ລັດວິສາຫະກິດໄຟຟ້າລາວ ສາຂາແຂວງສະຫວັນນະເຂດ (ຟຟລ.ສຂ) ຫ້າມໄວໝຸ່ມ-ເຍົາວະເຊົາຫຼິ້ນວ່າວໃກ້ກັບສາຍໄຟຟ້າໃນວົງລັດສະໝີ 1 ກິໂລແມັດ ຖ້າວ່າວຄ້າງຢູ່ສາຍໄຟຕ້ອງແຈ້ງໃຫ້ໄຟຟ້າແຂວງຮັບຮູ້ ແລະ ຫ້າມໃຊ້ວັດຖຸອື່ນປົດກູ້ເອົາວ່າວໂດຍບໍ່ໄດ້ຮັບອະນຸຍາດ ຫາກບຸກຄົນໃດທີ່ລ່ວງລະເມີດຈະຖືກປະຕິບັດຕາມກົດໝາຍ.
ໄຟຟ້າລາວສະຫວັນນະເຂດ (ຟຟລ.ສຂ) ໄດ້ອອກແຈ້ງວັນທີ 6 ພະຈິກ 2018, ເລກທີ 795,ຟຟລ.ສຂ ເຖິງອຳນາດການປົກຄອງບ້າານ ແລະ ພໍ່ແມ່ປະຊາຊົນຕາມບ້ານຕ່າງໆ ພາຍໃນແຂວງສະຫວັນນະເຂດ ທີ່ມີສາຍໄຟຟ້າແຮງສູງ-ກາງ-ຕໍ່າເນັ່ງຜ່ານ ຫ້າມແລ່ນວ່າວໃນຂອບເຂດບໍລິເວນທີ່ມີສາຍໄຟຟ້າ. ອີງຕາມສະພາບຄວາມເປັນຈິງ ໂດຍສະເພາະທ້າຍລະດູຝົນຂອງທຸກໆປີເຫັນວ່າ ມີໄວໝຸ່ມ-ເຍົາວະຊົນຈຳນວນໜຶ່ງພາກັນຫຼິ້ນວ່າວໃກ້ກັບສາຍໄຟຟ້າ ເຮັດໃຫ້ສາຍໄຟມີຜົນສະທ້ອນຕໍ່ລະບົບໄຟຟ້າ ເປັນຕົ້ນແມ່ນເຮັດໃຫ້ໄຟຕົກ-ໄຟຟ້າມອດ, ອຸປະກອນໄຟຟ້າເກີດຊໍາຫຼຸດເສຍຫາຍ ຮ້າຍແຮງໄປກວ່ານັ້ນ ອາດເກີດອັນຕະລາຍເຖິງແກ່ຊີວິດ.
ດັ່ງນັ້ນ, ຈຶ່ງຫ້າມໄວໝຸ່ມ-ເຍົາວະເຊົາຫຼິ້ນວ່າວທຸກຊະນິດທີ່ໃກ້ບໍລິເວນມີສາຍໄຟຟ້າເນັ່ງຜ່ານໃນວົງລັດສະໝີ 1 ກິໂລແມັດລົງມາ; ຖ້າວ່າວຕົກຄ້າງ ຫຼື ກ້ຽວສາຍໄຟ ໃຫ້ແຈ້ງ ຟຟລ.ສຂ ຫຼື ສູນບໍລິການໄຟຟ້າທີ່ຢູ່ໃກ້ຮັບຊາບ ຫ້າມເດັດຂາດບໍ່ໃຫ້ປີນໄຕ່ ຫຼື ໃຊ້ວັດຖຸອື່ນເພື່ອປົດກູ້ເອົາວ່າວຕາມລຳພັງ ຫາກຜູ້ໃດລະເມີດຈະຕ້ອງໄດ້ຮັບຜິດຊອບກັບຄວາມເສຍຫາຍທັງໝົດທີ່ເກີດຂຶ້ນບໍ່ວ່າທາງແພ່ງຫຼື ທາງອາຍາ.
ແຈ້ງການດັ່ງກ່າວ, ເພື່ອເຮັດໃຫ້ລະບົບສາຍສົ່ງໄຟຟ້າ ເວົ້າລວມເວົ້າສະເພາະ ກໍແມ່ນລະບົບໄຟຟ້າແຮງສູງ, ແຮງກາງທີ່ເນັ່ງຜ່ານເມືອງ, ຜ່ານບ້ານ ແລະ ລະບົບ ສາຍຕາຂ່າຍແຮງຕໍ່າ ພາຍໃນບ້ານຂອງຕົນມີຄວາມທົນທານຮັບປະກັນມີກະແສໄຟໃຊ້ປົກກະຕິໃນ ເຂດ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ຟຟລ.ສຂ
ຮູບພາບຈາກ: 2photo.ru