ສັງຄົມຍັງຄົງລໍຄອຍການແກ້ໄຂສະພາບການຈະລາຈອນຕິດຂັດຢູ່ບໍລິເວນເສັ້ນທາງເຂດໜ້າຕະຫຼາດທາດຫຼວງ (ຊົ່ວຄາວ) ໃກ້ຂົວບຶງທາດຫຼວງ ເຊິ່ງມີສະພາບແອອັດ ຍັດແຫຽ້ໃນເວລາຕອນເຊົ້າ ຮວມເຖິງຊົ່ວໂມງເລັ່ງດ່ວນ (ເຂົ້າການແລະເລີກການ) ຍິ່ງໃນຍາມທີ່ຊາວຄ້າຂາຍພວມຫຼັ່ງໄຫຼເຂົ້າອອກຕະຫຼາດ ຍິ່ງເຮັດໃຫ້ສະພາບການສັນຈອນໃກ້ບໍລິເວນຂົວຕິດຂັດເປັນໄລຍະຍາວ ຕໍ່ໜ້າບັນຫາດັ່ງກ່າວ ທາງການນໍາເມືອງໄຊເຊດຖາ ໃນນາມຜູ້ປົກຄອງທ້ອງຖິ່ນກໍຍອມຮັບວ່າ ໄດ້ມີການເຈລະຈາກັບເຈົ້າຂອງຕະຫຼາດ ແລະ ຊາວຄ້າຂາຍຫຼາຍເທື່ອແລ້ວ ໂດຍອີງໃສ່ສັນຍາໃນເບື້ອງຕົ້ນ ເຊິ່ງມາຮອດປັດຈຸບັນກໍຢູ່ໃນຂັ້ນຕອນຂໍທິດຊີ້ນໍາຈາກຂັ້ນເທິງກໍຄືນະຄອນຫຼວງວຽງຈັນ ໃນການດໍາເນີນມາດຕະການຕາມທາງຄວນ.
ທ່ານ ຖະໜອມ ທໍາທອງ ເລຂາພັກເມືອງ ເຈົ້າເມືອງໆໄຊເຊດຖາ ໄດ້ໃຫ້ສໍາພາດຕໍ່ຜູ້ສື່ຂ່າວໃນວັນທີ 25 ສິງຫາ 2016 ວ່າ ອີງຕາມສັນຍາວ່າດ້ວຍການສ້າງຕະຫຼາດທາດຫຼວງຊົ່ວຄາວ ພາຍໃນໄລຍະເວລາສອງປີ ແຕ່ທັງນີ້ແມ່ນເກີນເລີຍມາເຖິງ 6 ປີແລ້ວ (ສັນຍາເບື້ອງຕົ້ນແມ່ນເລີ່ມແຕ່ວັນທີ 27 ພຶດສະພາ 2010) ແຕ່ວ່າມາຮອດປັດຈຸບັນກໍຍັງມີການສືບຕໍ່ຊື້-ຂາຍ ອັນໄດ້ກໍໃຫ້ເກີດຫາງສຽງສັງຄົມຕາມມາ ເປັນຕົ້ນກໍແມ່ນສະພາບການສັນຈອນທີ່ນັບວັນຍິ່ງຕິດຂັດດັ່ງທີ່ເຫັນ.
ທັງນີ້ ທາງນະຄອນຫຼວງວຽງຈັນ ກໍໄດ້ມີການປຶກສາຫາລືກ່ຽວກັບມະຕິຕົກລົງຂອງອົງການປົກຄອງນະຄອນຫຼວງ ເມື່ອເດືອນມິຖຸນາ 2015 ວ່າດ້ວຍການຍ້າຍອອກຕະຫຼາດທາດຫຼວງຊົ່ວຄາວໃຫ້ສໍາເລັດພາຍໃນວັນທີ 23 ສິງຫາ 2016 ແຕ່ມາຮອດປັດຈຸບັນ ທາງຜູ້ປະກອບການຕະຫຼາດ ແລະ ຊາວຄ້າ-ຂາຍຈໍານວນນຶ່ງຍັງບໍ່ປະຕິບັດຕາມຂໍ້ຕົກລົງວາງອອກ ເຊິ່ງອົງການປົກຄອງເມືອງພວມນໍາບັນຫາດັ່ງກ່າວສະເໜີຕໍ່ອົງການປົກຄອງນະຄອນຫຼວງວຽງຈັນ ເພື່ອຫາມາດຕະການແກ້ໄຂໃນຂັ້ນຕໍ່ໄປ ຂະນະທີ່ສະພາບການພັດທະນາເສດຖະກິດ-ສັງຄົມຂອງເມືອງໄຊເຊດຖາ ກໍຄືຂອງນະຄອນຫຼວງວຽງຈັນ ກໍຕ້ອງໄດ້ດໍາເນີນການອີກຫຼາຍຢ່າງໃນຫຼາຍຈຸດ ແນໃສ່ພັດທະນາເສັ້ນທາງລຽບບຶງທາດທາດຫຼວງ ຂະໜານກັບເສັ້ນທາງເລກທີ 13 ໃຕ້ ເພື່ອລະບາຍລົດທີ່ແອອັດ ອີກບັນຫານຶ່ງກໍແມ່ນບັນຫາການຈອດລົດໃນຈຸດໜ້າຕະຫຼາດທາດຫຼວງຊົ່ວຄາວ ເຊິ່ງຖືເປັນເລື່ອງຈໍາເປັນ ເຄັ່ງຮ້ອນທີ່ສັງຄົມສ່ວນໃຫຽ່ໄດ້ຈົ່ມວ່າ ຫຼື ຕໍານິວິຈານ.
