ອີງຕາມການລາຍງານຂອງໜັງສືພິມຄວາມສະຫງົບໃຫ້ຮູ້ວ່າ: ພາຍຫຼັງຫາງສຽງຂອງສັງຄົມ ໃຫ້ຄວາມສົນໃຈ ແລະ ສົ່ງຂ່າວ ຕໍ່ການນໍາໃຊ້ສຽງຫວໍລົດກູ້ໄພ ແລະ ລົດຂອງພາກ ສ່ວນຕ່າງໆ, ບຸກຄົນ ແລະ ນິຕິບຸກຄົ ທີ່ນໍາໃຊ້ແສງ, ສີ, ສຽງຫວໍ ແລະ ຕິດຕັ້ງໄຟສັນຍານເຕືອນເທິງຫຼັງຄາລົດ ຍັງ ບໍ່ຖືກຕ້ອງ ແລະ ບໍ່ເປັນເອກະພາບຢູ່ໃນ ສປປ ລາວ ໃນປັດຈຸບັນ;

ດັ່ງນັ້ນ, ນາຍົກລັດຖະມົນຕີ ຈຶ່ງອອກຂໍ້ຕົກລົງ ວ່າດ້ວຍການກໍານົດ ແສງ, ສີ, ສຽງຫວໍ ໄຟສັນຍານເຕືອນເທິງຫຼັງຄາລົດທີ່ມີອະພິສິດ ໃນ ສປປ ລາວ ພ້ອມທັງສັ່ງ ຫ້າມລົດທີ່ມີອະພິສິດທຸກພາກສ່ວນ ນໍາໃຊ້ສຽງຫວໍ ເລີ່ມແຕ່ເວລາ 18:00-6:00 ໂມງ ຢ່າງເດັດຂາດ.

ມາໃນວັນທີ 8 ກຸມພາ 2018 ໄດ້ມີກອງປະຊຸມເຜີຍແຜ່ຂໍ້ຕົກລົງ ສະບັບເລກທີ 44/ນຍ ວ່າດ້ວຍການກໍານົດ ແສງ, ສີ, ສຽງຫວໍ ໄຟສັນຍານເຕືອນ ເທິງຫຼັງຄາລົດທີ່ມີອະພິສິດ ໃນ ສປປ ລາວ  ໃຫ້ກຽດເຂົ້າຮ່ວມໂດຍ ພົຈວ ປອ ທອງສະ ຫວັນ ວົງສະຫວັດ ຮອງຫົວໜ້າກົມໃຫຍ່ຕໍາຫຼວດກະຊວງ ປກສ ພ້ອມດ້ວຍບັນດາຕາງໜ້າກະຊວງ ສາທາລະນະສຸກ, ກູ້ໄພ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ, ພັທ ກົງສີ ສຸວັນນະຕຸ້ມ ຫົວໜ້າກົມຕໍາຫຼວດຈະລາຈອນ ໄດ້ ຂຶ້ນເຜີຍແຜ່ຂໍ້ຕົກລົງຂອງນາຍົກລັດຖະມົນຕີ ສະບັບເລກທີ 44/ນຍ ໂດຍຍົກໃຫ້ຮູ້ເຖິງການກໍານົດຫຼັກການ, ລະ ບຽບການກ່ຽວກັບການກໍານົດແສງ, ສີ, ສຽງຫວໍ, ໄຟສັນຍານເຕືອນເທິງຫຼັງຄາລົດມີອະພິສິດ ໃນ ສປປ ລາວ ໃຫ້ປະ ຕິບັດຕາມຫຼັກການດັ່ງນີ້;

1.ສໍາລັບລົດຈະລາຈອນເປີດທາງໃຫ້ຂະບວນການນໍາພັກ-ລັດ ແລະ ແຂກຕ່າງປະເທດ ແມ່ນໃຫ້ຕິດຕັ້ງໄຟສີຟ້າ ແລະ ສີແດງເທິງຫຼັງຄາລົດ ມີສຽງຫວໍ ( Wail ) ເປັນບູລິມະສິດທີ 1;

