ໃນປີ 2013 ນະຄອນຫຼວງວຽງຈັນ ເກີດອຸປະຕິເຫດຂຶ້ນທັງໝົດ 1.520 ຄັ້ງ, ມີພາຫະນະເປ່ເພ 3.044 ຄັນ, ຄົນໄດ້ຮັບບາດເຈັບ 2.368 ຄົນ ແລະ ເສຍຊີວິດ 202 ຄົນ ລວມມູນຄ່າຄວາມເສຍຫາຍ 23.275.000.000 ກີບ. ຈາກອຸບັດຕິເຫດທີ່ເກີດຂຶ້ນທັງໝົດສາມາດຮວບຮວມ 10 ອຸບັດຕິເຫດທີ່ເກີດຂຶ້ນຮ້າຍແຮງທີ່ສຸດດັ່ງນີ້.
ອັນດັບ 10 ເກີດອຸບັດຕິເຫດ ລົດກະບະຮຸນໄຮ ເສຍຫຼັກ ແລ່ນຂ້າມເລນຕໍາລົດຈັກ ແລະ ມາຕໍາໃສ່ເຮືອນຄົນທີ່ກໍາລັງຈັດງານ ເຮັດໃຫ້ມີຜູ້ເສຍຊີວິດ 1 ຄົນ, ສາຫັດ 3 ຄົນ, ບາດເຈັບເລັກນ້ອຍ 1 ຄົນ ເຫດເກີດໃນວັນທີ 3 ມີນາ 2013 ເວລາປະມານ 24:00 ໂມງ ເຂດບ້ານບົວ ເມືອງນາຊາຍທອງ ແລະ ລົດກະບະຮຸນໄດ ຂີ່ມາດ້ວຍຄວາມໄວຂ້າມເລນໄດ້ໄປຕໍາເອົາລົດຈັກທີ່ຂີ່ສວນທາງມາ ແລະ ໄດ້ໄປຕໍາເອົາເຮືອນຂອງປະຊາຊົນ ເຮັດໃຫ້ມີຜູ້ເສຍຊີວິດ 1 ຄົນ, ໄດ້ຮັບບາດເຈັບສາຫັດ 1 ຄົນ ເກີດຂຶ້ນທີ່ຖະໜົນທ່າເດື່ອ ເຂດບ້ານຈອມເພັດ ເມືຶອງສີສັດຕະນາກ ໃນວັນທີ 7 ທັນວາ 2013 ເວລາ 16:30 ໂມງ.
ອັນດັບ 9; ອຸບັດຕິເຫດລົດຍົນປີ້ນເອງ ເຮັດໃຫ້ຜູ້ທີ່ຂັບຂີ່ມານໍາລົດຈໍານວນ 13 ຄົນ,ເສຍຊີວິດ 1 ຄົນ, ສາຫັດ 1 ຄົນ, ບາດເຈັບສົມຄວນ 4 ຄົນ ແລະ ບາດເຈັບເລັກນ້ອຍ 6 ຄົນ ແລະ ສາຫັດ 1 ຄົນ.ໃນວັນທີ 2 ກຸມພາ 2013 ເວລາ 13:00 ໂມງ ທີ່ບ້ານນາຊອນ ເມືອງປາກງຶ່ມ.
ອັນດັບ 8; ອຸບັດຕິເຫດລົດບັນທຸກຕໍາ ແລະ ຢຽບລົດຈັກເຮັດໃຫ້ມີຜູ້ເສຍຊີວິດ ໃນວັນທີ 19 ເມສາ 2013 ຢູ່ 4 ແຍກບ້ານດຸງ ເຮັດໃຫ້ຜູ້ເປັນເມຍຖືກລົດບັນທຸກຢຽບສົບມຸ່ນກະຈາຍ, ສໍາລັບຜູ້ເປັນຜົວໄດ້ຮັບບາດເຈັບສາຫັດ ແລະ ໃນວັນທີ 6 ທັນວາ 2013 ເກີດອຸບັດຕິເຫດລົດສິບລໍ້ ຕໍາລົດຈັກແລ້ວຢຽບຜູ້ເປັນເມຍທີ່ຊ້ອນທ້າຍເສຍຊີວິດຄາທີ່, ຜູ້ເປັນຜົວໄດ້ຮັບບາດເຈັບສາຫັດ ເຫດເກີດຢູ່ທາງແຍກບ້ານນາໄຫ ເມືອງຫາດຊາຍຟອງ.
ອັນດັບທີ 7; ລົດພວງບັນທຸກສິນຄ້າ ( ຄົນໄທ ) ຂັບຂີ່ດ້ວຍຄວາມໄວສູງ ມາຢຽບຜູ້ຂັບ ແລະ ຊ້ອນທ້າຍລົດຈັກ ເສຍຊີວິດຄາທີ່ 2 ຄົນ, ໃນວັນທີ 21 ກຸມພາ 2013 ເວລາ 10:30 ໂມງ ຢູ່ເສັ້ນທາງໂຄກສະອາດ-ຖະໜົນ 450 ປີ.
