ເນື່ອງຈາກລາຄານໍ້າມັນເພີ່ມຂຶ້ນຫຼາຍ ທັງທີ່ລາຍຮັບຍັງຢູ່ຄືເກົ່າ, ລັດວິສາຫະກິດລົດເມນະຄອນຫຼວງ ຈິ່ງໄດ້ຮຽກຮ້ອງ ເຖິງຜູ້ທີ່ໃຊ້ລົດໃຊ້ຖະໜົນຫັນມາໃຊ້ບໍລິການລົດເມສາທາລະນາ ເພື່ອເປັນການຫຼຸດຜ່ອນຄ່າໃຊ້ຈ່າຍ ແລະ ຫຼຸດຜ່ອນບັນຫາລົດຕິດໃນຕົວເມືອງນະຄອນຫຼວງວຽງຈັນ ພ້ອມນັ້ນ, ທ່ານຍັງໄດ້ວາງແນວທາງການປັບປຸງແກ້ໄຂບັນຫາລົດເມທີ່ແລ່ນບໍ່ກົງໂມງເວລາອີກດ້ວຍ.
ທ່ານ ຄຳພູນ ເຕເມລາດ ອຳນວຍການ ບໍລິສັດ ລັດວິສາຫະກິດລົດເມ ນະຄອນຫຼວງວຽງຈັນ ໄດ້ໃຫ້ການສຳພາດໃນອາທິດຜ່ານມານີ້ວ່າ:ປັດຈຸບັນ, ມີສິ່ງທ້າຍທາຍຫຼາຍຢ່າງຕໍ່ເສດຖະກິດລົດເມສາທາລະນະ ເນື່ອງຈາກສະພາບແອອັດຂອງລົດເທິງທ້ອງຖະໜົນ ນັບມື້ເພື່ມຂຶ້ນ ເຮັດໃຫ້ລົດເມບາງສາຍບໍ່ສາມາດແລ່ນໄດ້ຖືກຕາມຕາຕະລາງໂມງ ແລະ ຢູ່ປະເທດເຮົາຍັງບໍ່ທັນມີເລນສະເພາະລົດເມແລ່ນ ຄືກັບຢູ່ຕ່າງປະເທດ ເຮັດໃຫ້ລົດເມຊ້າໃນເວລາເລັ່ງດ່ວນ. ນອກຈາກນີ້, ນໍ້າມັນຮັບໃຊ້ການຂົນສົ່ງປະມານ 140.000 ລິດຕໍ່ເດືອນ ຖືວ່າເປັນບໍລິສັດໜຶ່ງທີ່ນໍ້າໃຊ້ນໍ້າມັນຫຼາຍສົມຄວນ ເມື່ອນໍ້າມັນມີການປັບລາຄາສູງຂຶ້ນເລື້ອຍໆ ແນ່ນອນມັນຕ້ອງກະທົບຕໍ່ທຸລະກິດບໍ່ຫຼາຍກໍ່ໜ້ອຍ ທັງສົ່ງຜົນກະທົບຕໍ່ລາຍຈ່າຍຂອງຜູ້ໃຊ້ລົດຍານພະຫະນະເພີ່ມຂຶ້ນ ແຕ່ລາຍຮັບຍັງຄືເກົ່າ.
