ໃນບຸນອອກພັນສາປະວໍລະນາ ແລະ ບຸນຊ່ວງເຮືອທ່າວັດຈັັນ, ນະຄອນຫຼວງວຽງຈັນ ລະຫວ່າງວັນທີ 22-25 ຕຸລາ 2018 ທີ່ຜ່ານມາ ເຈົ້າໜ້າທີ່ກອງຄະດີອຸບັດຕິເຫດ ພະແນກຕຳຫຼວດຈະລາຈອນ ນະຄອນຫຼວງວຽງຈັນ ລາຍງານໃຫ້ຮູ້ວ່າ: ລະຫວ່າງວັນທີ 22-25 ຕຸລາ 2018 ເປັນຊ່ວງໄລຍະງານບຸນອອກພັນສາປະວໍລະນາ ແລະ ບຸນຊ່ວງເຮືອທ່າວັດຈັັນ ນະຄອນຫຼວງວຽງຈັນ ມີອຸບັດຕິເຫດຕາມທ້ອງຖະໜົນທັງໜົດ 27 ຄັ້ງ ແລະ ມີຜູ້ເສຍຊີວິດ 7 ຄົນ, ບາດເຈັບສາຫັດ 4 ຄົນ, ສົມຄວນ 14 ຄົນ ແລະ ບາດເຈັບເລັກນ້ອຍ 13 ຄົນ; ພະຫະນະເປ່ເພເລັກນ້ອຍ 22 ຄັນ, ສົມຄວນ 21 ຄັນ ແລະ ໃຊ້ການບໍ່ໄດ້ 4 ຄັນ. ເຫດການດັ່ງກ່າວ, ສ່ວນໃຫຍ່ແມ່ນເກີດຂຶ້ນທີ່ຖະໜົນທ່າເດື່ອ, ໄກສອນ, 13 ໃຕ້ ແລະ ກຳແພງເມືອງ ສະເພາະຜູ້ທີ່ເກີດອຸບັດຕິເຫດມີອາຍຸປະມານ 22-50 ປີ ສ່ວນໃຫຍ່ເປັນເພດຊາຍ. ສາເຫດ, ເກີດຈາກການດື່ມສິ່ງມືນເມົາແລ້ວຂັບຂີ່ລົດດ້ວຍຄວາມປະໝາດຂາດສະຕິ ແລະ ອື່ນໆ.
ທ່ານ ພັທ ຊຽງພັນ ອິນທະປັນຍາ, ຮອງຫົວໜ້າຫ້ອງການກອງບັນຊາການ ປກສ ເມືອງຈັນທະບູລີ ໄດ້ໃຫ້ການສຳພາດຕໍ່ສື່ມວນຊົນກ່ຽວກັບເຫດການໃນງານດັ່ງກ່າວວ່າ: ປີນີ້, ມີປະກົດການຫຍໍ້ທໍ້ເກີດຂຶ້ນອີກ 3 ເລື່ອງຄື: ແຫກກະເປົາ 2 ເລື່ອງ, ລ່ວງກະເປົາ 1 ເລື່ອງ ແລະ ເຄື່ອງມີຄ່າຈຳນວນໜື່ງ ລວມມູນຄ່າເສຍຫາຍ 1.900.000 ກີບ. ເຫດການເດັ່ນກວ່າໝູ່ແມ່ນແຫກກະເປົາ ທຽບໃສ່ປີຜ່ານມາເຫັນວ່າປະກົດການດັ່ງກ່າວ, ໄດ້ຫຼຸດລົງ 8 ເລື່ອງ ເນື່ອງຈາກຜູ້ມາທ່ຽວຊົມໃນງານມີສະຕິລະວັງຕົວ ແລະ ສະຖານທີ່ກໍກວ້າງຂວາງບໍ່ມີຄວາມແອອັດ ເຮັດໃຫ້ມິດສາຊີບລົງມືກໍເຫດໄດ້ຍາກ. ພ້ອມນີ້, ຍັງໄດ້ຈັບຕົວຜູ້ກໍ່ເຫດແຫກກະເປົາໄດ້ 2 ຄົນ ຊື່ ທ້າວ ຈິ່ງຕິ້ງຕົວ ອາຍຸ 43 ປີ ແລະ ນາງ ຫງຽນທີຮາ ອາຍຸ 43 ປີ ທັງສອງເປັນສັນຊາດຫວຽດນາມ ພັກເຊົາຢູ່ບ້ານຊຽງຢືນ ເມືອງຈັນທະບູລີ ນະຄອນຫຼວງວຽງຈັນ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: ໜັງສືພິມຄວາມສະຫງົບ