ອັນດັບ 6; ໄວລຸ້ນ 2 ຄົນ ແຂ່ງລົດຈັກກັນມາດ້ວຍຄວາມໄວສູງຕາມເສັ້ນທາງຕັດໃໝ່ ບ້ານທາດຂາວ ເມືອງສີສັດຕະນາກ ແຊງທ້າຍລົດກະບະຮຸນໄດບໍ່ຫວີດເລີຍຕໍາກັນເອງ ແລະ ຟົ້ງໄປຕໍາກັບລົດຈັກຂີ່ສວນທາງມາຢ່າງແຮງ ເຮັດໃຫ້ມີຜູ້ເສຍຊີວິດຄາທີ່ 2 ຄົນ ແລະ ສາຫັດ 2 ຄົນ ໃນວັນທີ 1 ເມສາ 2013 ເວລາ 20:44 ໂມງ.
ອັນດັບ 5; ລົດວີກະບະວິໂກ້ຕໍາລົດຈັກທີ່ຊ້ອນກັນມາ 3 ຄົນ ກໍາລັັງຂ້າມທາງ ເຮັດໃຫ້ມີຜູ້ເສຍຊີວິດຄາທີ່ 2 ຄົນ ແລະ ສາຫັດ 1 ຄົນ, ໃນວັນທີ 2 ທັນວາ 2013 ເວລາ 23:30 ໂມງ ຢູ່ຖະໜົນຊ້າງຄູ້-ດົງໂດກ ເຂດບ້ານຊ້າງຄູ້ ເມືອງໄຊທານີ ນະຄອນຫຼວງວຽງຈັນ.
ອັນດັບ 4; ລົດເບນກັບຈາກງານດອງ ຂັບຂີ່ໂດຍຍິງສາວ ອາຍຸ 18 ປີ, ຕໍາເຊິ່ງໜ້າກັບລົດຈັກທີ່ຍິງທັງສອງມີອາຍຸ 18 ປີ ຂີຊ້ອນທ້າຍກັນມາ ເສຍຊີວິດຄາທີ່ 2 ຄົນ, ເຫດການເກີດຂຶ້ນໃນວັນທີ 15 ທັນວາ 2013 ໃນເວລາ 23:00 ໂມງ ຖະໜົນ 13 ເໜືອ ເຂດບ້ານບົວ ເມືອງນາຊາຍທອງ.
ອັນດັບ 3; ລົດຮຸນໄດຕູ້ສະຕາແລັກກັບລົດກະບະຮຸນໄດຕໍາກັນແລ້ວຕໍາໃສ່ລົດຈັກທີ່ຂີ່ສວນທາງມາ ຈາກນັ້ນ ກໍຍັງໄປຕໍາໃສ່ເຮືອນຂອງປະຊາຊົນ, ເຮັດໃຫ້ຜູ້ທີ່ຂັບຂີ່ລົດຈັກ 2 ຄົນ ຊ້ອນກັນເສຍຊີວິດຄາທີ່ ແລະ ມີຄົນໄດ້ຮັບບາດເຈັບ ສາຫັດ 1 ຄົນ ໃນວັນທີ 20 ທັນວາ 2013 ເວລາປະມານ 19:00 ໂມງ ຢູ່ບ້ານທາງໂຄ້ງ ເມືອງປາກງຶ່ມ.
ອັນດັບ 2; ລົດກະບະແຫກໂຄ້ງປິ້ນເອງ ຢູ່ເສັ້ນທາງເລກທີ 13 ເໜືອ ເຂດບ້ານນາງ່າ ເມືອງນາຊາຍທອງເຮັດໃຫ້ຜູ້ທີ່ຂັບຂີ່ມານໍາລົດຈໍານວນ 6 ຄົນ, ເສຍຊີວິດ 2 ຄົນ, ສາຫັດ 3 ຄົນ ແລະ ບາດເຈັບເລັກນ້ອຍ 1 ຄົນໃນວັນທີ 2 ທັນວາ 2013 ເວລາ 19:30 ໂມງ.
ອັນດັບ 1; ເກີດເຫດລົດປີ້ນເອງຢູ່ເສັ້ນທາງເລກທີ 10 ເຂດບ້ານທົ່ງມັ່ງ ເມືອງໄຊທານີ ນະຄອນຫຼວງວຽງຈັນ ເຮັດໃຫ້ຜູ້ທີ່ຂັບຂີ່ມານໍາລົງຄັນດັ່ງກ່າວຈໍານວນ 4 ຄົນ, ເສຍຊີວິດ 3 ຄົນ ແລະ ບາດເຈັບເລັກນ້ອຍ 1 ຄົນ, ໃນວັນທີ 7 ມີນາ 2013 ເວລາ 10:30 ໂມງ.
ຂອບໃຈຂໍ້ມູນຈາກ: ໂທລະໂຄ່ງ THOLAKHONG