ທ່ານ ອຸ່ນຫລ້າ ໄຊຍະສິດ ຮອງເຈົ້າແຂວງອັດ​ຕະປື, ຄະນະກຳມະການຕ້ານໄພພິບັດຂັ້ນແຂວງ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 5  ຂອງສະພາປະຊາຊົນ ແຂວງ ຊຸດທີ 1 ໃນວັນທີ 25 ກັນຍາ 2018 ຜ່ານມາວ່າ: “ໃນລະຫວ່າງວັນທີ 23 ກໍລະກົດ 2018  ໄດ້ມີພາຍຸລະດູຮ້ອນຈາກ ປະເທດຈີນ ຕອນໃຕ້ພັດປົກຄຸມທຸກພາກໃນທົ່ວປະເທດ ໂດຍສະເພາະ ແຂວງ ອັດຕະປື ໄດ້ມີສະພາບຝົນຕົກໜັກເຮັດໃຫ້ນ້ຳຖ້ວມຂັງ 3 ເມືອງຄື: ເມືອງ ສະໜາມໄຊ,  ​ເມືອງ​ພູ​ວົງ ​ແລະ ​ເມືອງ​ສາມັກຄີ​ໄຊ​. ​ໃນ​ນັ້ນ, ເມືອງພູວົງ ໄດ້ຮັບຜົນກະທົບຕົວຈິງ 11 ບ້ານ, ມີ 1.334 ຄອບຄົວ, ເນື້ອທີ່ກະສິກຳຂອງປະຊາຊົນເສຍຫາຍ 707,2 ເຮັກຕາ, ເນື້ອທີ່ສວນເສຍຫາຍ 94,4 ເຮັກຕາ, ເສັ້ນທາງເປ່ເພ 1 ຈຸດ, ລວມມູນຄ່າເສຍຫາຍ 2,1 ຕື້ກວ່າກີບ; ເມືອງສາມັກຄີໄຊ ໄດ້ຮັບຜົນກະທົບຕົວຈິງ 2 ບ້ານ, 30 ຄອບຄົວ, ເນື້ອທີ່ກະສິກຳຂອງປະຊາຊາຊົນເສຍຫາຍ 11 ເຮັກຕາ, ເນື້ອທີ່ສວນ 5 ເຮັກຕາ, ເສັ້ນທາງເປ່ເພ 1 ຈຸດ ລວມມູນຄ່າເສຍຫາຍ 250 ລ້ານກວ່າກີບ”.

          ພ້ອມກັນນັ້ນ, ທ່ານຍັງໄດ້ກ່າວອີກຕື່ມວ່າ: “ເມືອງ​ສະໜາມ​ໄຊ ໄດ້ຮັບຜົນກະທົບ 13 ບ້ານ, ມີ 2.717 ຄອບຄົວ, ໃນນີ້ ໄດ້ຮັບຜົນກະທົບ 100% ມີ 6 ບ້ານ, ເຮືອນຊານເປ່ເພເສຍຫາຍ 1.520 ຫລັງ, ມີຜູ້ເສຍຊີວິດຈຳນວນ 40 ສົບ, ເນື້ອທີ່ກະສິກຳຂອງປະຊາຊົນເສຍຫາຍ 7.097 ເຮັກຕາ, ເນື້ອທີ່ສວນ 15 ເຮັກຕາ, ຊົນລະປະທານເສຍຫາຍ 4 ແຫ່ງ, ສຳລັບມູນຄ່າເສຍຫາຍແມ່ນຍັງເກັບກຳຢູ່ບໍ່ສາມາດປະເມີນໄດ້”.

         ຕໍ່ສະພາບການເສຍຫາຍດັ່ງກ່າວ, ໂດຍສະເພາະຜົນກະທົບຢູ່ເມືອງສະໜາມໄຊ ຍັງນອນຢູ່ໃນເຫດການສຸກເສີນບັງເອີນລະດັບຊາດ. ປັດຈຸບັນ, ພວມຢູ່ໃນຂັ້ນຕອນການສຳຫລວດ ເກັບກຳຂໍ້ມູນຜົນເສຍຫາຍ ແລະ ຟື້ນຟູສະຖານທີ່ຢູ່ອາໄສຊົ່ວຄາວ  ແລະ ຍາວນານໃຫ້ປະຊາຊົນຜູ້ຖືກຜົນກະທົບຢ່າງຂຸ້ນຂ້ຽວ,  ນັບແຕ່ມື້ທີ່ປະຊາຊົນໄດ້ຮັບຜົນກະທົບ.  ຈົນຮອດປັດຈຸບັນ ເມືອງດັ້ງກ່າວ, ໄດ້ຮັບການຊ່ວຍເຫລືອທາງດ້ານກຳລັງເເຮງງານ ຂອງທີມງານຂອງລັດຖະບານ, ກອງບັນຊາການທະຫານແຂວງ ອັດຕະປື, ບັນດາກະຊວງ, ບໍລິສັດ ແລະ ພາກສ່ວນອື່ນໆ ທັງພາຍໃນ ແລະ ຕ່າງປະເທດ.

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຂ່າວຈາກ: ຂ່າວສານປະເທດລາວ

ຮູບພາບຈາກ: nifa.usda.gov