ເປີດຖ້ຽວບິນທຳອິດ ລະຫວ່າງຫຼວງພະບາງ-ສາງຊ່າ ສປ. ຈີນ-ຫຼວງພະບາງ ສປປ ລາວ. ເລີ່ມແຕ່ວັນທີ 31 ຕຸລາ 2018 ເປັນຕົ້ນໄປ ໂດຍນຳໃຊ້ເຮືອບິນແອບັດ 320 ຂອງລັດວິສາຫະກິດການບິນລາວ ເປັນຖ້ຽວບິນອອກທຸກໆວັນພຸດ.ນອກນັ້ນ, ຜູ້ທີ່ຈະເດີນທາງຈາກນະຄອນຫຼວງວຽງຈັນ ໄປສາງຊ່າ ຍັງສາມາດນຳໃຊ້ຖ້ຽວບິນດັ່ງກ່າວໄດ້ ໂດຍຜ່ານການບິນ (Transit) ສະໜາມບິນຫຼວງພະບາງ.
ລັດວິສາຫະກິດການບິນລາວ ຮ່ວມກັບ ບໍລິສັດທ່ອງທ່ຽວຫູໜານ (Hunan Xiangfeng International Aviation Services Co;LTD) ເປີດຖ້ຽວບິນໃໝ່ລະຫວ່າງແຂວງຫຼວງພະບາງ ສປປ ລາວ ຫາ ເມືອງສາງຊ່າ ແຂວງຫູໜານ ສປ ຈີນ ແລະ ບິນຈາກສະໜາມບິນ ສາງຊ່າ ຫາ ຫຼວງພະບາງ ໃນວັນດຽວກັນ ໂດຍໃຊ້ເຮືອບິນແອບັດ 320 ຂອງລັດວິສາຫະກິດການບິນລາວ ເປັນຖ້ຽວບິນທຸກໆວັນພຸດ ເລີ່ມບິນແຕ່ວັນທີ 31 ຕຸລາ 2018 ເປັນຕົ້ນໄປ. ການເປີດຖ້ຽວບິນດັ່ງກ່າວ, ເພື່ອອຳນວຍຄວາມສະດວກໃຫ້ແກ່ນັກທ່ອງທ່ຽວ, ນັກທຸລະກິດ ແລະ ຜູ້ໂດຍສານທົ່ວໄປທີ່ມີຄວາມຕ້ອງການເດີນທາງສາຍດັ່ງກ່າວ ເຊິ່ງຜູ້ທີ່ຈະເດີນທາງຈາກນະຄອນຫຼວງວຽງຈັນໄປສາງຊ່າ ຍັງສາມາດນຳໃຊ້ຖ້ຽວບິນນີ້ໄດ້ ໂດຍຜ່ານການບິນ (Transit) ສະໜາມບິນຫຼວງພະບາງ.
ການເປີດສາຍການບິນຄັ້ງນີ້, ຍັງສອດຄ່ອງກັບການປະຕິບັດຕາມນະໂຍບາຍຂອງພັກ-ລັດ ໃນການເປີດກວ້າງການຮ່ວມມືກັບບັນດາປະເທດໃນຂົງເຂດພາກພື້ນ ແລະ ສາກົນ ພ້ອມທັງສົ່ງເສີມປີທ່ອງທ່ຽວລາວ 2018 ໂດຍສະເພາະລະຫວ່າງແຂວງຫຼວງພະບາງ ເມືອງມໍລະດົກໂລກ ກັບ ແຂວງຫູໜານ ສປ ຈີນ ເປັນເມືອງທີ່ມີຊື່ສຽງດ້ານການທ່ອງທ່ຽວເປັນຕົ້ນແມ່ນ ແຫຼ່ງທ່ອງທ່ຽວຂົວແກ້ວຍາວທີ່ມີຄວາມສວຍງາມ, ທ່ອງທ່ຽວບ້ານເກີດປະທານເໝົາເຕໍເຈີຕຸງ ແລະ ບ່ອນອື່ນໆອີກຫຼາຍແຫ່ງ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມປະຊາຊົນ
ຮູບພາບຈາກ: camce.com.cn