ເລີ່ມຕົ້ນອາທິດທຳອິດຂອງເດືອນ ມັງກອນ 2017 ໃນຄໍລຳ ວັນນະກຳ ເຮົາຈະມາເປີດສາກຕ້ອນຮັບປີໃໝ່ດ້ວຍເລື່ອງເລົ່າປະເພດຂົນຫົວລຸກ ເຊິ່ງເລື່ອງທີ່ແອັດມິນຈະນຳມາເລົ່າສູ່ຟັງນັ້ນອາດເປັນເລື່ອງມາຈາກຊີວິດຈິງ ຫຼື ເປັນເລື່ອງທີ່ແຕ່ງຂຶ້ນ ແຕ່ສິ່ງສຳຄັນຄື ໃນໜຶ່ງອາທິດເຮົາຈະມາຟັງເລື່ອງ “ສະຫຍອງຂັວນ” ທັງອາທິດເຕັມໆ.
ສຳລັບຂາປະຈຳທີ່ມັກອ່ານປະເພດນິຍາຍຮັກ ຕ້ອງອົດໃຈລໍກັນກ່ອນເດີ້ ເອົາເປັນວ່າເຮົາບໍ່ເວົ້າຫຍັງຫຼາຍເຮົາມາເຂົ້າເລື່ອງກັນເລີຍ
ມີຜູ້ຊາຍຄົນໜຶ່ງອາໃສຢູ່ກັບແຟນສາວໃນຫ້ອງເຊົ່າທີ່ຢູ່ຊັ້ນສາມຂອງອາພາດເມັ້ນແຫ່ງໜຶ່ງ ທັງສອງຄົນມັກມີປາກສຽງຜິດຖຽງກັນເປັນປະຈຳ ມີເທື່ອໜຶ່ງທັງສອງໄດ້ຜິດກັນຢ່າງຮຸນແຮງຈົນເຖິງຂັ້ນຝ່າຍຊາຍລົງມືຕົບຕີ ຝ່າຍຍິງເກີດຄວາມຄຽດ ແລະ ຕ່ຳຄ້ອຍນ້ອຍໃຈໃຫ້ຝ່າຍຊາຍຫຼາຍຈົນຄິດສັ້ນນາງໄດ້ໂດດລົງມາຈາກລະບຽງຫ້ອງທີ່ຢູ່ຊັ້ນສາມຮ່າງຂອງນາງຕົກລົງມາກະທົບກັບພື້ນຊີມັງຈົນເສຍຊີວິດຄາທີ່ ຫຼັງຈາກສຳເລັດການເຮັດພິທີກຳທາງສາສະໜາແລ້ວ ຝ່າຍຊາຍກໍ່ຍັງຄົງອາໃສຢູ່ຫ້ອງເກົ່ານັ້ນຕໍ່ໄປ ແຕ່ກໍ່ຢູ່ດ້ວຍຄວາມພະຫວາຢ້ານກົວ ເພາະວິນຍານຂອງແຟນສາວຍັງມາວົນວຽນຫຼອກຫຼອນຢູ່ເປັນປະຈຳ ໝູ່ຂອງຝ່າຍຊາຍໄດ້ພາລາວໄປພົບພຣະອົງໜຶ່ງທີ່ສາມາດຊ່ວຍເລື່ອງພວກນີ້ໄດ້ ພຣະທ່ານກໍ່ບອກວ່າເວລານອນຕອນກາງຄືນໃຫ້ລາວລົງໄປນອນຢູ່ກ້ອງຕຽງ ຫຼັງຈາກຟັງຄຳແນະນຳຂອງພຣະແລ້ວ ຊາຍຄົນດັ່ງກ່າວກໍ່ກັບມາທີ່ຫ້ອງຄືເກົ່າ ເມື່ອຮອດຕອນຄ່ຳຄືນ ລາວກໍ່ລົງໄປນອນທີ່ກ້ອງຕຽງຕາມທີ່ພຣະອົງນັ້ນບອກ ຈົນເວລາຜ່ານໄປຫຼາຍມື້ ເພື່ອນໆຂອງລາວບໍ່ເຫັນລາວອອກມາຫາ ດ້ວຍຄວາມເປັນຫ່ວງບັນດາເພື່ອນຂອງລາວກໍ່ໄດ້ໄປຫາທີ່ຫ້ອງ ພໍໄຂປະຕູຫ້ອງເຂົ້າໄປໃນຫ້ອງກໍ່ປະກົດວ່າໝູ່ຕົນເອງນອນຕາຍເປັນສົບຢູ່ກ້ອງຕຽງແລ້ວ ສະນັ້ນ ພວກເຂົາຈິ່ງພາກັນກັບໄປຫາພຣະອົງເກົ່າເພື່ອຖາມວ່າເພື່ອນຂອງພວກເຂົາໄດ້ເຮັດຕາມຄຳແນະນຳທີ່ພຣະບອກທຸກຢ່າງແລ້ວແຕ່ເປັນຫຍັງຈິ່ງຕາຍ ພຣະເລີຍຖາມກັບມາວ່າ “ຕອນທີ່ແມ່ອອກຄົນນັ້ນໂດດຕຶກຂ້າຕົວຕາຍ ລາວເອົາສ່ວນໃດຂອງຮ່າງກາຍລົງພື້ນ” ເພື່ອນຂອງຜູ້ຊາຍທີ່ຕາຍໄດ້ຕອບກັບພຣະໄປວ່າ “ຫົວ” ພຣະເລີຍບອກໄປວ່າ ເພາະຝ່າຍຍິງເອົາຫົວລົງ ເວລາທີ່ເຂົາມາຫາ ເຂົາບໍ່ໄດ້ໃຊ້ຕີນຍ່າງມາ ແຕ່ເຂົາໃຊ້ຫົວໄຖພື້ນມາ (ຫົວລົງພື້ນຕີນຊີ້ຟ້າ) ພໍຝ່າຍຊາຍລົງໄປນອນກ້ອງຕຽງ ຝ່າຍຍິງທີ່ເອົາຫົວຍ່າງຕາງຕີນເລີຍເບິ່ງເຫັນຝ່າຍຊາຍໄດ້ຊັດເຈນ
ເປັນຈັ່ງໃດແຟນເພສ ເລື່ອງນີ້ພໍກະຕຸ້ນສະຫຍອງຂັວນຂອງທ່ານໄດ້ ຫຼື ບໍ່? ເລື່ອງນີ້ເປັນເລື່ອງເລົ່າຈາກຜູ້ຊາຍຄົນໜຶ່ງທີ່ໂທເຂົ້າມາເລົ່າເລື່ອງລາວຂອງເພື່ອນເຂົາຜູ້ທີ່ເສຍຊີວິດ ເຊິ່ງແອັດມິນໄດ້ໄດ້ອ່ານພົບທີ່ເວັບໄຊ ພັນທິບ ເຊິ່ງເປັນການເລົ່າຂອງ “ຈຳນຽນ” ເລື່ອງເລົ່າສະຫຍອງຂັວນ ຕອນຕໍ່ໄປຈະເປັນເລື່ອງໃດ ຢ່າລືມຕິດຕາມອ່ານນຳກັນເດີ້
ຕິດຕາມເລື່ອງດີດີ ບັນເທີງລາວ Lao Entertenment ກົດໄລຄ໌ເລີຍ!