ໃນໂອກາດສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 65 ປີ ແລະ ປີໃໝ່ສາກົນ ຄສ 2014, ສະຫາຍ ພົນຕີ ແສງນວນ ໄຊຍະລາດ ເລຂາທິການສູນກາງພັກ, ລັດຖະມົນຕີຊ່ວຍວ່າການ ກະຊວງປ້ອງກັນປະເທດ ພ້ອມດ້ວຍຄະນະນຳຈາກບັນດາກົມໃຫຍ່ ແລະ ຫ້ອງວ່າການກະຊວງປ້ອງກັນປະເທດ ໄດ້ນຳເອົາກະຕ່າດອກໄມ້ ແລະ ກະຕ່າຂອງຂວັນ ເຂົ້າອວຍພອນສະຫາຍ ບຸນຍັງ ວໍລະຈິດ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ ໃນວັນທີ 8 ມັງກອນ 2014 ຢູ່ທີ່ຫ້ອງຮັບແຂກ ຫ້ອງວ່າການສູນກາງພັກ.
ສະຫາຍ ພົນຕີ ແສງນວນ ໄຊຍະລາດ ກ່າວວ່າ: ໃນທ່າມກາງທີ່ທົ່ວພັກ-ທົ່ວກອງທັບ ກຳລັງສ້າງຜົນງານສະເຫຼີມສະຫຼອງວັນສ້າງຕັ້ງກອງທັບ ຄົບຮອບ 65 ປີ ທີ່ໝູນວຽນມາບັນຈົບຄົບຮອບອີກວາລະໜຶ່ງນີ້, ຕາງໜ້າໃຫ້ການນຳກະຊວງປ້ອງກັນປະເທດ ຕະຫຼອດຮອດນາຍ ແລະ ພົນທະຫານທຸກເຫຼົ່າຮົບ ຂໍສະແດງຄວາມກະຕັນຍູ ແລະ ຮູ້ບຸນຄຸນຢ່າງສູງ ຕໍ່ສະຫາຍຮອງປະທານປະເທດແຫ່ງ ສປປ ລາວ ທີ່ຍາມໃດກໍເປັນດັ່ງຮົ່ມໂພຮົ່ມໄຊ ເປັນຜູ້ຊີ້ທິດເຍືອງທາງ ອົບຮົມບົ່ມສອນກຳລັງປ້ອງກັນຊາດ-ປ້ອງກັນຄວາມສະຫງົບ ເວົ້າສະເພາະໃນຖັນແຖວກອງທັບປະຊາຊົນລາວ ຕະຫຼອດໄລຍະທີ່ຜ່ານມາ ເຊິ່ງໄດ້ເຮັດໃຫ້ກອງທັບກາຍເປັນກອງທັບທີ່ມີຄວາມເຂັ້ມແຂງ ໜັກແໜ້ນ ແລະ ມີຄວາມທັນສະໄໝຂຶ້ນເລື້ອຍໆ. ນະໂອກາດ 65 ປີແຫ່ງວັນສ້າງຕັ້ງກອງທັບປະຊາຊົນລາວ ແລະ ໂອກາດປີໃໝ່ສາກົນ ຂໍອວຍໄຊໃຫ້ພອນອັນປະເສີດ ມາຍັງສະຫາຍຮອງປະທານປະເທດ ພ້ອມດ້ວຍຄອບຄົວ ຈົ່ງມີສຸຂະພາບເຂັ້ມແຂງ ສືບຕໍ່ນຳພາ ແລະ ເປັນເຂັມທິດເຍືອງທາງໃຫ້ຖັນແຖວກຳລັງປະກອບອາວຸດ ໃຫ້ກາຍເປັນກຳລັງທີ່ມີແບບແຜນທັນສະໄໝ.
ໂອກາດດຽວກັນ, ສະຫາຍ ບຸນຍັງ ວໍລະຈິດ ກໍໄດ້ສະແດງຄວາມຂອບໃຈຢ່າງສູງ, ພ້ອມທັງໄດ້ມີຄຳເຫັນ ໃຫ້ທິດຊີ້ນຳຕໍ່ການນຳກະຊວງປ້ອງກັນປະເທດ ໂດຍເນັ້ນໜັກໃຫ້ກອງທັບ ຈົ່ງພ້ອມກັນຮັກສາມູນເຊື້ອອັນດີງາມຂອງກອງທັບຕະຫຼອດຍ່ານທາງ 65 ປີຜ່ານມາ ຮັກສາມູນເຊື້ອສ້າງພະລາທິການກັບທີ່ ບົນພື້ນຖານເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບຂອງປະເທດໃຫ້ໜັກ ແໜ້ນ ຕິດພັນກັບການສ້າງສະໜາມສົງຄາມປະຊາຊົນ ກໍຄືການສ້າງໃຫ້ປະຊາຊົນພົນລະເມືອງລາວ ມີຄວາມຕື່ນຕົວຮັກຊາດຮັກລະບອບໃໝ່ ເຊື່ອໝັ້ນຕໍ່ແນວທາງນະໂຍບາຍຂອງພັກ, ເອົາໃຈໃສ່ຫັນລົງຮາກຖານ ຢູ່ໃນເຂດຊົນນະບົດຫ່າງໄກສອກຫຼີກ ນຳພາປະຊາຊົນສ້າງສາພັດທະນາ ສ້າງເສດຖະກິດ ເພື່ອແກ້ໄຂຊີວິດການເປັນຢູ່ຂອງປະຊາຊົນລາວບັນດາເຜົ່າ ໃຫ້ຫຼຸດພົ້ນຈາກຄວາມທຸກຍາກຫຼ້າຫຼັງ, ພ້ອມທັງສຸມໃສ່ວຽກງານກໍ່ສ້າງພັກ, ກໍ່ສ້າງພະນັກງານຢູ່ໃນຮາກຖານ ແລະ ກົມກອງໃຫ້ມີຄວາມຮູ້ຄວາມສາມາດ ເພື່ອພັດທະນາກຳລັງປະກອບອາວຸດ ໃນຖັນແຖວກອງທັບຂອງພວກເຮົາ ໃຫ້ນັບມື້ທັນສະໄໝຂຶ້ນເລື້ອຍໆ.
ທີ່ມາ http://www.vientianemai.net/teen/khao/1/10976