ປີ 2019, ຄະນະກຳມະທິການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງໃນ ສປປ ລາວ (ຄຊກລ) ຕ້ອງການງົບປະມານຫຼາຍກວ່າ 51 ລ້ານໂດລາສະຫະລັດ ຫຼື 437 ຕື້ກວ່າກີບ ເຂົ້າໃນວຽກງານເກັບກູ້ລະເບີດຕົກຄ້າງ ໂດຍໄດ້ແບ່ງງົບປະມານອອກເປັນ 5 ພາກສ່ວນໃນການຈັດຕັ້ງປະຕິບັດໜ້າທີ່ວຽກງານໃນການເກັບກູ້ລະເບີດບໍ່ທັນແຕກທີ່ຕົກຄ້າງໃນ ສປປ ລາວ.
ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ (ຮສສ) ປະທານຄະນະກຳມະທິການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງໃນ ສປປ ລາວ (ຄຊກລ) ໄດ້ກ່າວໃນກອງປະຊຸມຂະແໜງການແກ້ໄຂບັນຫາລະເບີດບໍ່ທັນແຕກໃນວັນທີ 2 ພະຈິກ 2018 ວ່າ: ໃນການປະຕິບັດວຽກງານຜ່ານມາ ຍັງມີຂໍ້ບົກຜ່ອງຈຳນວນໜຶ່ງທີ່ຕ້ອງໄດ້ເອົາໃຈໃສ່ແກ້ໄຂໃນປີຕໍ່ໆໄປ ດັ່ງນັ້ນ, ປີ 2019 ຄຊກລ ຕ້ອງການທຶນທັງໝົດ 51,46 ລ້ານໂດລາ ຫຼື ປະມານ 437,41 ຕື້ກີບ ເຊິ່ງຈະນຳໃຊ້ເຂົ້າໃນວຽກງານການສຳຫຼວດບໍ່ເປັນວິຊາການ ແລະ ວິຊາການ 34,7 ລ້ານໂດລາ; ສຳລັບກການກວດກູ້ລະເບີດບໍ່ທັນແຕກ 11,4 ລ້ານໂດລາ; ຊ່ວຍເຫຼືອປະກອບອາຊີບ ແລະ ສ້າງເສດຖະກິດຄອບຄົວໃຫ້ຜູ້ຖືກເຄາະຮ້າຍຈາກລະເບີດບໍ່ທັນແຕກຈຳນວນ 300 ຄົນ ລວມມູນຄ່າ 4,6 ລ້ານໂດລາ; ການໂຄສະນາທີ່ມາ ແລະ ຄວາມອັດຕະລາຍຂອງລະເບີດບໍ່ທັນແຕກ ຢູ່ບັນດາແຂວງທີ່ໄດ້ຮັບຜົນກະທົບໃນທົ່ວປະເທດ 1 ລ້ານໂດລາ; ສ້າງຄວາມເຂັ້ມແຂງໃຫ້ກອງເກັບກູ້ລະເບີດມະນຸດສະທຳໃຊ້ງົບປະມານ 1,4 ລ້ານໂດລາ ແລະ ງົບປະມານໃນການບໍລິຫານຫ້ອງການ ຄຊກລ 2,5 ລ້ານໂດລາ.
ທັງນີ້, ເພື່ອເປັນການປະຕິບັດຕາມຕົວເລກຄາດໝາຍແຜນການ 5 ປີ ແລະ ຄາດໝາຍເອັດດີຈີ18 ໃນດ້ານການຊ່ວຍເຫຼືອຜູ້ລອດຊີວິດ, ການສຳຫຼວດ ແລະ ກວດກູ້ລະເບີດບໍ່ທັນແຕກໃຫ້ບັນລຸຕາມທີ່ວາງໄວ້. ນອກຈາກນັ້ນ. ກະຊວງແຜນການ ແລະ ການລົງທຶນ ກໍໄດ້ເອົາເຂົ້າແຜນງົບປະມານແຫ່ງລັດໃນປີ 2019 ໃນການກວດກູ້ລະເບີດບໍ່ທັນແຕກໃຫ້ແລ້ວ 1,42 ຕື້ກີບ ເພື່ອຮັບໃຊ້ຈຸມສຸມພັດທະນາ ແລ ດິນທີ່ປະຊາຊົນບັນດາເຜົ່າຕ້ອງການນຳໃຊ້ໃນຈຳນວນ 15 ເຮັກຕາໃນແຕ່ລະປີ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມເສດຖະກິດ-ສັງຄົມ
ຮູບພາບຈາກ: questformore.com