ຂປລ. ສປປ ລາວ ເປັນປະເທດໜຶ່ງທີ່ໄດ້ຮັບຜົນກະທົບຈາກລະເບີດບໍ່ທັນແຕກ ເຊິ່ງໃນຫລາຍປີຜ່ານມາ ມີຜູ້ໄດ້ຮັບເຄາະຮ້າຍບາດເຈັບ ແລະ ເສຍຊີວິດ ຈາກລະເບີດບໍ່ທັນແຕກເປັນຈໍານວນຫລາຍ, ສະເພາະປີ 2017 ນີ້ ໄດ້ມີຜູ້ຮັບເຄາະຮ້າຍຈາກລະເບີດບໍ່ທັນແຕກແລ້ວ 20 ກວ່າຄົນ. ສໍາລັບປີຜ່ານມາມີຜູ້ບາດເຈັບ ຫລື ເສຍຊີວິດແລ້ວເກືອບ 60 ຄົນ. ນັກວິຊາການໄດ້ຄາດວ່າ 30% ຂອງລະເບີດລູກຫວ່ານ ທັງໝົດ 270 ລ້ານໜ່ວຍທີ່ຖືກຖິ້ມລົງໃນດິນແດນລາວ ໄລຍະສົງຄາມອິນດູຈີນ ແມ່ນຍັງບໍ່ທັນແຕກປະມານ 80 ລ້ານໜ່ວຍ ແລະ ໄດ້ຢັ້ງຢາຍຢູ່ຕາມພື້ນທີ່ຕ່າງໆຂອງປະເທດ ເຊິ່ງຍັງເປັນໄພຂົ່ມຂູ່ ແລະ ກີດຂວາງຕໍ່ການພັດທະນາ ໃນ ສປປ ລາວ.
ໃນຂະນະທີ່ ສປປ ລາວ ກໍເປັນອີກປະເທດໜຶ່ງ ທີ່ໄດ້ລົງນາມໃນສົນທິສັນຍາ ວ່າດ້ວຍການເກືອດຫ້າມລະເບີດລູກຫວ່ານ ເຊິ່ງເປັນສົນທິສັນຍາສາກົນທີ່ຫ້າມການຜະລິດ, ການນໍາໃຊ້, ການຂົນສົ່ງ ແລະ ການສະສົມອາວຸດລະເບີດ. ຕະຫລອດໄລຍະ 20 ປີຜ່ານມາ ໂຄງການເກັບກູ້ລະເບີດແຫ່ງຊາດ ໄດ້ເກັບກູ້ລະເບີດບໍ່ທັນແຕກ ອອກຈາກເນື້ອທີ່ໄດ້ຫລາຍກວ່າ 61.000 ເຮັກຕາ ແລະ ທໍາລາຍລະເບີດບໍ່ທັນແຕກ ຊະນິດຕ່າງໆໄດ້ 1,8 ລ້ານໜ່ວຍ.
ໃນໂອກາດລະນຶກຄົບຮອບ 7 ປີ ຂອງວັນມີຜົນບັງຄັບໃຊ້ ສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ເຊິ່ງຈັດຂຶ້ນເມື່ອບໍ່ດົນມານີ້ ທີ່ນະຄອນຫລວງວຽງຈັນ, ທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ກ່າວວ່າ: ສປປ ລາວ ໄດ້ສະໜັບສະໜູນຢ່າງເຕັມສ່ວນ ໃນການຈັດຕັ້ງປະຕິບັດສົນທິສັນຍາ ໂດຍສະເພາະແມ່ນການສໍາຫລວດຊອກຫາລະເບີດບໍ່ທັນແຕກທີ່ຕົກຄ້າງ ໂດຍອີງໃສ່ຫລັກຖານຈາກການສໍາຫລວດ ຢັ້ງຢືນພື້ນທີ່ນັ້ນບໍ່ມີລະເບີດບໍ່ທັນແຕກຕົກຄ້າງແລ້ວ ຈຶ່ງອານຸຍາດໃຫ້ປະຊາຊົນ ໄດ້ນໍາໃຊ້ດິນຂອງເຂົ້າເຈົ້າຢ່າງມີຄຸນນະພາບ ແລະ ໄດ້ຮັບຜົນປະໂຫຍດສູງສຸດ.
ຜ່ານມາລັດຖະບານລາວ ແລະ ອົງການສະຫະປະຊາຊາດ ເພື່ອການພັດທະນາ ໄດ້ມີການລົງນາມໃສ່ແຜນປະຕິບັດງານໃໝ່ ເພື່ອແກ້ໄຂບັນຫາລະເບີດບໍ່ທັນແຕກ ເພື່ອເປັນພື້ນຖານສໍາຄັນ ໃຫ້ ສປປ ລາວ ໃນການກ້າວສູ່ການບັນລຸເປົ້າໝາຍການພັດທະນາແບບຍືນຍົງ ໃຫ້ສໍາເລັດພາຍໃນປີ 2030.
ແຫລ່ງຂ່າວ: ຂປລ