ທະນາຄານພັດທະນາອາຊີ (Asean Development Bank: ADB, ເອດີບີ) ຄາດຄະເນວ່າ: ”ໃນເດືອນເມສາ 2018 ມີການຄາດຄະເນວ່າ ເສດຖະກິດລາວຈະຂະຫຍາຍຕົວຢູ່ໃນລະດັບ 6,6% ໃນປີ 2018 ແລະ 7.0% ໃນປີ 2019, ແຕ່ເນື່ອງຈາກໄພພິບັດທາງທຳມະຊາດ ແລະ ຄວາມຕ້ອງການຊົມໃຊ້ພາຍໃນຫຼຸດລົງ ຈິ່ງເຮັດໃຫ້ລະດັບການຂະຫຍາຍຕົວຂອງເສດຖະກິດຫຼຸດລົງເຫຼືອ 6.6% ໃນປີ 2018 ນີ້ ແລະ ຫຍັບຕົວຂຶ້ນ 6,9% ໃນປີ 2019 ”.
ທ່ານ ສຸລິນທອນ ເລືອງສິງຄຳ ນັກເສດຖະສາດ ທະນາຄານພັດທະນາອາຊີ ປະຈຳລາວ ໄດ້ກ່າວບົດລາຍງານເສດຖະກິດ ສະບັບປັບປຸງຂອງ ເອດີບີ ໃນວັນທີ 26 ກັນຍາ 2018 ທີ່ຜ່ານມາວ່າ: ການຂະຫຍາຍຕົວຂອງເສດຖະກິດລາວ ປັດໄຈຫຼັກມາຈາກການຜະລິດໄຟຟ້າ ຄາດວ່າໝົດປີນີ້ຈະເພີ່ມຂຶ້ນປະມານ 8% ແລະ ການຜະລິດຈາກຂະແໜງບໍ່ແຮ່ຄາດວ່າຈະຫຼຸດລົງ 2% . ນອກຈາກນີ້, ໂຄງການກໍ່ສ້າງເຂື່ອນໄຟຟ້າຫຼາຍໂຄງການຍັງສືບຕໍ່ໄປຕາມແຜນ ເຖິງວ່າລັດຖະບານຈະມີຄຳສັ່ງກວດກາຄຸນນະພາບຂອງເຂື່ອນໃນຂອບເຂດທົ່ວປະເທດກໍຕາມ ແຕ່ອາດຈະບໍ່ມີຜົນຕໍ່ການຂະຫຍາຍຕົວເສດຖະກິດສຳລັບປີນີ້. ນອກນັ້ນ, ໂຄງການກໍ່ສ້າງເສັ້ນທາງລົດໄຟລາວ-ຈີນ ກໍມີຄວາມຄືບໜ້າໄປຕາມແຜນທີ່ກຳນົດໄວ້ ບວກກັບວຽກງານການທ່ອງທ່ຽວກໍ່ມີທ່າອ່ຽງເພີ່ມຂຶ້ນ ເນື່ອງຈາກມີນັກທ່ອງທ່ຽວຈາກ ສ. ເກົາຫຼີ ແລະ ສປ ຈີນ ເຂົ້າມາເພີ່ມຂຶ້ນ.
ປັດໄຈທີ່ເຮັດໃຫ້ການຂະຫຍາຍຕົວເສດຖະກິດຊ້າລົງ ຍ້ອນເນື່ອງມາຈາກການສົ່ງອອກແຮ່ທາດຫຼຸດລົງ ໂດຍສະພາະແມ່ນສອງໂຄງການໃຫຍ່ຄື: ບໍ່ຄຳ-ທອງເຊໂປນ ແລະ ບໍລິສັດພູເບ້ຍ ເຊິ່ງຈະເຫັນໄດ້ວ່າ ການຈັບຈ່າຍໃຊ້ສອຍໃນສັງຄົມເບົາບາງລົງ. ພ້ອມກັນນັ້ນ, ສປປ ລາວ ໄດ້ຮັບຜົນກະທົບຈາກໄພພິບັດທາງທຳະຊາດກວມເອົາ 115 ເມືອງຂອງປະເທດ ຜົນເສຍຫາຍຄາດວ່າຢູ່ໃນ 250 ລ້ານໂດລາ ຫຼື ປະມານ 2 ພັນຕື້ກວ່າກີບ.
ພ້ອມກັນນັ້ນ, ການຫຼຸດລົງຂອງຄ່າເງິນກີບລາວທີ່ໄວຂຶ້ນ ໂດຍທຽບກັບຄ່າເງິນໂດລາສະຫະລັດໃນຕະຫຼາດທົ່ວໄປ ອັດຕາເງິນເຟີ້ປັດຈຸບັນຄາດວ່າຈະເພີ່ມຂຶ້ນ 0,5% ຈາກການຄາດຄະເນເບື້ອງຕົ້ນຢູ່ທີ່ 2,5% ໃນປີ 2018 ແລະ 3,1% ໃນປີ 2019. ສຳລັບການຂາດດຸນບັນຊີເດີນສະພັດຄິດເປັນບັນຊີເຊັນເມື່ອທຽບກັບ ຈີດີພີ ຄາດວ່າຢູ່ທີ່ 13,8% ສຳລັບປີ 2018 ແລະ 13,0% ຂອງປີ 2019 ເຊິ່ງຕໍ່າກວ່າທີ່ຄາດຄະເນໄວ້ໃນເດືອນ ເມສາ ທີ່ຜ່ານມາໃນລະດັບ 14,9% ໃນປີ 2018 ແລະ 13,7% ໃນປີ 2019.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂ່າວຈາກ: ໜັງສືພິມປະຊາຊົນ, ຮູບພາບຈາກ: videoblocks.com