ລັດຖະບານແຫ່ງ ສປປ ລາວ ໄດ້ສຸມທຸກຄວາມພະຍາຍາມໃນການຕອບໂຕ້ການລະບາດຂອງພະຍາດໂປລີໂອພາຍໃນປະເທດ ພາຍຫລັງທີ່ມີສອງກໍລິນີເສຍຊີວິດໃນແຂວງບໍລິຄຳໄຊຍ້ອນພະຍາດໂປລີໂອໃນປີທີ່ຜ່ານມາ ທັ້ງໆທີ່ ສປປ ລາວ ໄດ້ປະກາດລົບລ້າງພະຍາດດັ່ງກ່າວນີ້ໄປແລ້ວຕັ້ງແຕ່ປີ 2000.
ໃນການຕອບໂຕ້ການລະບາດຂອງພະຍາດໂປລີໂອຄັ້ງນີ້ ລັດຖະບານກໍໄດ້ຈັດຂະບວນການສັກຢາ-ຢອດຢາໃຫ້ກັບເດັກນ້ອຍທີ່ຢູ່ໃນກຸ່ມເປົ້າໝາຍກໍຄືໃນເກນອາຍຸລຸ່ມ 5 ປີໃນຂອບເຂດທົ່ວປະເທດ ເພື່ອເປັນການຢັບຢັ້ງການແຜ່ລະບາດ ແລະ ເພື່ອລົບລ້າງພະຍາດດັ່ງກ່າວອອກຈາກປະເທດລາວຢ່າງສິ້ນເຊີງ.
ຂະບວນການສັກຢາ-ຢອດຢາຄັ້ງນີ້ແມ່ນເປັນຮອບທີ 9 ແລ້ວຕັ້ງແຕ່ມີການລະບາດມາແຕ່ເດືອນຕຸລາ 2015 ແລະ ໃນການຈັດຕັ້ງຂະບວນ 8 ຄັ້ງທີ່ຜ່ານມາແມ່ນໄດ້ຮັບຜົນສຳເລັດຢ່າງໜ້າພໍໃຈ ແຕ່ເຖິງຢ່າງໃດກໍຕາມ ຂັ້ນຕອນຂະບວນການປຸກລະດົມກໍຍັງຜະເຊີນກັບຄວາມທ້າທາຍຫລາຍຢ່າງເຊັ່ນ: ບັນຫາການສື່ສານເພາະວ່າ ສປປ ລາວມີຫລາຍຊົນຜົ່າ, ຫລາຍພາສາ ແລະ ຕ່າງສາສະໜາ ແລະ ອີກປະການໜຶ່ງກໍຢູ່ໃນໄລຍະທີ່ປະປາຊົນກຳລັງເກັບກ່ຽວຜົນຜະລິດ.
ພິທີເປີດຂະບວນການສັກຢາ-ຢອດຢາຄັ້ງທີ 9 ຢູ່ບ້ານ ຜາເມືອງ ເມືອງບໍລິຄັນ ແຂວງບໍລິຄຳໄຊຖືວ່າເປັນໜຶ່ງຂະບວນການທີ່ສຳຄັນພາຍໃນປະເທດເພາະວ່າບ້ານດັ່ງກ່າວເປັນຈຸດເລີ່ມຕົ້ນຂອງການລະບາດພະຍາດໂປລີໂອ ແລະ ສອງກໍລິນີເສຍຊີວິດໃນປີທີ່ຜ່ານກໍແມ່ນເດັກນ້ອຍຢູ່ໃນບ້ານຜາເມືອງນີ້. ຂະບວນການດັ່ງກ່າວແມ່ນໄດ້ເປີດຂື້ນໃນວັນທີ 21 ພະຈິກນີ້, ຊຶ່ງໄດ້ດຳເນີນໄປພ້ອມໆກັບຂະບວນອື່ນໆໃນຂອບເຂດທົ່ວປະເທດ ແລະ ຈະດຳເນີນໄປຈົນຮອດວັນທີ 30 ພະຈິກ.
ໃນພິທີກ່າວເປີດ, ທ່ານ ນາງ ສີດາ ພັນທະລາ ຮອງເຈົ້າເມືອງໆບໍລິຄັນ ທັງເປັນປະທານຄະນະກຳມະການຮັກສາສຸຂະພາບຂັ້ນເມືອງກໍໄດ້ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງໃຫ້ສືບຕໍ່ສຶກສາອົບຮົມປະຊາຊົນໃຫ້ເຂົ້າໃຈຕໍ່ຄວາມສຳຄັນຂອງວຽກງານຮັກສາສຸຂະພາບແມ່ ແລະ ເດັກ ໂດຍສະເພາະການສັກຢາ-ຢອດຢາກັນພະຍາດໂປລີໂອ ແລະ ຮຽກຮ້ອງໃຫ້ຫົວໜ້າຄອບຄົວຈິງໃຈລາຍງານຂໍ້ມູນຈຳນວນເດັກເປົ້າໝາຍໃຫ້ຄົບຖ້ວນ ພ້ອມທັງເນັ້ນໃຫ້ພະນັກງານແພດໝໍກຽມຄວາມພ້ອມໃຫ້ດີ, ເພີ່ມຄວາມຮັບຜິດຊອບໃຫ້ສູງ ແລະ ໃຊ້ທຸກຄວາມພະຍາຍາມຄົ້ນຫາເປົ້າໝາຍທີ່ພາດໂອກາດ.
