ເປັນຄວາມທ້າທາຍອັນໃຫຍ່ຫຼວງຕໍ່ອະນາຄົດຂອງສື່ກະແສຫຼັກດັ່ງ ໜັງສືພິມ, ວິທະຍຸ, ໂທລະພາບ ແລະວາລະສານ ທີ່ເຄີຍເປັນທີ່ໜຶ່ງໃນອະດີດ ເມື່ອການເກີດຂຶ້ນຂອງສື່ຍຸກໃໝ່ທີ່ທັັງໄວແລະຫຼາກຫຼາຍ ແລະທີ່ສຳຄັນໃຜໆ ກໍສາມາດເປັນຜູ້ສື່ຂ່າວໄດ້ ຕ່າງແຕ່ວ່າໃຜຈະດີກວ່າໃຜທໍ່ນັ້ນເອງ.
ແຕ່ວ່າສິ່ງທ້າທາຍດັ່ງກ່າວນັ້ນ, ກໍບໍ່ເຖິງຂັ້ນວ່າສື່ເກົ່າຫຼືສື່ກະແສຫຼັກຈະຕາຍໄປໄດ້ງ່າຍໆ ດັ່ງເຮົາເຫັນຢູ່ຕ່າງປະເທດ ໂດຍສະເພາະປະເທດອ້ອມຂ້າງຂອງພວກເຮົາ ໜັງສືພິມ, ວິທະຍຸ ແລະໂທລະພາບ ຂອງເຂົາເຈົ້າກໍຍັງຢູ່ໄດ້ແລະນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ.
ໃນອະດີດທີ່ຜ່ານມານັ້ນ, ສື່ເກົ່າຫຼືສື່ກະແສຫຼັກຂອງລາວເຮົາ ກໍເຮັດໜ້າທີ່ຂອງຕົນໄດ້ຢ່າງດີສະເໝີມາ ແລະສາມາດເວົ້າໄດ້ວ່ານັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ ຈົນມາຕ້ອງສະດຸດກັບກະຕໍໃຫຍ່ຄືເຟັດບຸກ ເຊິ່ງເປັນສັງຄົມອອນລາຍທີ່ມອບເສລີພາບໃນການເຮັດສື່ໃຫ້ຄົນທຸກຄົນທີ່ຮັກອາຊີບນີ້.
ແຕ່ສື່ໃໝ່ສ່ວນຫຼາຍແລ້ວມີຄວາມໄວ ແຕ່ບໍ່ໄດ້ລະອຽດຫຼືບໍ່ຄ່ອຍມີຄຸນນະພາບ ແລະຍັງເປັນສື່ທີ່ຍັງນຳຫຼັງສື່ເກົ່າຫຼືສື່ກະແສຫຼັກຢູ່ດີ ເພາະສ່ວນຫຼາຍແລ້ວສື່ຍຸກໃໝ່ກໍອາໄສເນື້ອໃນຈາກສື່ເກົ່າຫຼືສື່ກະແສຫຼັກມານຳສະເໜີຕໍ່ທໍ່ນັ້ນເອງ, ສື່ຫຼັກມີເງື່ອນໄຂສູງທີ່ຈະໄປເຈາະຈິ້ມເອົາລາຍລະອຽດມານຳສະເໜີ ໃຫ້ມີຄວາມພິເສດແຕກຕ່າງຈາກສື່ໃໝ່. ດັ່ງນັ້ນ, ສື່ເກົ່າຈຶ່ງບໍ່ຄວນຢ້ານສື່ໃໝ່ຈະທັບຖົມຕົນເອງ.
ສື່ເກົ່າມີຄວາມໄດ້ປຽບທຸກດ້ານ ບໍ່ວ່າຈະເປັນອົງການຈັດຕັ້ງ, ມີອຳນາດ, ມີຄວາມສະດວກໃນການເຂົ້າຫາແຫຼ່ງຂ່າວ, ປະສົບການ, ພື້ນຖານໂຄງລ່າງ, ບຸກຄະລາກອນ ແລະເຄື່ອງມື ລ້ວນແຕ່ດີກວ່າສື່ໃໝ່ຢ່າງໜ້າເຟັດບຸກຫຼືເວັບໄຊຢູ່ແລ້ວ ໃນຂະນະທີ່ສື່ເກົ່າກໍຍັງສາມາດນຳໃຊ້ເທັກໂນໂລຢີສື່ໃໝ່ໄດ້ເຊັ່ນກັນ. ດັ່ງນັ້ນ, ຖ້າສື່ເກົ່າເພິ່ມຄວາມເຂັ້ມຂຸ້ນໃນວິຊາການສື່ແລ້ວເປັນຫຍັງສື່ເກົ່າຈຶ່ງໄປບໍ່ລອດ. ສື່ເກົ່າທີ່ດີຢູ່ແລ້ວນັ້ນຕ້ອງປັບໂຕໃຫ້ດີຂຶ້ນກວ່າເກົ່າ ບໍ່ວ່າຈະເປັນວິທະຍຸ, ໂທລະພາບ ຫຼືສື່ສິ່ງພິມ ຕ້ອງເຈາະເລິກ, ວິເຄາະ, ວິຈານ, ລົງເລິກລາຍລະອຽດ ວິທີນຳສະເໜີ ຕ້ອງງັດເອົາສິ່ງທີ່ສື່ໃໝ່ເຮັດບໍ່ໄດ້ນັ້ນອອກມາໃຊ້ ໂທລະພາບອາດຈະປັບປຸງວິທີການນຳສະເໜີບັນຫາສັງຄົມໃຫ້ຫຼາຍຂຶ້ນ, ນຳກະແສສັງຄົມໃຫ້ທັນ ເຊີນເອົາຜູ້ໃຫຍ່ທີ່ກ່ຽວຂ້ອງກັບກະແສຂ່າວທີ່ກຳລັງເປັນທີ່ສົນໃຈມາອອກລາຍການໃຫ້ຫຼາຍຂຶ້ນ, ເຮັດໃຫ້ປະຊາຊົນໄດ້ຟັງຄຳເຫັນຈາກການນຳ, ຈາກນັກວິຊາການ ຫຼືຜູ້ຊ່ຽວຊານດ້ານຕ່າງໆ ທີ່ກຳລັງເປັນກະແສມານຳສະເໜີໃຫ້ຫຼາຍຂຶ້ນ, ການເລືອກບຸກຄະລາກອນກໍເບິ່ງດ້ານຄວາມຮູ້ຄວາມສາມາດຫຼາຍກວ່າເບິ່ງໜັງໜ້າວ່າງາມຫຼືໜຸ່ມທໍ່ນັ້ນ.
ສະຫຼຸບແລ້ວຈັ່ງໃດໆ ສື່ເກົ່າຫຼືສື່ກະແສຫຼັກກໍມີຈຸດແຂງກວ່າສື່ໃໝ່ແລະຈະບໍ່ຕາຍງ່າຍໆ ດອກ ຖ້າສື່ເກົ່າບຸກແທ້ໆ.