສະນິກະຊົນທັງຫຼາຍ ຜູ້ທີ່ຈະເຮັດຜາສາດເຜິ້ງ ເພື່ອຖວາຍພະທາດຫຼວງ ໃຫ້ພ້ອມກັນເຮັດຜາສາເຜິ້ງດ້ວຍການນຳເອົາວັດຖຸດິບຈາກທໍາມະຊາດ ມາຜະລິດເປັນຕົ້ນເຜິ້ງ ເຊັ່ນ: ໃຊ້ຕົ້ນກ້ວຍ, ໄມ້ ແລະ ອື່ນໆ ໂດຍປະສະຈາກການໃຊ້ໂຟມ ຫຼື ປລາສຕິກ, ເຫຼັກຕະປູ, ເຂັມມຸດ ແລະ ອື່ນໆ ທີ່ມີຜົນກະທົບຕໍ່ສິ່ງແວດລ້ອມ.
ສະນັ້ນ, ການເຮັດຜາສາດເຜິ້ງໃນບຸນທາດຫຼວງປີນີ້ ຕ້ອງເອົາໄມ້ສຽບດອກເຜິ້ງ ແທນເຂັມມຸດ, ເອົາກາບກ້ວຍ, ໃບຕອງມາເຮັດຮ່າງຜາສາດເຜິ້ງ ແທນໂຟມ ຫຼື ປລາສຕິກ, ໃຊ້ໄມ້ຕອກມັດໄມ້ປ່ອງເປັນເຄື່ອງຫາມຜາສາດເຜິ້ງ ແທນລວດເຫຼັກ, ໃຊ້ຂີ້ເຜິ້ງແທ້ເຮັດດອກເຜິ້ງ ແທນດອກເຜິ້ງຢາງ ແລະ ອື່ນໆ ເພື່ອເຮັດໃຫ້ມີການຍ່ອຍສະຫຼາຍໄດ້ງ່າຍ ແລະ ເນົ່າເປື່ອຍໄປຕາມທຳມະຊາດ ທັງເປັນການຫຼຸດຜ່ອນການນຳໃຊ້ປລາສຕິກ, ຕົ້ນທຶນ ແລະ ຍັງສ້າງຄວາມສວຍງາມແບບທຳມະຊາດຂອງລາວເຮົາອີກດ້ວຍ.
ຮຽບຮຽງໂດຍ: ໃບບົວ ຈັນທະລົງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່