ມະເຮັງເຕົ້ານົມ ເປັນອີກພະຍາດທີ່ຂ້າຊີວິດແມ່ຍິງທົ່ວໂລກເປັນຈຳນວນຫລາຍ ສາວໆຫລາຍໆຄົນ ກໍຄົງຢ້ານ ແລະ ກັງວົນວ່າ ຕົນເອງຈະມີໂອກາດເປັນ ມະເຮັງ ເຕົ້ານົມ ຫລືບໍ່? ມື້ນີ້ເຮົາມາເບິ່ງ ກັບ 5ວິທີສ້າງພະລັງ ປ້ອງກັນ ມະເຮັງເຕົ້ານົມ
ການກິນອາຫານ ແລະ ການອອກກຳລັງກາຍຂອງສາວໆ ກໍ່ມີປະໂຫຍດທັງຄວາມແຂງແຮງແກ່ຮ່າງກາຍ ແລະ ຍັງຊ່ວຍປ້ອງກັນບໍ່ໃຫ້ເຊວປົກກະຕິກາຍສະພາບເປັນເຊວຮ້າຍ ອັນເປັນຕົ້ນເຫດຂອງ ມະເຮັງເຕົ້ານົມ ມາເບິ່ງແຍງສຸຂະພາບເຕົ້ານົມໃຫ້ມີສຸຂະພາບແຂງແຮງດ້ວຍ 5ວິທີ ດັ່ງນີ້
- ຮັກສານ້ຳໜັກໂຕ
ແມ່ນຄວາມສຳພັນລະຫວ່າງຄວາມຕຸ້ຍ ກັບ ມະເຮັງເຕົ້ານົມຈະຍັງບໍ່ເປັນທີ່ຊັດເຈນ ແຕ່ແມ່ຍິງທີ່ນ້ຳໜັກໂຕຢູ່ໃນເກນປົກກະຕິ ຈະມີຄວາມສ່ຽງການເປັນພະຍາດມະເຮັງເຕົ້ານົມນ້ອຍກວ່າແມ່ຍິງທີ່ມີນ້ຳໜັກເກີນ ໂດຍຈາກການສຶກສາຫລ້າສຸດ ພົບວ່າ ແມ່ຍິງທີ່ມີຄ່າດັດສະນີ ມວນກາຍ (Body Mass Index ຫລື BMI) ຫລາຍກວ່າ 30ຂຶ້ນໄປ ມັກເຂົ້າຂ່າຍເປັນພະຍາດມະເຮັງ ອັນເປັນສາເຫດຂອງການເສັຍຊີວິດຫລາຍກວ່າແມ່ຍິງທີ່ມີຄ່າດັດສະນີ ມວນກາຍຕ່ຳກວ່າ 25
ສາເຫດມາຈາກຊີ້ນເຍື່ອມະເຮັງເຕົ້ານົມໃນຜູ້ຍິງທີ່ມີນ້ຳໜັກໂຕຫລາຍ ຈະມີຮໍໂມນ ເອດໂຕເຈນປະລິມານສູງ ເຊິ່ງຮໍໂມນຊະນິດນີ້ ຈະກະຕຸ້ນເຊວມະເຮັງເຕົ້ານົມໃຫ້ຈະເລີນເຕີບໂຕ ແລະ ພັດທະນາຫລາຍຂຶ້ນ
- ໝັ່ນອອກກຳລັງກາຍ
