ລັດຖະບານເລັ່ງປະຕິຮູບ ການຄຸ້ມຄອງ ການຈັດເກັບອາກອນໄປສູ່ທັນສະໄໝ ຢ່າງຄົບຖ້ວນໂດຍໃຫ້ສືບຕໍ່ຕິດຕັ້ງເຄື່ອງມື ເຊື່ອມຕໍ່ຖານຂໍ້ມູນ ຢູ່ຈຸດຂາຍນໍາບັນດາຫົວໜ່ວຍທຸລະກິດ ຂະໜາດໃຫຍ່, ກາງ ແລະ ຕິດຕັ້ງເຄື່ອງເກັບເງິນ ນໍາຫົວໜ່ວຍທຸລະກິດມອບເໝົາ ຈໍານວນໜຶ່ງ ສ້າງພື້ນຖານໂຄງສ້າງ ແລະ ລະບົບການຄຸ້ມຄອງອາກອນ ໃຫ້ທັນສະໄໝຄົບຊຸດ ເພື່ອຮັບປະກັນໃນການເກັບອາກອນ ໃຫ້ຄົບຖ້ວນ, ຊັດເຈນໃນໄລຍະກາງຫາໄລຍະຍາວ, ນັ້ນແມ່ນບາງຄໍາເຫັນ ຂອງທ່ານ ອາດສະພັງທອງ ສີພັນດອນ ຮອງລັດຖະມົນຕີ ກະຊວງການເງິນ ໄດ້ລາຍງານຕໍ່ກອງປະຊຸມແນະນໍາ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈໍາປີ 2017 ເມື່ອບໍ່ດົນຜ່ານມານີ້.
ທ່ານ ອາດສະພັງທອງ ສີພັນດອນ ກ່າວຕື່ມວ່າ: ຕ້ອງໄດ້ສືບຕໍ່ຂະຫຍາຍ ການອອກເລກປະຈໍາຕົວໃຫ້ສໍາເລັດ ແລະ ຄຸ້ມຄອງເຂົ້າສູ່ລະບົບ TMIS ທີ່ມີຢູ່ແລ້ວ ໃຫ້ໄດ້ໃນຂອບເຂດທົ່ວປະເທດ ໂດຍສະເພາະຢູ່ແຂວງທີ່ຍັງບໍ່ທັນສໍາເລັດ ແລະ ສາມາດເປັນເຄື່ອງມືຕິດຕາມ ການແຈ້ງເສຍອາກອນ, ການກວດກາອາ ກອນຫລັງການແຈ້ງໃຫ້ໄວຂຶ້ນ, ປັບ ປຸງກົນໄກ ການມອບພັນທະຄ່າທໍານຽມ ສິດນໍາໃຊ້ທີ່ດິນໃຫ້ສະດວກວ່ອງໄວ ຂຶ້ນກວ່າເກົ່າ ພ້ອມທັງສົມທົບກັບຂະແໜງການທີ່ກ່ຽວຂ້ອງ ສໍາຫລວດ ແລະ ເກັບຂໍ້ມູນ ໃນການປ່ຽນປະເພດການນໍາໃຊ້ທີ່ດິນ ໃຫ້ມີຄວາມຊັດເຈນ ແລະ ຖືກຕ້ອງກັບຄວາມເປັນຈິງ ເຊັນ: ຈາກດິນກະສິກໍາເປັນດິນປຸກສ້າງ, ດິນປຸກສ້າງເປັນດິນຂອງວິສາຫະກິດ ແລະ ອື່ນໆ ນອກນີ້ ຕ້ອງສົມທົບກັບຂະແໜງການກ່ຽວຂ້ອງ ເພີ່ມທະວີການຈັດເກັບອາກອນປະເພດຕ່າງໆ ຈາກທຸລະກິດຂຸດຄົ້ນບໍ່ແຮ່, ພະລັງງານໄຟຟ້ານ້ຳຕົກ, ໂຄງການສາຍສົ່ງໄຟຟ້າ ແລະ ບັນດາໂຄງການຕ່າງໆ ທີ່ນໍາໃຊ້ເງິນກູ້ຢືມ ແລະ ຊ່ວຍເຫລືອເພື່ອການພັດທະນາ ໂດຍສະເພາະຜູ້ສະໜອງໂຄງການເຫລົ່ານັ້ນ ເຊັ່ນ: ອາກອນມູນຄ່າເພີ່ມ, ອາກອນຄ່າເຊົ່າ ແລະ ອາກອນເງິນເດືອນ, ປັບປຸງກົນໄກການຕິດຕາມ ແລະ ດໍາເນີນມາດຕະການກວດກາ ປໍ້າຈໍາໜ່າຍນ້ຳມັນເຊື້ອໄຟ ແລະ ການເຄື່ອນຍ້າຍນ້ຳມັນເຊື້ອໄຟ ເພື່ອໃຫ້ມອບພັນທະຖືກຕ້ອງ, ຄົບຖ້ວນ ແລະ ເຄື່ອນໄຫວຕາມລະບຽບການ ພ້ອມທັງດໍາເນີນມາດຕະການຢ່າງເດັດຂາດ ແລະ ເຂັ້ມງວດ ຕໍ່ຜູ້ດໍາເນີນທຸ ລະກິດທີ່ບໍ່ປະຕິບັດຕາມກົດໝາຍ ແລະ ລະບຽບການ, ປັບປຸງກົນໄກ ການມອບພັນທະອາກອນ ປະເພດຕ່າງໆ ເປັນເງິນສົດ ໂດຍສະເພາະຢູ່ຂັ້ນເມືອງ, ເທດສະບານໃຫ້ນໍາໃຊ້ລະບົບ Easy tax ໃຫ້ກ້ວາງຂວາງລວມທັງລະບົບ ການເກັບລາຍຮັບອາກອນ ແບບມອບເໝົາຕ້ອງຜ່ານລະບົບທະນາຄານໃຫ້ຫລາຍຂຶ້ນ
ແຫລ່ງຂ່າວຈາກ: http://kpl.gov.la/detail.aspx?id=20789
ຮູບພາບປະກອບຈາກ: www.google.co.th/search
ຕິດຕາມຂ່າວເສດຖະກິດລາວ ກົດໄລຄ໌ເລີຍ!