ວາລະສານເນເຈີຄອມມູນິເຄຊັນ ເຜີຍແຜ່ຜົນການສຶກສາຈາກງານວິໄຈທາງວິທະຍາສາດໃນປະຈຸບັນວ່າ ອາເມລິກາເຫນືອ, ເອີຣົບ ແລະ ຫລາຍພື້ນທີ່ໃນອາຊີ ມີຄວາມສ່ຽງໃນການເກີດສະພາວະອາກາດປ່ຽນແປງຮຸນແຮງທີ່ສຸດ ເພາະການປ່ອຍກ໊າສເຮືອນກະຈົກ. ຈາກການກະທຳຂອງມະນຸດເອງທີ່ໄປປິດກັ້ນກະແສລົມ ທີ່ພັດໄປທາງຕາເວັນອອກ ເຮັດໃຫ້ລະດູຮ້ອນຍືດເຍື້ອຍາວນານຂື້ນ ເຊັ່ນດຽວ ກັນກັບລະດູຝົນ ເຮັດໃຫ້ເກີດຄວາມປ່ຽນແປງຂອງສະພາບມວນອາກາດ ທັງຮ້ອນ, ແຫ້ງແລ້ງ, ໄຟປ່າ, ນໍ້າຖ້ວມ ໆລໆ.

ສະພາບອາກາດທີ່ຮຸນແຮງເຫລົ່ານີ້ແມ່ນສົ່ງຜົນກະທົບຕໍ່ການຜະລິດອາຫານແກ່ຄົນ ແລະ ສັດ, ຫລາຍພື້ນທີ່ເຫນືອເສັ້ນສູນສູດແມ່ນປະເຊີນກັບພາວະໂລກຮ້ອນແຮງໃນລະດູຮ້ອນນີ້ ແມ່ນແຕ່ບໍລິເວນວົງກົມອາກຕິກໃນເອີຣົບເຫນືອ ກໍມີອຸນຫະພູມສູງເຖີງ 30 ອົງສາແຊນ, ຄວາມແຕກຕ່າງລະຫວ່າງອຸນຫະພູມຂົ້ວໂລກເຫນືອທີ່ຫນາວເຢັນກັບພື້ນທີ່ດ້ານລຸ່ມທີ່ອຸ່ນກວ່າ ເປັນປັດໄຈຫລັກທີ່ເຮັດໃຫ້ເກີດກະແສລົມພັດໄຫລວຽນທົ່ວໂລກ. ແຕ່ເມື່ອຄວາມແຕກຕ່າງລົດລົງ ກະແສລົມແມ່ນພັດຊ້າລົງສົ່ງຜົນໃຫ້ຄວາມຮ້ອນ ຫລື ຝົນ ຍັງຄົງຢູ່ດົນຂື້ນ, ອຸນຫະພູມທີ່ສູງຂື້ນຍັງເຮັດໃຫ້ແຜ່ນນໍ້າກ້ອນ ແລະ ຫິມະ ບໍລິເວນຂົ້ວໂລກເຫນືອລະລາຍໄຫລລົງມາປົນເປື້ອນກັບນໍ້າ ແລະ ດິນ ຍີ່ງເພີ່ມການດູດຊັບຄວາມຮ້ອນ ແລະ ເຮັດໃຫ້ໂລກຮ້ອນຫລາຍຂື້ນ.

ນັກວິໄຈຍັງເຜີຍອີກວ່າ ລະດັບກາກບອນໃນອາກາດທີ່ເພີ່ມສູງຂື້ນຈາກພາວະໂລກຮ້ອນຈະສົ່ງຜົນໃຫ້ ພືດຜັກສຳລັບບໍລິໂພກເປັນອາຫານຫລັກເຊັ່ນ: ເຂົ້າ ແລະ ສາລີ ມີປະລິມານໂປຣຕິນຫລຸດຫນ້ອຍລົງ ຈະເຮັດໃຫ້ການຈະເລີນເຕີບໂຕຢຸດສະຫງັກ ແລະ ອາດຕ້ອງເສຍຊີວິດກ່ອນໄວອັນຄວນ.

ຜົນສຶກສາໂດຍຄະນະວິໄຈຈາກມະຫາວິທະຍາໄລ Harvard ລະບຸວ່າປະຊາກອນໂລກ 150 ລ້ານຄົນ ສ່ຽງທີ່ຈະເປັນໂລກຂາດໂປຣຕິນພາຍໃນປີ 2050. ເນື່ອງຈາກລະດັບກາກບອນທີ່ເພີ່ມສູງຂື້ນໃນອາກາດ ຈະດູດປະລິມານໂປຣຕິນໃນເຂົ້າບາເລ່ລົງ 14.6%, ໂປຣຕິນໃນເຂົ້າລົດລົງ 7.6%, ໃນເຂົ້າສາລີລົດລົງ 7.8% ແລະ ໃນມັນຝຣັ່ງລົດລົງ 6.4% ສົ່ງຜົນໃຫ້ປະຊາກອນໃນ 18 ປະເທດ ໄດ້ຮັບໂປຣຕິນຈາກອາຫານທີ່ຮັບປະທານຫນ້ອຍລົງໄປກວ່າ 5% ພາຍໃນປີ 2050.

ນອກຈາກນີ້ຍັງມີງານວິໄຈອື່ນທີ່ສະແດງໃຫ້ເຫັນວ່າ ປະລິມານກາກບອນ ແປຜັນກັບແຮ່ທາດທີ່ສຳຄັນໃນພືດເຊັ່ນ ເຫລັກ ແລະ ສັງກະສີ ເຮັດໃຫ້ເກີດຄວາມກັງວົນວ່າ ບັນຫາການຂາດສານອາຫານທົ່ວໂລກອາດຈະຮ້າຍແຮງຂື້ນໃນອະນາຄົດ.

ແຫລ່ງຂ່າວຕ່າງປະເທດ: TNA