ຢ່າງໃດກໍດີ ປັດຈຸບັນແມ່ນໄດ້ມີການແຕ່ງຕັ້ງຄະນະກໍາມະການຂັ້ນເມືອງໃນການຈັດສັນ ຍົກຍ້າຍຕະຫຼາດທາດຫຼວງຊົ່ວຄາວ ໂດຍສົມທົບກັບພະແນກອຸດສາຫະກໍາ ແລະ ການຄ້ານະຄອນຫຼວງວຽງຈັນ ກໍໄດ້ເຄີຍເຊີນເອົາຊາວຄ້າຂາຍຫຼາຍກວ່າ 400 ຮ້ານ ແລະ ຜູ້ປະກອບການ (ເຈົ້າຂອງຕະຫຼາດ) ມາສົນທະນາຫາທາງອອກ ແລະ ໄດ້ເຮັດສັນຍາຕາມລະບຽບການ ແຕ່ມາເຖິງປັດຈຸບັນກໍຍັງເຫັນວ່າ ບໍ່ທັນມີການປະຕິບັດຕາມສັນຍາທີ່ລະບຸໄວ້ຊ້ອງໜ້າຫຼາຍຝ່າຍ.
ເພື່ອຮອງຮັບຊາວຄ້າຂາຍນັ້ນ ກໍໄດ້ມີການສ້າງຕັ້ງຕະຫຼາດໃໝ່ເຊັ່ນ ຕະຫຼາດໂນນຄໍ້ ແລະ ຕະຫຼາດໄຮຄໍາ ທີ່ສາມາດເຊື່ອມຕໍ່ຫຼາຍເສັ້ນທາງ ເຊິ່ງການສັນຈອນກໍສະດວກສະບາຍແລ້ວ ພ້ອມນັ້ນ ກໍມີຕະຫຼາດສົດໃໝ່ເຊັ່ນ ຕະຫຼາດອົດຊີ ນັບທັງຕະຫຼາດອື່ນໆ ເຊິ່ງຜູ້ຄ້າຂາຍສາມາດເລືອກເປັນແຫຼ່ງຊື້-ຂາຍໄດ້ ທັງນີ້ ເຈົ້າເມືອງໄຊເຊດຖາ ກໍໄດ້ຮຽກຮ້ອງຜ່ານສື່ໄປເຖິງຊາວຄ້າຂາຍໃນຕະຫຼາດທາດຫຼວງຊົ່ວຄາວຈົ່ງຍຶດຖືລະບຽບ ກົດໝາຍເປັນສໍາຄັນ ແລະ ເຫັນແກ່ປະໂຫຽດສ່ວນຮວມ ເພື່ອຮ່ວມກັນແກ້ໄຂ ຫຼຸດຜ່ອນບັນຫາສັງຄົມ ໂດຍສະເພາະແມ່ນຄວາມບໍ່ເປັນລະບຽບຮຽບຮ້ອຍ ຄວາມສັບສົນວຸ້ນວາຍໃນການສັນຈອນຢູ່ບໍລິເວນຕະຫຼາດທາດຫຼວງຊົ່ວຄາວ ເພື່ອກ້າວໄປສູ່ການພັດທະນາທີ່ຍືນຍົງ.
ຂ່າວ/ພາບ: ເທບພະວົງ
ຕິດຕາມເຮາທາງFacebook ກົດຖືກໃຈເລີຍ!