ບໍລິສັດອີຈິນ ວິສາວະກຳກໍ່ສ້າງລາວ ຈໍາກັດ ສປ ຈີນ ຜູ້ໄດ້ຮັບສຳປະທານ ໂຄງພັດທະນາເດີ່ນບິນເກົ່າ ເມືອງວັງວຽງ ຈະມຸ່ງໜ້າ ປະຕິບັດຫລາຍກິດຈະກຳ ເຮັດໃຫ້ແຂວງ ວຽງຈັນໄດ້ຮັບຜົນປະໂຫຍດຫລາຍດ້ານ ເປັນຕົ້ນແມ່ນ ຈະສ້າງສີສັນໃໝ່ ດ້ານການທ່ອງທ່ຽວ ໃຫ້ແກ່ເມືອງວັງວຽງ ໂດຍຈະມີໂຮງແຮມຫ້າດາວ ແຫ່ງທຳອິດ ຢູ່ເມືອງວັງວຽງ ຈະຊ່ວຍຍົກລະດັບ ການບໍລິການດ້ານສະຖານທີ່ພັກເຊົາ ໃຫ້ແກ່ນັກທ່ອງທ່ຽວ ໄດ້ຢ່າງພຽງພໍ, ທັງມີຄວາມທັນສະໄໝ ແລະ ໄດ້ມາດຕະຖານສາກົນ, ຮ້ານຄ້າປອດພາສີ, ລວມທັງໂຮງຮຽນວິຊາຊີບ ການທ່ອງທ່ຽວ ເພື່ອສ້າງ ແລະ ບຳລຸງ ຜູ້ໃຫ້ບໍລິການ ດ້ານການທ່ອງທ່ຽວ.
ທ່ານ ສຸກັນ ວິໄລຣັດ ຫົວໜ້າ ພະແນກແຜນການ-ການລົງທຶນ ແຂວງວຽງຈັນ ຢືນຢັນວ່າ: ໂຄງການນີ້, ຈະບໍ່ມີ ການສ້າງກາສິໂນສຳລັບ ນັກທ່ອງທ່ຽວຕ່າງປະເທດ ເພາະແຂວງວຽງຈັນ ບໍ່ໄດ້ອະນຸມັດຢ່າງເດັດຂາດ, ດັ່ງນັ້ນ ຈຶ່ງນຳສະເໜີ ມາຍັງພາກສ່ວນຕ່າງໆ ແລະ ສັງຄົມ ຈົ່ງໃຫ້ຄວາມເຂົ້າໃຈຢ່າງຖືກຕ້ອງ ຕໍ່ກັບໂຄງການດັ່ງກ່າວດ້ວຍ. ໂຄງການນີ້, ຍັງຈະມີໂຮງໝໍ ທີ່ທັນສະໄໝ ເຊິ່ງຈະເປັນບ່ອນປີ່ນປົວສຸຂະພາບ ທີ່ດີອີກແຫ່ງໜຶ່ງ ແລະ ສ້າງຄວາມເຊື່ອໝັ້ນ ດ້ານສຸຂະພາບ ໃຫ້ແກ່ນັກທ່ອງທ່ຽວ ທີ່ມາທ່ຽວຊົມ ເມືອງວັງວຽງ, ທີ່ສຳຄັນ ໂຄງການດັ່ງກ່າວ ຍັງເນັ້ນເລື່ອງການ ອານຸລັກຮັກສາດ້ານວັດທະນະທຳ ຮີດຄອງປະເພນີ, ໂດຍອົງການ ປົກຄອງແຂວງ, ເມືອງ ຈະໄດ້ສົມທົບ ກັບບໍລິສັດ ເພື່ອສ້າງເສົາຫລັກ ເມືອງວັງວຽງ, ສວນສາທາລະນະ, ຈຸດສັນຍາລັກ ເມືອງວັງວຽງ ແລະ ກິດຈະກຳອື່ນໆ ເພື່ອສົ່ງເສີມການທ່ອງທ່ຽວ. ທັງໝົດ ນັ້ນຈະເປັນການຊ່ວຍສ້າງລາຍຮັບ ໃຫ້ແກ່ງົບປະມານລັດ, ສ້າງວຽກເຮັດງານທຳ ໃຫ້ແກ່ ປະຊາຊົນຢ່າງຫລາຍ.
ທ່ານ ຫົວໜ້າ ພະແນກແຜນການ-ການລົງທຶນ ແຂວງວຽງຈັນ ໄດ້ໃຫ້ຮູ້ຕື່ມວ່າ: ສ່ວນຜົນກະທົບ ຂອງໂຄງການຕໍ່ທາງດ້ານ ສິ່ງແວດລ້ອມ ແລະ ສັງຄົມ ແມ່ນ ມີໜ້ອຍທີ່ສຸດ, ເນື່ອງຈາກ ບໍລິເວນດັ່ງກ່າວ ເປັນເຂດເດີ່ນບິນເກົ່າ ທີ່ມີການສະຫງວນ ບໍ່ໃຫ້ມີສິ່ງປຸກສ້າງ ຂອງບຸກຄົນແຕ່ໃດມາ ເຊິ່ງບໍລິສັດ ກໍ່ໄດ້ມີແຜນຄຸ້ມຄອງສິ່ງແວດລ້ອມຮອງຮັບ ໃນໄລຍະກໍ່ສ້າງ ແລະ ໄລຍະດຳເນີນກິດຈະການລະອຽດ, ການທີ່ບໍລິສັດ ອີຈິນ ໄດ້ຮັບອະນຸຍາດໃຫ້ເຂົ້າ ມາພັດທະນາບໍລິເວນນີ້, ຝ່າຍ ແຂວງວຽງຈັນ ກໍໄດ້ໃຫ້ບໍລິສັດ ດັ່ງກ່າວ ກໍ່ສ້າງສະໝາມບິນແຫ່ງໃໝ່ ທົດແທນ ຢູ່ເຂດບ້ານໂພນເພັງ ຂອງເມືອງວັງວຽງ. ພ້ອມນັ້ນ ຈະໄດ້ສົມທົບກັບ ທຸກພາກສ່ວນທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ ເພື່ອຊຸກຍູ້, ຕິດຕາມ, ກວດກາ ເພື່ອໃຫ້ບໍລິສັດດັ່ງກ່າວ ປະຕິບັດຕາມກົດໝາຍ ວ່າດ້ວຍ ການາສົ່ງເສີມການລົງທຶນ ແລະ ກົດໝາຍທີ່ກ່ຽວຂ້ອງ ຢ່າງເຂັ້ມງວດ ແລະ ດຳເນີນໄປດ້ວຍຜົນສຳເລັດ.
ສຳລັບເຂດພັດທະນາ ເດີ່ນບິນເກົ່າ ເມືອງວັງວຽງ ມີເນື້ອທີ່ 16 ເຮັກຕາກວ່າ, ໄລຍະການກໍ່ສ້າງ 5 ປີ ແລະ ໄລຍະສຳປະທານ 50 ປີ, ມູນຄ່າ ການລົງທຶນທັງໝົດ 200 ລ້ານໂດລາສະຫະລັດ.
ແຫລ່ງຂ່າວ : ຂ່າວສານປະເທດລາວ