ເຖິງແມ່ນວ່າກາເຟລາວເປັນທີ່ຕ້ອງການຂອງຕະຫຼາດ ແຕ່ຖືວ່າຍັງອ່ອນນ້ອຍຫຼາຍ ເມື່ອທຽບໃສ່ຜົນຜະລິດກາເຟ
ຜະລິດໄດ້ພຽງ 30.000 ກວ່າໂຕນຕໍ່ປີ ຫວຽດນາມຜະລິດໄດ້ 1,5 ລ້ານໂຕນ ໄທ 60.000 ໂຕນ ເຊິ່ງບັນຫາດັ່ງກ່າວ
ຮຽກຮ້ອງໃຫ້ມີການສະໜັບສະໜູນດ້ານທຶນຮອນກໍ່ຄືສິນເຊື່ອ ຂະນະທີ່ການສະໜອງທຶນນັ້ນ ຕ້ອງໃຫ້ສົມດູນໃນ
ແຕ່ລະຫົວໜ່ວຍທຸລະກິດ.
ທ່ານ ສີນຸກ ສີສົມບັດ ປະທານສະມາຄົມກາເຟລາວກ່າວ ໃນກອງປະຊຸມກ່ຽວກັບການສ້າງຄວາມພ້ອມ ໃນການເຂົ້າ
ປະຊາຄົມເສດຖະກິດອາຊຽນ ທີ່ຈັດຂຶ້ນໃນກາງເດືອນສິງຫາຜ່ານມາວ່າ: ກາລະໂອກາດໃນການແຂ່ງຂັນ ໄລຍະການ
ເຊື່ອມປະຊາຄົມເສດຖະກິດອາຊຽນຂອງກາເຟລາວແມ່ນມີຫຼາຍ ເນື່ອງຈາກຂະແໜງຂອງພວກເຮົາບໍ່ໄດ້ຕົກຢູ່ໃນ
ພາວະທີ່ອ່ອນແອ ອົງປະກອບດ້ານກາເຟລາວ ຢູ່ໃນສະພາບເຂັ້ມແຂງ ບໍ່ດ້ອຍໜ້າຕ່າງປະເທດ ຖ້າເວົ້າເຖິງການປຸງ
ແຕ່ງພວກເຮົາກໍ່ມີໂຮງງານປຸງແຕ່ງເຊັ່ນດຽວກັນ ຊາວສວນຂະໜາດນ້ອຍສາມາດຜະລິດກາເຟຄຸນະພາບ ສາມາດ
ຈຳໜ່າຍໃນລາຄາແພງທີ່ສຸດໃນຕະຫຼາດໂລກໄດ້ເຊັ່ນ: ຂາຍເຂົ້າຍີ່ປຸ່ນ ນອກຈາກນັ້ນ ປະເທດອ້ອມຂ້າງໄດ້ເຂົ້າມາຊື້
ກາເຟຈາກ ສປປ ລາວ ເຮົາ ນັບມື້ເພີ່ມຂຶ້ນ ບໍ່ວ່າຈະເປັນກາເຟດິບ ຂົ້ວ ແລະ ກາເຟສຳເລັດຮູບ ເຖິງແມ່ນວ່າຫວຽດ
ນາມ ເປັນປະເທດທີ່ຜະລິດກາເຟອັນດັບສອງຂອງໂລກ ແຕ່ຍັງນຳກາເຟຂຽວຈາກ ສປປ ລາວ ຫຼາຍກວ່າ 4.000
ໂຕນຕໍ່ປີ ໄທກໍ່ນຳເຂົ້າກາເຟຈາກລາວຈຳນວນໜຶ່ງເຊັ່ນດຽວກັນ ເນື່ອງຈາກວ່າ ລາວເຮົາຜະລິດກາເຟອາຣາບິກາ
ຫຼາຍກວ່າສອງເທົ່າທີ່ໄທຜະລິດ.
ແຕ່ທາງສະມາຄົມກາເຟລາວ ກໍ່ຍັງປະສົບກັບສິ່ງທ້າທາຍດ້ານຄວາມສາມາດ ໃນການຂະຫຍາຍທຸລະກິດ ເຊິ່ງການ
ສະໜອງທາງດ້ານທຶນຮອນເຊັ່ນ: ການປ່ອຍເງິນກູ້ຂອງທະນາຄານ ບໍ່ສະໝ່ຳສະເໝີ ບາງຫົວໜ່ວຍໄດ້ຫຼາຍໂພດ
ບາງຫົວໜ່ວຍໄດ້ໜ້ອຍ ຫຼື ບໍ່ໄດ້ເລີຍ ສ້າງຄວາມຫຍຸ້ງຍາກໃນການເຂົ້າເຖິງແຫຼ່ງທຶນ ພາໃຫ້ຕະຫຼາດບໍ່ມີຄວາມທ່ຽງ
ບັນຫາດັ່ງກ່າວນີ້ ພາກລັດຕ້ອງໄດ້ເອົາໃຈໃສ່ຕື່ມ ເນື່ອງຈາກຄວາມຕ້ອງການໃນການນຳໃຊ້ເຄື່ອງມືກົນຈັກ ເຂົ້າໃນ
ການຜະລິດຫຼາຍສົມຄວນ ດັ່ງນັ້ນ ຄວນສ້າງໂອກາດໃນການເຂົ້າເຖິງແຫຼ່ງທຶນຂອງຜູ້ປະກອບການໃຫ້ຫຼາຍຂຶ້ນ.
ເພື່ອສ້າງຄວາມເຂັ້ມແຂງໃຫ້ກັບກາເຟລາວ ທາງສະມາຄົມກາເຟລາວ ຈະໄດ້ຈັດບຸນມະໂຫລານກາເຟຂຶ້ນ ໃນເດືອນ
ຕຸລາ 2014 ທີ່ຈະມາເຖິງນີ້ ໂດຍມີເປົ້າໝາຍສ້າງຊື່ສຽງກາເຟລາວຢູ່ໃນສັງຄົມລາວ ໃຫ້ຄົນລາວມີຄວາມພູມໃຈສະ
ໜັບສະໜູນກາເຟລາວ ກາຍເປັນກຳແພງກັ້ນຜົນກະທົບທີ່ຈະເກີດຂຶ້ນກັບກາເຟລາວ ທັງຈະເປັນການເຕົ້າໂຮມ
ຜູ້ປະກອບການກາເຟທົ່ວປະເທດ ເຊື້ອເຊີນສະມາຄົມກາເຟອາຊຽນ ຕົ້ນຕໍ ຫວຽດນາມ ໄທ ອິນໂດເນເຊຍ ເຂົ້າຮ່ວມ.
ແຫຼ່ງຂ່າວ: ວຽງຈັນໃໝ່