ເພື່ອອັດການຮົ່ວໄຫລຂອງລາຍຮັບ, ຄຽງຄູ່ກັບການສ້າງຖານເສດຖະກິດໃຫ້ເຕີບໃຫຍ່ເຂັ້ມແຂງພ້ອມໆກັບການ ຂະຫຍາຍຕົວຂອງສັງຄົມ; ອົງການກວດສອບແຫ່ງລັດເນັ້ນຢາກໃຫ້ທຸກພາກສ່ວນທີ່ກ່ຽວຂ້ອງໃຫ້ ຄວາມຮ່ວມມືອຳນວຍຄວາມສະດວກຕໍ່ວຽກງານກວດສອບ, ສ້າງຄວາມໂປ່ງໃສຕໍ່ສັງຄົມ ໂດຍຜ່ານມາຍັງມີ 5 ຂໍ້ທີ່ຄົງຄ້າງທີ່ຫລາຍຝ່າຍຕ້ອງມີສ່ວນຮ່ວມຫາທາງແກ້.
ໃນມື້ເປີດກອງປະຊຸມສະໄຫມສາມັນເທື່ອທີ 6 ຂອງສະພາແຫ່ງຊາດຊຸດທີ 7, ເມື່ອວັນທີ 9 ທັນວາຜ່ານມາ ທ່ານ ດຣ. ນາງ ວຽງທອງ ສີພັນດອນ ປະທານອົງການກວດສອບແຫ່ງລັດໄດ້ຜ່ານບົດສະຫລຸບຕໍ່ທີ່ປະຊຸມໃຫ້ ຮູ້ວ່າ: ການຈັດຕັ້ງປະຕິບັດລາຍຮັບງົບປະມານຂາດຕົວສົກປີ 20112012 ຈາກແຜນການ 15.763,53 ຕື້ກີບປະຕິບັດໄດ້ 17.263,23 ຕື້ກີບ ໂດຍລາຍຮັບຈາກສ່ວຍສາອາກອນຄອງຕົວເລກລາຍຮັບສູງກວ່າລາຍຮັບ ອື່ນໆ ຂະນະດຽວກັນ, ລວມຍອດຜະລິດຕະພັນພາຍໃນ (GDP) ຂະຫຍາຍຕົວ 8,30 ເປີເຊັນ, ໃນນັ້ນ, ຂະແຫນງກະສິກຳປ່າໄມ້ເພີ່ມຂຶ້ນ 2,80 ເປີເຊັນ, ຂະແຫນງອຸດສາຫະກຳເພີ່ມຂຶ້ນ 14,40 ເປີເຊັນ ແລະ ຂະແຫນງການບໍລິການເພີ່ມຂຶ້ນ 8,10 ເປີເຊັນ.
ຄຽງຄູ່ກັບທ່າຂະຫຍາຍຕົວຂອງຍອດລາຍຮັບດັ່ງກ່າວ, ທາງອົງການກວດສອບແຫ່ງລັດຍັງໄດ້ຊີ້ແຈງກ່ຽວກັບລາຍຈ່າຍ ໂດຍສະເພາະລາຍຈ່າຍນອກແຜນ, ທ່ານປະທານອົງການກວດ ສອບແຫ່ງລັດກ່າວວ່າ: ນອກຈາກລາຍຈ່າຍງົບປະມານແຫ່ງລັດທີ່ໄດ້ສະຫລຸບຂາດຕົວແລ້ວ, ອົງການກວດສອບແຫ່ງລັດໄດ້ກວດສອບເຫັນລາຍຈ່າຍງົບປະມານແຫ່ງລັດ ຕື່ມອີກທີ່ບໍ່ນອນໃນແຜນສະພາແຫ່ງຊາດຮັບຮອງຈຳນວນ 4.242,72 ຕື້ກີບ ໃນນັ້ນ ໄດ້ເອົາລາຍຮັບທີ່ກວດເຫັນຈຳນວນ 437,42 ຕື້ກີບ ໄປຈ່າຍເຂົ້າໃນວຽກງານບໍລິຫານ, ຊຳລະໂຄງການລົງທຶນ, ຊຳລະເງິນກູ້ຢືມທະນາຄານ ແລະ ຈັດຊື້ພາຫະນະ; ຈ່າຍໂຄງການກໍ່ສ້າງພື້ນຖານໂຄງລ່າງທີ່ບໍ່ນອນໃນແຜນສະພາແຫ່ງຊາດ ຮັບຮອງມີ 124 ໂຄງການ ມູນຄ່າປະຕິບັດ 1.551,16 ຕື້ກີບ; ລາຍຈ່າຍຫນີ້ສິນທີ່ມີສ່ວນຫລຸດໃຫ້ບັນດາບໍລິສັດຈຳນວນ 2.254,14 ຕື້ກີບ.
