ພິທີເຊັນບົດບັນທຶກຄວາມເຂົ້າໃຈ ກ່ຽວກັບໂຄງການທົດລອງການສົ່ງເສີມວຽກງານພະລະ ແລະ ສິລະປະສຶກສາ ໃນໂຮງຮຽນສາມັນສຶກສາສຳລັບເດັກນ້ອຍລາວ ຈັດຂຶ້ນວັນທີ 24 ທັນວາ 2013 ທີ່ຕຶກກະຊວງສຶກສາທິການ ແລະ ກີລາ ສະໜາມກີລາເຈົ້າອະນຸວົງ ລະຫວ່າງທ່ານ ບຸນສຸກ ທິລະສັກ ຫົວໜ້າກົມພະລະ ແລະ ສິລະປະສຶກສາ ແລະ ທ່ານ ຄຣິດ ມາສຕາກ ລີໂອ ຫົວໜ້າອົງການຊາຍຟັນ ອົດສະຕຣາລີ ໂດຍມີແຂກກ່ຽວຂ້ອງຖືກເຊີນເຂົ້າຮ່ວມເປັນສັກຂີພິຍານ.
ທ່ານ ບຸນສຸກ ທິລະສັກ ກ່າວວ່າ: ສຳລັບໂຄງການດັ່ງກ່າວ ກໍ່ເພື່ອຍົກລະດັບຄວາມເຂົ້າໃຈ ເນື້ອໃນຕົ້ນຕໍຂອງຫຼັກມູນການສຶກສາ ທີ່ກ່ຽວຂ້ອງກັບການສົ່ງເສີມວຽກງານພະລະ ແລະ ສິລະປະສຶກສາ ຂອງບັນດາພາກສ່ວນກ່ຽວຂ້ອງໃນການຈັດການສຶກສາ ແລະ ປັບປຸງຮູບແບບວິທີການຈັດການສອນ-ການຮຽນ ວິຊາພະລະ ແລະ ສິລະປະສຶກສາ ພ້ອມທັງເປັນການຍົກລະດັບດ້ານຮູບແບບວິທີການສິດສອນວິຊາພະລະ ແລະ ສິລະປະສຶກສາ ໃຫ້ແກ່ຄູ່ຮ່ວມງານໃຫ້ມີປະສິດທິຜົນ ເພື່ອໃຫ້ສອດຄ່ອງກັບຄຳແນະນຳ ຂອງຫຼັກສູດທີ່ກະຊວງສຶກສາທິການ ແລະ ກີລາ ໄດ້ວາງອອກ ກ່ຽວກັບການສອນວິຊາພະລະ ແລະ ສິລະປະສຶກສາໃນໂຮງຮຽນສາມັນ ນອກນີ້ຍັງເປັນການຍົກລະດັບ ໃນການເຂົ້າເຖິງສິ່ງອຳນວຍຄວາມສະດວກ ດ້ານການຮຽນ-ການສອນວິຊາພະລະ ແລະ ສິລະປະສຶກສາໃນໂຮງຮຽນ ເພື່ອປັບປຸງໝາກຜົນຂອງການຮຽນຮູ້ວິຊາພະລະ ແລະ ສິລະປະສຶກສາ ໃນ 5 ໂຮງຮຽນເປົ້າໝາຍ.
ສຳລັບໂຄງການດັ່ງກ່າວ ອົງການຊາຍຟັນ ອົດສະຕຣາລີ ໄດ້ໃຫ້ທຶນສະໜັບສະໜູນ ມູນຄ່າ 82.688 ໂດລາອົດສະຕຣາລີ ຫຼື ປະມານ 589 ລ້ານກວ່າກີບ ມີໄລຍະເວລາ 11 ເດືອນ (ສິງຫາ 2013 ຫາມິຖຸນາ 2014) ແລະ ຈະທົດລອງໃນຂອບເຂດ 5 ໂຮງຮຽນຂອງສອງຕົວເມືອງ ໃນນະຄອນຫຼວງວຽງຈັນ ໂດຍເນັ້ນໃສ່ເຂດຕົວເມືອງ ແລະ ຊານເມືອງ ຖ້າຫາກໂຄງການທົດລອງປະສົບຜົນສຳເລັດ ໂຄງການອາດສືບຕໍ່ຂະຫຍາຍໄປສູ່ແຫ່ງອື່ນໆທີ່ກວ້າງຂວາງຕື່ມອີກ.
ທີ່ມາhttp://www.vientianemai.net/teen/khao/1/10858