ເພາະແມ່ຍິງທີ່ນັ່ງດົນໆ ຫລື ບໍ່ຄ່ອຍໄດ້ເຄື່ອນໄຫວຮ່າງກາຍ ມີໂອກາດທີ່ມະເຮັງເຕົ້ານົມ ຈະລຸກາມປະມານ 75ເປີເຊັນ ເນື່ອງຈາກມີງານວິໄຈ ລະບຸວ່າ ການອອກກຳລັງກາຍສາມາດຊ່ວຍເສີມລະບົບພູມຄຸ້ມກັນ ປ້ອງກັນພະຍາດຕຸ້ຍ ຮັກສານ້ຳໜັກຕົວໃຫ້ຄົງທີ່ ເຮັດໃຫ້ລະດັບຮໍໂມນເອດໂຕເຈນສົມດຸນ ແລະ ເສີມມວນກະດູກ ທັງນີ້ ງານວິໄຈຍັງໄດ້ແນະນຳວ່າ ວິທີອອກກຳລັງກາຍທີ່ງ່າຍທີ່ສຸດ ຄື ການຍ່າງ ນັ້ນເອງ ໂດຍເຮັດມື້ລະ 30ນາທີ ຢ່າງນ້ອຍອາທິດລະ 4-5ມື້
- ກິນອາຫານໃຫ້ສົມດຸນ
ຄວນກິນຜັກ ແລະ ຫມາກໄມ້ທີ່ມີສານ ແອນຕິອອກຊິແດນ ເຊັ່ນ ບັອກໂຄລີ ກະຫລ່ຳ ຜັກກາດນາ ໝາກໂມ ທັນຍະພືດ ແລະ ອາຫານທີ່ອຸດົມໄປດ້ວຍກົດໄຂມັນໂອເມກ້າ 3ເຊັ່ນ ໝາກອຶ ຖົ່ວເຫລືອງ ແລະ ປາ ເພາະສານອາຫານເຫລົ່ານີ້ ຊ່ວຍປ້ອງກັນການເກີດພະຍາດມະເຮັງ ແລະ ຊ່ວຍບໍ່ໃຫ້ກັບມາເປັນຊ້ຳໄດ້
- ງົດດື່ມແອວກໍຮໍ
ແມ່ຍິງທີ່ດື່ມເຄື່ອງດື່ມແອວກໍຮໍຫລາຍກວ່າ ມື້ລະ 1-2ຈອກ ມີຄວາມສ່ຽງທີ່ຈະເປັນພະຍາດມະເຮັງເຕົ້ານົມຫລາຍກວ່າຜູ້ທີ່ບໍ່ດື່ມ ໂດຍສະເພາະຢ່າງຍິ່ງ ຫາກດື່ມເຄື່ອງດື່ມແອວກໍຮໍຫລາຍກວ່າອາທິດລະ 3ເທື່ອຂຶ້ນໄປ ເຖິງແມ່ນປິ່ນປົວຫາຍດີແລ້ວ ກໍມີໂອກາດສູງທີ່ຈະກັບມາເປັນມະເຮັງໄດ້ເຊັ່ນກັນ
- ກິນວິຕາມິນດີໃຫ້ພຽງພໍ
ມີງານວິໄຈພົບວ່າ ແມ່ຍິງທີ່ໄດ້ຮັບວິຕາມິນດີ ຫລື ມີລະດັບວິຕາມິນດີ ໃນຮ່າງກາຍຕ່ຳ ຈະມີຄວາມສ່ຽງເປັນມະເຮັງເຕົ້ານົມຫລາຍກວ່າ ຜູ້ທີ່ມີລະດັບວິຕາມິນດີຢູ່ໃນເກນປົກຕິ
ສຳລັບຜູ້ປ່ວຍພະຍາດນີ້ ທີ່ປິ່ນປົວຕົນເອງຈົນອາການເປັນປົກກະຕິແລ້ວ ຫາກຮ່າງກາຍມີລະດັບວິຕາມິນດີຕ່ຳ ກໍມີໂອກາດກັບມາເປັນພະຍາດມະເຮັງຊ້ຳໄດ້
ດັ່ງນັ້ນ ຄວນໝັ່ນໄປກວດເຊັກປະລິມານວິຕາມິນດີໃນຮ່າງກາຍຢ່າງສະໝໍ່າສະເໝີ ແລະຫາກພົບວ່າ ມີປະລິມານຕ່ຳ ຄວນຮີບປຶກສາແພດໝໍທັນທີ