ໃນລະຫວ່າງວັນທີ 22-24 ຕຸລາ 2018 ໃກ້ຈະມາເຖິງນີ້ ທີ່ວັດອົງຕື້ມະຫາວິຫານ ຈະມີກິດຈະກໍາໄຕ້ໂຄມໄຟ ຈຳນວນ 2,561 ດວງ ແລະ ຍັງມີອີກຫຼາຍກິດຈະກຳ ເພື່ອບູຊາພະພຸດທະສາສະໜາ ແລະ ສະຫຼອງວັນອອກພັນສາປະວໍລະນາ ພ້ອມທັງ ເປັນການຮັກສາປະເພນີໄຕ້ໂຄມໄຟ ແລະ ເຮືອໄຟ ໃຫ້ເປັນກິດຈະກຳປະຈຳປີໃນການສົ່ງເສີມວັດທະນະທຳ ແລະ ການທ່ອງທ່ຽວ.
ພະອາຈານ ພວງຄຳປະເສີດ ພູມາວົງ ເຈົ້າອະທິການວັດອົງຕື້ມະຫາວິຫານ ໃຫ້ການສໍາພາດໃນວັນທີ 3 ຕຸລາ ທີ່ຜ່ານມາວ່າ: ໃນລະຫວ່າງວັນທີ 22-24 ຕຸລາ 2018 ນີ້ ທີ່ວັດອົງຕື້ມະຫາວິຫານ ຈະມີກິດຈະກໍາໄຕ້ໂຄມໄຟ ຈຳນວນ 2,561 ດວງ ເພື່ອບູຊາພະພຸດທະສາສະໜາ ແລະ ສະຫຼອງວັນອອກພັນສາປະວໍລະນາກ ເຊິ່ງໃນນັ້ນກໍໄດ້ມີການກະກຽມອີກຫຼາຍກິດຈະກຳເປັນຕົ້ນແມ່ນ ໃນວັນທີ 22 ຕຸລາ 2018 ເວລາ 13:00 ໂມງ ກະກຽມເປີດສວນທຳມະຈັກ, ເວລາ 16:00 ໂມງ ພິທີສູດ ແລະ ເປີດສວນທຳມະຈັກເປັນທາງການ, ເວລາ 17:00 ໂມງ ກະກຽມໄຕ້ທຽນອອກພັນສາ ໄຕ້ອັກສອນສະຫຼອງທຳມະຈັັກ.
ວັນທີ 23 ຕຸລາ 2018 ເວລາ 17:00 ໂມງ ກະກຽມໄຕ້ທຽນງານອອກພັນສາ, ໄຕ້ອັກສອນຍິນດີຕ້ອນຮັບສູ່ປີທ່ອງທ່ຽວລາວ 2018 .
ວັນທີ 24 ຕຸລາ 2018 ເວລາ 7:00 ໂມງ ມີພິທີໃສ່ບາດຖວຍສັງຄະທານ ແລະ ເວລາ 17:00 ໂມງ ກະກຽມໄຕ້ທຽນງານອອກພັນສາ ໄຕ້ອັກສອນ ວັນມະຫາປະວໍລະນາອອກພັນສາ ພສ 2561. ກິດຈະກຳດັ່ງກ່າວ, ແນ່ໃສ່ການສົ່ງເສີມວັດທະນະທຳອັນດີງາມ ແລະ ການນຸ່ງຖືຂອງຊາດລາວ ທັງເປັນການຍົກສູງສົ່ງເສີມພຸດທະສາສະໜາ.
ໂອກາດດຽວກັນ, ທ່ານ ພະອາຈານ ຍັງໄດ້ເຊີນຊວນຊາວພຸດທະສະນິກະຊົນ ຕະຫຼອດຮອດນັກທ່ອງທ່ຽວຢູ່ ນະຄອນຫຼວງວຽງຈັນ ເຂົ້າຮ່ວກິດຈະກຳໃນງານບຸນອອກພັນສາປະວໍລະນາທີ່ວັດອົງຕື້ ເພື່ອໃຫ້ມີບັນຍາກາດຄືກຄື້ນມ່ວນຊື່ນ ໂດຍສະເພາະແມ່ຍິງຈະສົ່ງເສີມໃຫ້ນຸ່ງສິ້ນບ່ຽງແພເຂົ້າວັດ ເພື່ອເປັນການເຄົາລົບ ແລະ ໃຫ້ກຽດສະຖານທີ່ພຸດທະສາສະໜາ ທັງເປັນການສົ່ງເສີມແມ່ຍິງລາວຮັກສາກນນຸ່ງຖືອັນດີງາມຕື່ມອີກ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່
ຮູບພາບ:https://l.messenger.com/