ວັນທີ 29 ມີນາ 2018 ສໍານັກຂ່າວຕ່າງປະເທດລາຍງານວ່າເກີດເຫດກໍ່ຄວາມບໍ່ສະຫງົບໄຟໄຫມ້ໃນຫ້ອງຂັງຂອງສະຖານີຕຳຫລວດໃນເມືອງວາເລັນເຊຍ, ປະເທດເວເນຊູເອລາ ເປັນເຫດເຮັດໃຫ້ມີຜູ້ຕ້ອງຂັງເສຍຊີວິດຢ່າງຫນ້ອຍ 68 ສົບ. ຂະນະທີ່ຫົວຫນ້າໄອຍາການລັດ ກາຣາໂບໂບ ເຜີຍວ່າກຳລັງດຳເນີນການສືບສວນ-ສອບສວນຫາສາເຫດຂອງໂສກອະນາດຕະກຳຄັ້ງນີ້ໂດຍທັນທີ.
ຂ່າວແຈ້ງວ່າສາເຫດທີ່ເພີງໄຫມ້ໃນຫ້ອງຂັງຂອງສະຖານນີຕຳຫລວດແຫ່ງນີ້ ເກີດຂື້ນຫລັງຈາກຜູ້ຕ້ອງຂັງຫລາຍຄົນໄດ້ຈຸດໄຟເຜົາບ່ອນນອນ ເພື່ອພະຍາຍາມຫລົບຫນີອອກມາຈາກຫ້ອງຂັງ ແຕ່ວ່າໄຟໄດ້ລຸກລາມຢ່າງໄວວາ, ກວ່າທີ່ພະນັກງານດັບເພີງຈະສາມາດຄວບຄຸມເພີງໄດ້ ກຳເຮັດໃຫ້ 68 ຊີວິດຕ້ອງດັບສູນໄປແລ້ວ.
ທາງດ້ານບັນດາຍາດພີ່ນ້ອງຜູ້ຕ້ອງຂັງເມື່ອໄດ້ຮັບຮູ້ເຖີງຂ່າວຮ້າຍນີ້ຕ່າງກໍພາກັນມາຊຸມນຸມປະທ້ວງອ້ອມຮອບສະຖານີຕຳຫລວດດັ່ງກ່າວດ້ວຍຄວາມບໍ່ພໍໃຈເປັນຢ່າງຍີ່ງຕໍ່ກັບລະບົບການຮັກສາຄວາມປອດໄພຂອງຫ້ອງຄຸມຂັງ.
ແຫລ່ງຂ່າວຕ່າງປະເທດ: TRN