ທ່ານ ນາງຈັນທະຈອນ ອິນທິສານ ນາຍບ້ານໆຜາເມືອງກ່າວວ່າ: ໃນການກະກຽມຄັ້ງນີ້ ພວກເຮົາໄດ້ເຊີນເອົາບັນດາອຳນາດການປົກຄອງບ້ານ, ອົງການຈັດຕັ້ງ, ບັນດາຫົວໜ້າຈຸຫົວໜ້າໜ່ວຍ ໂດຍສະເພາະແມ່ນຫົວໜ້າຊົນເຜົ່າມາເຕົ້າໂຮມກັນປຶກສາຫາລືໃນການປຸກລະດົມພໍ່ແມ່ປະຊາຊົນໃຫ້ເຂົາເຈົ້າພາລູກ-ຫລານໃນເກນອາຍຸລຸ່ມ 5 ປີມາເຂົ້າຮ່ວມຂະບວນການສັກຢາ-ຢອດຢາໃຫ້ຄົບຕາມກຳນົດເປົ້າໝາຍ. ໃນທົ່ວບ້ານຜາເມືອງມີ 12 ຈຸດບໍລິການ ພ້ອມມີທິມແພດເຄື່ອນທີ່ສໍາລັບຕິດຕາມ ແລະ ຄົ້ນຫາເດັກເປົ້າໝາຍທີ່ຢູ່ເຂດຫ່າງໄກສອກຫລີກ. ເດັກນ້ອຍໃນເກນອາຍຸລຸ່ມ 5 ປີໃນບ້ານຜາເມືອງມີ 1,200 ກວ່າຄົນ, ທົ່ວເມືອງບໍລິຄັນມີ 6,200 ກວ່າຄົນ ແລະ ທົ່ວແຂວງບໍລິຄຳໄຊມີຫລາຍກວ່າ 26,800 ຄົນ. ໃນຮອບທີ່ຜ່ານມາ ການສັກຢາ-ຢອດຢາທົ່ວບ້ານຜາເມືອງບັນລຸ 99% ແລະ ໃນຄັ້ງນີ້ຄາດວ່າຈະໃຫ້ບັນລຸ 100%, ທ່ານ ນາງຈັນທະຈອນກ່າວເພີ່ມ.
ທ່ານ ດຣ ຄຳແຫວນ ເພັງຜາເມືອງ ຫົວໜ້າຫ້ອງການສາທາລະນະລຸກເມືອງບໍລິຄັນລາຍງານວ່າ: ການຈັດຕັ້ງປະຕິບັດຂະບວນການທົ່ວທົ່ວເມືອງບໍລິຄັນໃນຮອບທີ 9 ນີ້ຄາດວ່າຈະໃຫ້ບັນລຸ 95% ຂຶ້ນເມືອ. ເພື່ອບັນລຸຄາດໝາຍດັ່ງກ່າວນີ້ ທ່ານ ດຣ ຄຳແຫວນກໍໄດ້ຮຽກຮ້ອງມາຍັງພໍ່ແມ່ຜູ້ປົກຄອງທຸກທ່ານໃຫ້ມີຄວາມຕື່ນຕົວ ແລະ ນຳເອົາລູກ-ຫລານຂອງຕົນມາສັກຢາ-ຢອດຢາຢູ່ຕາມຈຸດບໍລິການຕ່າງໆໃນທົ່ວເມືອງ.
ຮອບທີ 10 ຄາດວ່າຈະໄດ້ຈັດຂຶ້ນໃນກາງເດືອນມັງກອນ 2017 ແລະ ພາຍຫລັງຄົບ10ຮອບແລ້ວ ພາກສ່ວນທີ່ກ່ຽວຂ້ອງກໍຈະໄດ້ລົງມາກວດຫາພະຍາດດັ່ງກ່າວນີ້ອີກຄັ້ງໜຶ່ງ. ອີງຕາມຄຳແນະນຳຂອງອົງການອາໄມໂລກ ແມ່ນຕ້ອງບໍ່ພົບກໍລະນີໃໝ່ເປັນເວລາ 6 ເດືອນຈຶ່ງຖືວ່າສາມາດຄວບຄຸມການລະບາດຂອງພະຍາດໂປລີໂອໄດ້.
ຂ່າວຈາກ: ສຳນັກຂ່າວສານປະເທດລາວ
ສຳຫຼັບທ່ານທີ່ຮັກສຸຂະພາບ ຕິດຕາມເລື່ອງດີດີ ກົດໄລຄ໌ເລີຍ!