ປັດຈຸບັນ, ສປປ ລາວ ມີມາດຕະຖານແຫ່ງຊາດ ທີ່ປະກາດໃຊ້ຢ່າງເປັນທາງການລວມທັງໝົດ 441 ມາດຕະຖານ ໂດຍໄດ້ຮັບການອະນຸຍາດນຳໃຊ້ກາໝາຍມາດຕະຖານແຫ່ງຊາດ ຈຳນວນ 30 ຜະລິດຕະພັນ, ມີບັນດາຂະແໜງການ, ບໍລິສັດທີ່ໄດ້ຮັບການຢັ້ງຢືນລະບົບມາດຕະຖານສາກົນ ISO/IEC ຈຳນວນ 25 ບໍລິສັດ.
ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງ ວິທະຍາສາດ ແລະ ເຕັກໂນໂລຊີ ໄດ້ຖະແຫຼ່ງຂ່າວຕໍ່ສື່ມວນຊົນ ໃນວັນທີ 15 ຕຸລາ 2018 ວ່າ: ປັດຈຸບັນ, ມີມາດຕະຖານແຫ່ງຊາດລາວ ທີ່ປະກາດໃຊ້ຢ່າງເປັນທາງການລວມທັງໝົດ 441 ມາດຕະຖານ, ໄດ້ຮັບການອະນຸຍາດນຳໃຊ້ກາໝາຍມາດຕະຖານແຫ່ງຊາດ ຈຳນວນ 30 ຜະລິດຕະພັນ, ມີບັນດາຂະແໜງການ, ບໍລິສັດທີ່ໄດ້ຮັບການຢັ້ງຢືນລະບົບມາດຕະຖານສາກົນ ISO/IEC ຈຳນວນ 25 ບໍລິສັດ, ສ້າງລະບົບການເຮັດວຽກງານກວດກາ ແລະ ການຢັ້ງຢືນຄຸນນະພາບຜະລິດຕະພັນ ແລະ ສິນຄ້າ ເປັນຕົ້ນໄດ້ສ້າງຕັ້ງໜ່ວຍງານກວດກາຄຸນນະພາບນໍ້າມັນເຊື້ອໄຟ ແລະ ອາຍແກັດຢູ່ຕາມແຕ່ລະດ່ານຊາຍແດນສາກົນ ໄດ້ທັງໝົດ 17 ດ່ານໃນຂອບເຂດທົ່ວປະເທດ ທັງເປັນການຕອບສະໜອງນະໂຍບາຍຂອງລັດຖະບານໃນການຄຸ້ມຄອງຄຸນນະພາບຂອງສິນຄ້າ, ອຸດຕັນການຮົ່ວໄຫຼໃນການເກັບລາຍຮັບເຂົ້າງົບປະມານ. ພ້ອມກັນນັ້ນ, ໄດ້ສົ່ງບັນດາຄະນະກຳມະການເຕັກນິກຂອງອົງການມາດຕະຖານໃນ 5 ຂົງເຂດຄື: ຂົງເຂດໜ່ວຍງານເຫຼັກ, ໜ່ວຍງານເຟີນີເຈີ, ໜ່ວຍງານໄມ້, ໜ່ວຍງານບໍລິຫານຈັດການຄຸ້ມຄອງລະບົບ (ISO 9001) ແລະ ໜ່ວຍງານບໍລິຫານຈັດການຄຸ້ມຄອງດ້ານສິ່ງແວດລ້ອມ (ISO 14001).
ອົງການມາດຕະຖານໂລກສ້າງຕັ້ງຂຶ້ນໃນປີ 1947 ແລະ ສປປ ລາວ ໄດ້ເຂົ້າເປັນສະມາຊີກສົມບູນຂອງອົງການມາດຕະຖານສາກົນເດືອນມັງກອນ 2017 ເປັນຕົ້ນມາ. ວຽກງານມາດຕະຖານຂອງ ສປປ ລາວ ຢູ່ໃນຄວາມຮັບຜິດຊອບຂອງກົມມາດຕະຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຊີ ໃນປີຜ່ານມາ, ກົມດັ່ງກ່າວໄດ້ສ້າງຕັ້ງ ແລະ ປັບປຸງບັນດາກົດໝາຍ, ດຳລັດ, ຂໍ້ຕົກລົງ ແລະ ມາດຕະຖານແຫ່ງຊາດ ສຳລັບບັນດາຜະລິດຕະພັນ ແລະ ສິນຄ້າຕ່າງໆ ເພື່ອໃຫ້ສອດຄ່ອງກັບລະບຽບການຂອງອົງກອນ ການຄ້າໂລກ ເຊັ່ນ: ກົດໝາຍວ່າດ້ວຍມາດຕະຖານແຫ່ງຊາດ, ກົດໝາຍວ່າດ້ວຍການວັດແທກ, ບັນດານິຕິກຳວ່າດ້ວຍການຂຶ້ນທະບຽນຜະລິດຕະພັນ ແລະ ສິນຄ້າ, ການນຳໃຊ້ກົດໝາຍມາດຕະຖານຜະລິດຕະພັນ ແລະ ສິນຄ້າ, ການກວດສອບຜະລິດຕະພັນ ແລະ ສິນຄ້າ, ການໃຫ້ລາງວັນຄຸນນະພາບ, ການຈັດຕັ້ງ ແລະ ເຄື່ອນໄຫວຂອງຈຸດສອບຖາມ ສິ່ງກີດຂວາງດ້ານເຕັກນິກ, ການຄຸ້ມຄອງ, ກວດກາ ແລະ ຢັ້ງຢືນຄຸນນະພາບນໍ້າມັນເຊື້ອໄຟ, ຜະລິດຕະພັນເຄື່ອງໃຊ້ໄຟຟ້າ-ເອເລັກໂຕນິກ ແລະ ອື່ນໆ ເພື່ອອຳນວຍຄວາມສະດວກໃນການນຳເຂົ້າ-ສົ່ງອອກຜະລິດຕະພັນສິນຄ້າ ແລະ ຕອບສະໜອງຄວາມຮຽກຮ້ອງຕ້ອງການຂອງສັງຄົມ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໝັງສືພິມປະຊາຊົນ
ຮູບພາບຈາກ: www.brownstoner.com