ເພື່ອແກ້ໄຂບັນຫາດັ່ງກ່າວ, ຮຽກຮ້ອງມາຍັງສັງຄົມ ກໍຄືປະຊາຊົນ ຫັນມານຳໃຊ້ລົດເມສາທາລະນະ ເຊິ່ງຈະເປັນທາງອອກໃນສະພາບລາຄານໍ້າມັນຂຶ້ນ ພ້ອມທັງໃຫ້ຖືກກັບນະໂຍບາຍຂອງລັດຖະບານ ໃນການນຳໃຊ້ລົດເມສາທາລະນະ ເພື່ອຫຼຸດຜ່ອນການນຳໃຊ້ລົດສ່ວນຕົວ. ປັດຈຸບັນ, ໄດ້ມີການປັບປຸງການບໍລິການຫຼາຍຢ່າງ ໂດຍສະເພາະເສັ້ນທາງຫຼັກ ສາຍດົງໂດກ, ທ່າງ່ອນ, ຊຽງຄວນ, ດອນປ່າໃໝ່ ຜູ້ມີເຮືອນຢູ່ເຂດນອກແຕ່ບ່ອນເຮັດວຽກຢູ່ໃນເມືອງໃກ້ກັບເສັ້ນທາງສາຍດັ່ງກ່າວ ໃຫ້ຫັນມາໃຊ້ລົດເມ. ຕໍ່ໜ້າຈະໄດ້ສຳຫຼວດຄືນໃໝ່ ໂດຍສະເພາະບັນຫາລົດເມແລ່ນບໍ່ກົງກັບເວລາ ເຮັດໃຫ້ຂາດຄວາມເຊື່ອໝັ້ນຂອງພະນັກງານ ແລະ ນັກສຶກສາໃຊ້ບໍລິການ ເນື່ອງຈາກຄູ-ອາຈານບໍ່ທັນໂມງສອນນັກຮຽນ ແລະ ນັກສຶກສາກໍເຂົ້າຮຽນບໍ່ທັນ, ຖ້າຫາກສາມາດຄວບຄຸມເວລາ ແລະ ບໍລິການວ່ອງໄວໄດ້ ອາດຈະສາມາດດຶງດູດຜູ້ໂດຍສານໄດ້ຢ່າງແນ່ນອນ.
ພ້ອມນັ້ນ, ທ່ານໄດ້ຊີ້ແຈ້ງເຖິງການປັບລະຄາຄ່າລົດເມໃນສາຍຕ່າງໆ ວ່າ: “ນັບແຕ່ປີ 2011 ເປັນຕົ້ນມາ ມີການຂຶ້ນລາຄານໍ້າມັນຫຼາຍຄັ້ງ ແຕ່ການຂຶ້ນລາຄາຜູ້ໂດຍສານລົດເມນັບແຕ່ປີ 2011 ຫາກໍຂຶ້ນໃນຊ່ວງເດືອນເມສາ 2018 ໂດຍອີງຕາມການຕົກລົງເຫັນດີຂອງເຈົ້າຄອງນະຄອນຫຼວງຄື: ສາຍດົງໂດກ ຈາກ 3.000 ກີບ ເປັນ 4.000 ກີບ, ສາຍທ່າງ່ອນ 5.000 ກີບ ເປັນ 7.000 ກີບ, ສາຍທ່າເດື່ອ 6.000 ກີບ ເປັນ 8.000 ກີບ
ການຄິດໄລ່ຂຶ້ນລາຄາຜູ້ໂດຍສານໄດ້ອີງໃສ່ລາຄານໍ້າມັນໃນທ້າຍປີ 2017 ເອົາລາຄານໍ້າມັນກາຊວນ 6.705 ກີບຕໍ່ລິດ ແຕ່ມາຮອດເດືອນຕຸລາ 2018 ລາຄານໍ້າມັນກາຊວນຂື້ນມາເປັນ 8.505 ກີບຕໍ່ລິດ (ລາຄາຂາຍຍ່ອຍນໍ້າມັນລົງປໍ້ານໍ້າມັນຂອງບໍລິສັດລົດເມ) ແຕ່ໄປຕ່າງແຂວງໃຊ້ລາຄາຂາຍຍ່ອຍທົ່ວໄປຕາມປໍ້າ 8.690 ກີບທຽບໃສ່ເພີ່ມຂຶ້ນ 1.805 ກີບຕໍ່ລິດ. ການຈະຂຶ້ນລາຄານໍ້າມັນລົດເມແຕ່ລະຄັ້ງກໍ່ຕ້ອງຂໍອະນຸຍາດຈາກເຈົ້າຄອງນະຄອນຫຼວງກ່ອນ ຖ້າເຫັນດີຈິ່ງເພີ່ມຂຶ້ນໄດ້ ບໍ່ແມ່ນຈະຂຶ້ນຕາມໃຈໄປກັບລາຄານໍ້າມັນ, ດັ່ງນັ້ນຈຶ່ງພົບຄວາມຫຍຸ້ງຍາກໃນໄລຍະຜ່ານມາ”.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່
ຮູບພາບຈາກ: vientianebus.org.la