ວັນທີ 8 ມີນາ 2018 ນີ້ ຫ້ອງການແນວລາວສ້າງເມືອງພູຄູນ ໄດ້ຈັດພິທີ ປະກາດຮັບຮອງເອົາບ້ານ ຜາເກ່ງໃຫຍ່ເປັນບ້ານສາມັກຄີປອງດອງ ໂດຍການເຂົ້າຮ່ວມຂອງທ່ານ ຄຳຜຸຍ ກິນດາວົງ ຄະນະປະຈຳພັກເມືອງ, ມີຫົວໜ້າຫ້ອງການ, ແຂກທີ່ຖືກເຊີນ, ອຳນາດການປົກຄອງບ້ານຕະຫຼອດຮອດພໍ່່ແມ່ປະຊາຊົນພາຍໃນບ້ານເຂົ້າຮ່ວມ.
ທ່ານ ທອງຍຸນ ປະທານແນວລາວສ້າງຊາດບ້ານຜາເກ່ງໃຫຍ່ ໄດ້ຂື້ນຜ່ານບົດສະຫຼຸບຂະບວນການສ້າງຄອບຄົວ ແລະ ບ້ານສາມັກຄີປອງດອງ ທ່ານໄດ້ຍົກໃຫ້ເຫັນເຖິງການຈັດຕັ້ງປະຕິບັດວຽກງານໃນໄລຍະຜ່ານມາ ເຊິ່ງໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ພໍ່ແມ່ປະຊາຊົນມີຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ, ຮັກສາໄດ້ມູນເຊື້ອອັນດີງາມຂອງເຜົ່າ ເຮັດໃຫ້ການພັດທະນາວຽກງານຮອບດ້ານມີຜົນສຳເລັດຫຼາຍດ້ານ ໂດຍສະເພາະແມ່ນການຊີ້ນຳ-ນຳພາຈັດຕັ້ງປະຕິບັດຂໍ້ແຂງຂັນສ້າງຄອບຄົວ ແລະ ບ້ານສາມັກຄີປອງດອງຢ່າງເປັນຂະບວນການ ທົ່ວບ້ານມີ 69 ຄອບຄົວ ພົນລະເມືອງທັງໝົດ 378 ຄົນ, ຍິງ 178 ຄົນ ອາຊີບສ່ວນໃຫຍ່ແມ່ນປູກຝັງ-ລ້ຽງສັດ ແລະ ການບໍລິການຈຳນວນໜຶ່ງ ສາມາດສ້າງລາຍຮັບໃຫ້ແກ່ຄອບຄົວ ສະເລ່ຍໄດ້ 1 ລ້ານ 7 ແສນກວ່າກີບ ຕໍ່ຄົນຕໍ່ປີ ຜ່ານການຊຸກຍູ້ຂະບວນການສ້າງຄອບຄົວ ແລະ ບ້ານສາມັກຄີປອງດອງ ຕາມ 4 ມາດຖານ ຂອງຂອງຄະນະກຳມະການ ແນວລາວສ້າງຊາດວາງອອກ ມີຄອບຄົວຄົບຕາມມາດຖານເງືອນໄຂ ເທົ່າກັບ 100% ຂອງຄອບຄົວທັງໝົດ. ເພື່ອເປັນການຢັ້ງຢື່ນເຖິງຜົນງານທີ່ອຳນາດການປົກຄອງພໍ່ແມ່ປະຊາຊົນຍາດໄດ້ນັ້ນ ທ່ານ ຄຳຜຸຍ ກິນດາວົງ ຄະນະປະຈຳພັກເມືອງ ໄດ້ໃຫ້ກຽດມອບໃບຢັ້ງຢືນແກ່ຄອບຄົວ ແລະ ບ້ານຜາເກ່ງໃຫຍ່ເປັນບ້ານສາມັກຄີປອງດອງ ພ້ອມທັງໃຫ້ກຽດໂອ້ລົມຕໍ່ອຳນາດການປົກຄອງພໍ່ແມ່ປະຊາຊົນ.
ພາບ ແລະ ຂ່າວ: ວັນທຽນ ຄຳທະສິດ