ໃນຕອນບ່າຍວັນທີ 14 ມັງກອນ 2014 ນີ້ ທ່ານນາງ ບຸນເພັງ ມູນໂພໄຊ ລັດຖະມົນຕີປະຈຳຫ້ອງວ່າການລັດຖະບານ ໂຄສົກລັດຖະບານ ໄດ້ຖະແຫຼງກ່ຽວກັບຜົນສຳເລັດ ຂອງກອງປະຊຸມລັດຖະບານປະຈຳເດືອນທັນວາ 2013 ທີ່ໄດ້ຈັດຂຶ້ນໃນວັນທີ 13-14 ມັງກອນ 2014 ໂດຍການເປັນປະທານຂອງທ່ານ ທອງສິງ ທຳມະວົງ ນາຍົກລັດຖະມົນຕີ ມີບັນດາຮອງນາຍົກລັດຖະມົນຕີ ແລະ ສະມາຊິກລັດຖະບານເຂົ້າຮ່ວມ.
ໃນວາລະດຳເນີນເປັນເວລາ 2 ວັນນັ້ນ ກອງປະຊຸມໄດ້ຄົ້ນຄວ້າປຶກສາຫາລື ແລະ ເຫັນດີດ້ານຫຼັກການຮັບຮອງບັນຫາສຳຄັນຈຳນວນໜຶ່ງ ເປັນຕົ້ນ ກອງປະຊຸມໄດ້ຜ່ານບົດລາຍງານ ການກະກຽມກອງປະຊຸມວຽກງານຍຸຕິທຳ ລາວ-ຫວຽດນາມ 10 ແຂວງທີ່ມີຊາຍແດນຕິດຈອດກັນ ຜ່ານບົດລາຍງານກ່ຽວກັບການຈັດຕັ້ງປະຕິບັດ ການຮ່ວມມືດ້ານເສດຖະກິດ-ເຕັກນິກ ລາວ-ຈີນ ໄລຍະ 1 ປີຜ່ານມາ ບົດລາຍງານກ່ຽວກັບການຄຸ້ມຄອງ ການນຳໃຊ້ລະບົບເຄືອຂ່າຍສື່ສານເອເລັກໂຕຼນິກ (ສື່ສານສັງຄົມອອນລາຍ) ໂດຍນຳໃຊ້ເຕັກໂນໂລຊີຂອງເວັບໄຊ ແລະ ເຕັກໂນໂລຊີມືຖືໃນການສ້າງ-ເຜີຍແຜ່ ແລກປ່ຽນ ແລະ ເຂົ້າເຖິງຂໍ້ມູນຂ່າວສານຕ່າງໆໄດ້ຢ່າງວ່ອງໄວ ດ້ວຍຄຸນລັກສະນະ ແລະ ຄວາມສາມາດຂອງລະບົບດັ່ງກ່າວ ຈຶ່ງເຮັດໃຫ້ມີການນຳໃຊ້ຫຼາຍ ຈຳນວນກໍເພີ່ມຂຶ້ນຢ່າງໄວວາ ຊຶ່ງຈຳນວນຜູ້ໃຊ້ນັ້ນ ມີທັງຜູ້ທີ່ມີເຈຕະນາດີ ແລະ ເຈຕະນາບໍ່ດີ ຈຶ່ງເກີດມີທັງດ້ານດີ ແລະ ດ້ານຫຍໍ້ທໍ້ໃນສັງຄົມລາວປັດຈຸບັນ ສະນັ້ນ ໃນສະເພາະໜ້ານີ້ ໃຫ້ກະຊວງກ່ຽວຂ້ອງກວດກາຄືນ ບັນດານິຕິກຳຕ່າງໆທີ່ພົວພັນກັບບັນຫານີ້ ແລະ ເຂັ້ມງວດໃນການກວດກາ ແລະ ຕອບຕ້ານດ້ວຍວິທີການຕ່າງໆໃຫ້ທັນການ ພ້ອມດຽວກັນນັ້ນ ກໍໃຫ້ເອົາໃຈໃສ່ໂຄສະນາເຜີຍແຜ່ ສ້າງຈິດສຳນຶກ ແລະ ໃຫ້ການສຶກສາແກ່ສັງຄົມ ໂດຍສະເພາະ ນັກຮຽນ ແລະ ຊາວໜຸ່ມກ່ຽວກັບຜົນດີ ແລະ ຜົນກະທົບດ້ານລົບຂອງການນຳໃຊ້ສື່ສານດັ່ງກ່າວ ໂດຍເລີ່ມຈາກຄອບຄົວ ໂຮງຮຽນ ແລະ ອື່ນໆ ກອງປະຊຸມເຫັນດີດ້ານຫຼັກການ ຮັບຮອງຮ່າງຍຸດທະສາດການພັດທະນາກາເຟລາວ ຮອດປີ 2025 ຮ່າງຍຸດທະສາດດັ່ງກ່າວແມ່ນເລັ່ງໃສ່ 4 ເປົ້າໝາຍ ແລະ 6 ມາດຕະການຄື: ການພັດທະນາການຜະລິດ ການປັບປຸງຄຸນນະພາບ ແລະ ຕະຫຼາດ ການສົ່ງເສີມໂຄສະນາການນຳໃຊ້ທີ່ດີ ການປັບປຸງສິ່ງແວດລ້ອມທຸລະກິດ ການສ້າງຄວາມເຂັ້ມແຂງດ້ານຄວາມສາມາດ ໃນການຄຸ້ມຄອງຂອງສະຖາບັນ ແລະ ອົງການຈັດຕັ້ງຄຸ້ມຄອງການຜະລິດກາເຟ ທັງໝົດນີ້ ເພື່ອເຮັດໃຫ້ກາເຟລາວ ສາມາດຫັນໄປສູ່ຄຸນນະພາບ ແລະ ເປັນມິດຕໍ່ສິ່ງແວດລ້ອມ ສ້າງແຫຼ່ງລາຍຮັບທີ່ດີ ແລະ ໝັ້ນຄົງໃຫ້ແກ່ຜູ້ຜະລິດທຸກຂັ້ນ ລວມທັງສ້າງເງື່ອນໄຂເອື້ອອຳນວຍຄວາມສະດວກໃຫ້ພາກເອກະຊົນ ຜູ້ທີ່ມີສ່ວນຮ່ວມ ທັງເປັນການປະກອບສ່ວນທີ່ສຳຄັນ ເຮັດໃຫ້ການພັດທະນາເສຖະກິດ-ສັງຄົມແຫ່ງຊາດ ຂະຫຍາຍຕົວຢ່າງບໍ່ຢຸດຢັ້ງ ພ້ອມທັງຜ່ານຮ່າງດຳລັດວ່າດ້ວຍໂຮງໝໍເອກະຊົນສະບັບປັບປຸງ ຊຶ່ງດຳລັດດັ່ງກ່າວ ຕ້ອງໄດ້ກຳນົດແຈ້ງກ່ຽວກັບນະໂຍບາຍດ້ານຕ່າງໆຢ່າງເໝາະສົມ ເພື່ອສາມາດດຶງດູດການລົງທຶນໃນດ້ານນີ້ ໃນປັດຈຸບັນ ແລະ ອະນາຄົດ ສຳລັບຮ່າງນະໂຍບາຍວ່າດ້ວຍການເຝົ້າລະວັງ ແລະ ຄວບຄຸມພະຍາດຕິດຕໍ່ ດ້ານຫຼັກການ ກອງປະຊຸມເຫັນດີຮັບຮອງ ເພາະວ່າຮ່າງນະໂຍບາຍດັ່ງກ່າວນີ້ ແມ່ນມີຄວາມສຳຄັນ ເພື່ອສະກັດກັ້ນ ແລະ ຄວບຄຸມແຕ່ຫົວທີບໍ່ໃຫ້ພະຍາດແຜ່ລະບາດ ແລະ ຂະຫຍາຍວົງກວ້າງ ຈຳກັດໄດ້ການເຈັບ ແລະ ຕາຍຂອງປະຊາຊົນບັນດາເຜົ່າ ທັງເປັນການສົ່ງເສີມໃຫ້ປະຊາຊົນມີສ່ວນຮ່ວມໃນການເຝົ້າລະວັງ ແລະ ຕອບຕ້ານຕໍ່ການລະບາດຂອງພະຍາດ ສົ່ງເສີມຢ່າງເປັນເຈົ້າການຂອງຂະແໜງສາທາລະນະສຸກ ໃນການຮ່ວມມື ແລະ ປະສານງານກັບອົງການຈັດຕັ້ງສາກົນ ພາກພື້ນ ແລະ ປະເທດໃກ້ຄຽງ ກອງປະຊຸມເຫັນດີຕໍ່ການປັບປຸງບາງມາດຕາ ຂອງດຳລັດວ່າດ້ວຍການຄຸ້ມຄອງ ແລະ ການປົກປ້ອງການເຄື່ອນໄຫວສາສະໜາຢູ່ ສປປ ລາວ ດຳລັດສະບັບເກົ່າປະກາດໃຊ້ໄດ້ 10 ກວ່າປີແລ້ວນັ້ນ ມີບາງມາດຕາ ບໍ່ສອດຄ່ອງກັບລະດັບການເຕີບໃຫຍ່ຂະຫຍາຍຕົວ ທາງດ້ານເສດຖະກິດ-ສັງຄົມໃນປັດຈຸບັນ ສະນັ້ນ ເພື່ອໃຫ້ດຳລັດດັ່ງກ່າວມີເນື້ອໃນຄົບຖ້ວນ ຮັດກຸມ ແລະ ສອດຄ່ອງກັບສະພາບຕົວຈິງ ແລະ ເພື່ອເຮັດໃຫ້ການຄຸ້ມຄອງ ການເຄື່ອນໄຫວສາສະໜາ ມີຄວາມເປັນເອກະພາບໃນຂອບເຂດທົ່ວປະເທດ ຮັບປະກັນສິດໃນການເຊື່ອຖື ຫຼື ບໍ່ເຊື່ອຖືສາສະໜາຂອງພົນລະເມືອງລາວ ທີ່ໄດ້ກຳນົດໄວ້ໃນລັດຖະທຳມະນູນແຫ່ງ ສປປ ລາວ.