ແນວໃດກໍ່ຕາມ, ທ່ານ ດຣ. ນາງ ວຽງທອງ ສີພັນດອນ ປະທານອົງການກວດສອບແຫ່ງລັດຍັງເປີດເຜີຍ 5 ຂໍ້ຄົງຄ້າງເພື່ອຫາທາງແກ້ໄຂວ່າ: ຜ່ານມາຍັງມີຫົວຫນ່ວຍງົບປະມານທີ່ຖືກກວດສອບທີ່ລະເມີດວິໄນ ແຜນການວິໄນການເງິນ ແລະ ຖືເບົາຕໍ່ການປັບປຸງແກ້ໄຂຂໍ້ຄົງຄ້າງຂອງຂະແຫນງການຕົນເຊັ່ນ:
ການຖືບັນຊີບໍ່ເອກະພາບ, ບໍ່ຄົບຖ້ວນຕາມກົດຫມາຍໄດ້ກຳນົດໄວ້
ການນຳໃຊ້ເງິນລາຍຮັບວິຊາການ, ເງິນກອງທຶນ, ລາຍຮັບຈາກຊັບສິນ, ລາຍຮັບຈາກການລະດົມທຶນ, ເງິນປະກອບສ່ວນຂອງພາກເອກະຊົນ, ເງິນກູ້ຢືມທະນາຄານ, ການເປີດບັນຊີເງິນຝາກຢູ່ທະນາຄານທຸລະກິດ, ການຄຸ້ມຄອງຊັບສິນລັດຍັງບໍ່ປະຕິບັດຕາມລະບຽບຫລັກການ ແລະ ຂັ້ນຕອນຂອງກົດຫມາຍ
ທະນາຄານລັດຍັງສືບຕໍ່ປ່ອຍເງິນກູ້ນອກເປົ້າຫມາຍການປະສານງານຂອງ ບັນດາຫົວຫນ່ວຍງົບປະມານຂັ້ນສູນກາງ ແລະ ວິສາຫະກິດລັດຈຳນວນຫນຶ່ງຍັງຖືເບົາຕໍ່ການດຳເນີນການກວດສອບຂອງ ຄະນະກວດສອບແຫ່ງລັດເປັນຕົ້ນ ການສະຫນອງຂໍ້ມູນ ແລະ ເອກະສານຕ່າງໆ
ການນຳໃຊ້ເງິນລາຍຮັບວິຊາການ, ເງິນຂາຍໄມ້, ເງິນກອງທຶນ, ຊັບພະຍາກອນ ແລະ ຄັງພັດທະນາທີ່ບໍ່ຖືກຕ້ອງຕາມລະບຽບການໃນສົກປີ 20112012 ມີທ່າອຽງເພີ່ມຂຶ້ນ ແລະ ຍັງເປັນບັນຫາເກົ່າ.
ຕໍ່ກັບບົດລາຍງານດັ່ງກ່າວທ່ານປະທານສະພາກໍ່ໄດ້ມີບົດເຈາະຈີ້ມ ທີ່ປະຊຸມໃນວັນຕໍ່ມາເພື່ອຫາຂໍ້ສະຫລຸບ ແລະ ວິທີການແກ້ໄຂຢ່າງເປັນເອກະພາບກັນ.
ຂ່າວຈາກ : ໜັງສືພິມ ເສດຖະກິດ-ສັງຄົມ