ເມືອງໄຊເສດຖາ ນະຄອນຫຼວງວຽງຈັນ ເລັ່ງທັບມ້າງເທີບ-ເງີບຕາມເສັ້ນທາງ ໃນໄລຍະທີ2 ນັບຕັ້ງແຕ່ເສັ້ນທາງທາດຫຼວງ ແຕ່ວົງວຽນທາດຫຼວງ-ຫົວຂົວ-ວັງຊາຍ-ໜອງໜ່ຽງ-4ແຍກໄຟອຳນາດຫຼັກ 6 ຖະໜົນໄກສອນ ພົມວິຫານ ລວມທັງໝົດ 1,361 ເປົ້າໝາຍ. ປັດຈຸບັນໄດ້ທັບມ້າງໄປແລ້ວ 637 ເປັ້າໝາຍ ເຊິ່ງຈະສືບຕໍ່ໃຫ້ສຳເລັດໃນທ້າຍເດືອນພະຈິກ 2018 ນີ້.

ໃນວັນທີ 1 ຕຸລາ 2018, ທ່ານ ທະວີໄຊ ໄຊປະເສີດ ຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງໄຊເສດຖາ ໄດ້ໃຫ້ການສຳພາດວ່າ: “ໃນໄລຍະທີ2 ຂອງການຈັດຕັ້ງປະຕິບັດລົງໄປທັບມ້າງເທີບເງີບປ້າຍ ແລະ ສິ່ງກີດຂວາງຢູ່ແຄມທາງ ໂດຍເລີ່ມແຕ່ ວົງວຽນທາດຫຼວງ ຫາ 3ແຍກກົກຕານ ແລະ 4 ແຍກໄຟແດງຫຼັກ 6,  ປັດຈຸບັນກຳລັງທັບມ້າງໃນ 4 ບ້ານຄື: ບ້ານໂນນສະຫວ່າງ, ວັງຊາຍ, ໂນນສະຫງ່າ ແລະ ໜອງໜ່ຽງ. ໃນນັ້ນເທີບມີ 279, ມ້າງສຳເລັັດ 52, ປ້າຍ 215 ປ້າຍ ມ້າງສຳເລັດ 12 ປ້າຍ, ກຳແພງ 7 ອັນມ້າງສຳເລັດແລ້ວ ແລະ ວາງເຄື່ອງຊະຊາຍ 291, ຫຍັບຍ້າຍໄປແລ້ວ 51. ລວມທັງໝົດມີ 1,361 ຈຸດ. ປັດຈຸບັນແກ້ໄດ້ແລ້ວ 637 ເປົ້າໝາຍຍັງຄ້າງ 724 ເຊິ່ງມີເປົ້າໝາຍຈະສືບຕໍ່ໃຫ້ສຳເລັດໃນທ້າຍເດືອນ ພະຈິກ 2018”.

ພ້ອມກັນນັ້ນ, ທ່ານໄດ້ກ່າວອີກຕື່ມວ່າ:”ກ່ອນຈະລົງໄປທັບມ້າງສະຖານທີ່ດັ່ງກ່າວ, ໄດ້ມີຫຼາຍຂັ້ນຕອນ ເພື່ອລຸລ່ວງໃຫ້ປະຊາຊົນຜູ້ທີ່ມີເຮືອນຢູ່ແຄມທາງທີ່ຕໍ່ເທີບເງີບ ແລະ ສິ່ງກີດຂວາງຕ່າງໆ ໃຫ້ຫຍັບຍ້າຍຈາກຂອບທາງເຂົ້າໄປ 6,​5 ແມັດ ໂດຍກຳນົດໃຫ້ 15 ວັນໃຫ້ເຮັດເອງ ແຕ່ເວລາຜ່ານໄປປະຊາຊົນບໍ່ປະຕິບັດຕາມ. ດັ່ງນັ້ນ, ຄະນະກຳມະການຈາກຫຼາຍພາກສ່ວນ ຈຶ່ງໄດ້ລົງນຳພາປະຊາຊົນຈັດຕັ້ງປະຕິດປັດທັບມ້າງເອງ. ຜ່ານການສຳຫຼວດເຫັນວ່າເກືອບ 89% ຂອງຄອບຄົວທີ່ມີເຮືອນຕິດແຄມທາງໄດ້ຕໍ່ເທີບເທີບເງີບອອກມາໃສ່ເຂດສະຫງວນ ແລະ ທາງຄົນຍ່າງ. ອີງຕາມກົດໝາຍ ແລະ ລະບຽບກົດໝາຍອື່ນໆທີ່ກ່ຽວຂ້ອງ ຈຶ່ງໄດ້ມີການທັບມ້າງເທີບເງີບ ແລະ ສິ່ງຕໍ່ເຕີມອອກໃຫ້ໝົດ”.

ສຳລັບການທັບມ້າງເສັ້ນທາງໄລຍະທີ1 ຢູ່ທາດຫຼວງເລີ່ມແຕ່ວົງວຽນທາດຫຼວງ ຫາ 3 ແຍກກົກຕານ-ຫົວຂົວ. ສ່ວນຕະຫຼາດຫົວຂົວໄດ້ເລີ່ມຈັດຕັ້ງປະຕິບັດມາແຕ່ທ້າຍເດືອນ ສິງຫາ 2018. ປັດຈຸບັນສຳເລັດໄດ້ 95% ໃນນັ້ນມີເທີບ 215 ເທີບ ມ້າງສຳເລັດແລ້ວ 180 ເທີບ, ປ້າຍ 166 ປ້າຍ ມ້າງສຳເລັດແລ້ວ 157 ປ້າຍ, ກຳແພງຮົ້ວ 5 ຮົ້ວ ແລະ ມ້າງສຳເລັດແລ້ວ, ວາງເຄື່ອງຊະຊາຍ 195 ໄດ້ຫຍັບຍ້າຍເຂົ້າໄປສຳເລັດ 175.

ຮຽບຮຽງໂດຍ: ໃບບົວ ຈັນທະລັງສິ

ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່