ເວັບໄຊຂ່າວໜັງສືພິມວຽງຈັນໃໝ່ລາຍງານວ່າ ເມື່ອວັນທີ 29 ສິງຫາ 2018 ຫ້ອງວ່າການນະຄອນຫຼວງວຽງຈັນໄດ້ຈັດກອງປະຊຸມປຶກສາຫາລືກ່ຽວກັບການປ້ອງກັນ ແລະ ຄວບຄຸມໄພພິບັດຂັ້ນນະຄອນຫຼວງວຽງຈັນ (ນວ) ຂຶ້ນ ເພື່ອປຶກສາຫາລືຊອກຫາວິທີການ ແລະ ມາດຕະການຟື້ນຟູ ພາຍຫຼັງທີ່ນໍ້າແຫ້ງ.
ທ່ານນາງ ລຳພອຍ ສີອັກຄະຈັນ ຫົວໜ້າພະແນກແຮງງານ ແລະ ສະຫວັດດີການສັງຄົມ ນວ ກ່າວວ່າ ເມືອງທີ່ໄດ້ຮັບຜົນກະທົບຈາກນໍ້າຖ້ວມໃນນະຄອນຫຼວງວຽງຈັນຕາມການສະຫຼຸບເບື້ອງຕົ້ນມີ ເມືອງໄຊທານີ, ນາຊາຍທອງ, ສີໂຄດຕະບອງ, ຫາດຊາຍທອງ ແລະ ເມືອງປາກງື່ມ ມີ 58 ບ້ານ ຈໍານວນ 1.629 ຄອບຄົວ ມີ 16.311 ຄົນ; ໃນນີ້ ຈຳນວນຄອບຄົວທີ່ຍົກຍ້າຍໄປຢູ່ບ່ອນປອດໄພ 806 ຄອບຄົວ ຈໍານວນ 3.758 ຄົນ. ນໍ້າໄດ້ຖ້ວມເນື້ອທີ່ທຳການຜະລິດຂອງປະຊາຊົນ ເນື້ອທີ່ 5.011,42 ເຮັກຕາ (ໃນ 126 ບ້ານ 6 ເມືອງ). ໃນນີ້ ມີເນື້ອທີ່ນາ 13.419 ເຮັກຕາ, ສາລີແຂງ 119 ເຮັກຕາ, ມັນຕົ້ນ 360 ເຮັກຕາ, ສວນກ້ວຍ 291 ເຮັກຕາ ແລະ ພືດຜັກອື່ນໆຈຳນວນໜຶ່ງ ເຊິ່ງຜົນເສຍຫາຍຍັງບໍ່ສາມາດປະເມີນຜົນໄດ້ ແລະ ປັດຈຸບັນລະດັບນໍ້າຍັງສືບຕໍ່ເພີ່ມຂຶ້ນ 2 ຊັງຕີແມັດຕໍ່ 3 ຊົ່ວໂມງ ສະເພາະຈຸດເຊື່ອມຕໍ່ບ້ານແສນດິນກັບເມືອງໄຊທານີ ແມ່ນລົດທຸກປະເພດບໍ່ສາມາດເຂົ້າໄດ້ ຄາດວ່າເຮືອນ ແລະ ເນື້ອທີ່ທຳການຜະລິດຈະຖືກນໍ້າຖ້ວມເພີ່ມອີກ.
ໂອກາດນີ້ ທ່ານເຈົ້າຄອງ ນວ ກໍ່ໄດ້ຍົກໃຫ້ເຫັນຈຸດອ່ອນທີ່ເປັນສາເຫດພາໃຫ້ນໍ້າຖ້ວມ ໂດຍສະເພາະ ການບໍລິຫານຈັດການນໍ້າຂອງບັນດາເຂື່ອນ ແລະ ການມີສະຕິຕໍ່ລະດັບນໍ້າທີ່ເພີ່ມຂຶ້ນ; ພ້ອມທັງໄດ້ເນັ້ນໃຫ້ທຸກພາກສ່ວນເພີ່ມທະວີມາດຕະການປ້ອງກັນຊີວິດ ແລະ ຊັບສິນຂອງພົນລະເມືອງ, ຮັບປະກັນໄດ້ຄວາມສະຫງົບ, ສົ່ງເຄື່ອງຊ່ວຍເຫຼືອ (ເຄື່ອງອຸປະໂພກ-ບໍລິໂພກ) ໃຫ້ພຽງພໍຕໍ່ຜູ້ທີ່ໄດ້ຮັບຜົນກະທົບ ແລະ ໃຫ້ຄົ້ນຄວ້າພາຫະນະ ເປັນຕົ້ນແມ່ນເຮືອໄປຊ່ວຍຈຸດທີ່ໄດ້ຮັບຜົນກະທົບໜັກກວ່າໝູ່. ນອກນີ້, ຂະແໜງການອື່ນໆກໍ່ຕ້ອງໄດ້ເອົາໃຈໃສ່ໄປຄຽງຄູ່ກັນເຊັ່ນ ຂະແໜງສາທາ ແລະ ການສຶກສາ ສຳລັບແຜນໄລຍະຍາວແມ່ນຕ້ອງສຳຫຼວດອອກແບບໂດຍໄວ ການສ້າງຄັນຄູປ້ອງກັນນໍ້າງື່ມ ເຂົ້າໃນແຜນ 5 ປີ ພ້ອມຊອກຫາແຫຼ່ງທຶນໃນການກໍ່ສ້າງ, ແຜນຜັງຈະຕ້ອງມີການສຳຫຼວດໃໝ່, ຈັດສັນພື້ນທີ່ທຳການຜະລິດທັງສອງຝັ່ງນໍ້າງື່ມ ແລະ ນໍ້າຂອງ.
ແຫລ່ງຂ່າວ: www.vientianemai.net