2.ສໍາລັບລົດປ້ອງກັນ ຊາດ-ປ້ອງກັນຄວາມສະຫງົບ ແມ່ນໃຫ້ຕິດຕັ້ງໄຟສີແດງເທິງຫຼັງຄາລົດ ແລະ ມີສຽງຫວໍ ( YEIP ) ເປັນບູລິມະສິດທີ 2;

3.ສໍາລັບລົດມອດໄຟ ແມ່ນໃຫ້ຕິດຕັ້ງໄຟສີແດງ ເທິງຫຼັງຄາລົດ ແລະ ມີສຽງຫວໍ ( Wail ) ເປັນບູລິມະສິດທີ 2;

4.ສໍາລັບລົດໂຮງໝໍ, ລົດກູ້ໄພ ແລະ ລົດອົງການສາກົນ ເພື່ອຄົນພິການ ປະຈໍາລາວ ແມ່ນໃຫ້ຕິດຕັ້ງໄຟສີຟ້າ ເທິງຫຼັງ ຄາລົດ ແລະ ມີສຽງຫວໍ ( Hi-Lo ) ເປັນບູລິມະສິດທີ 3;

5.ລົດຝ່າຍປະຕິບັດການໄຟຟ້າ ແມ່ນໃຫ້ຕິດຕັ້ງໄຟສີເຫຼືອງ ເທິງຫຼັງຄາລົດ ແລະ ມີສຽງຫວໍ ( YEIP ) ເປັນບູລິມະສິດທີ 4;
-ສ່ວນລົດຂອງກົມລ້ຽງສັດ ແລະ ການປະມົງ, ລົດ ນໍາໜ້າຂະບວນລົດຂົນສົ່ງສິນຄ້າ ແລະ ລົດອະນາໄມເທດສະບານ ແມ່ນໃຫ້ຕິດໄຟສີເຫຼືອງ ເທິງຫຼັງຄາລົດ ແລະ ໃຫ້ໃຊ້ສຽງແກລົດ ( ບໍ່ອະນຸຍາດໃຫ້ນໍາໃຊ້ສຽງຫວໍ ); ສະເພາະລົດແຕ່ລະພາກສ່ວນທີ່ມີອະພິສິດນໍາໃຊ້ແສງ, ສີ, ສຽງຫວໍ ນັ້ນແມ່ນບໍ່ອະນຸຍາດໃຫ້ນໍາໃຊ້ສຽງຫວໍເລີ່ມແຕ່ເວລາ 18:00-6:00 ໂມງ ຢ່າງເດັດຂາດ.

ພົຈວ ປອ ທອງສະຫວັນ ວົງສະຫວັດ ກ່າວຕື່ມວ່າ: ໃນນາມກົມໃຫຍ່ຕໍາຫຼວດ ທີ່ມີສິດ, ໜ້າທີ່ຄຸ້ມຄອງ, ກວດກາ ການຈັດຕັ້ງປະຕິບັດຂອງແຕ່ລະພາກສ່ວນໃນການນໍາໃຊ້ແສງ, ສີ, ສຽງຫວໍ, ໄຟສັນຍານເຕືອນເທິງຫຼັງຄາລົດ ຮຽກ ຮ້ອງມາຍັງທຸກພາກສ່ວນທີ່ກ່ຽວຂ້ອງຕ້ອງປະຕິບັດຕາມຂໍຕົກລົງຂອງນາຍົກລັດຖະມົນຕີວາງອອກຢ່າງເຂັ້ມງວດ ເພື່ອສາມາດຈໍາແນກໄດ້ວ່າລົດດັ່ງກ່າວເປັນຂອງພາກສ່ວນໃດ

ນອກຈາກນີ້, ຢາກໃຫ້ ລົດໂຮງໝໍ, ລົດໜ່ວຍກູ້ໄພ ແລະ ພາກສ່ວນອື່ນໆປະຕິບັດຢ່າງເຂັ້ມງວດກ່ຽວກັບການຫ້າມນໍາໃຊ້ສຽງຫວໍໃນເວລາ 18:00-6:00 ໂມງ, ຖ້າວ່າພາກ ສ່ວນໃດຫາກຝ່າຝືນຈະຖືກກ່າວເຕືອນ ຫຼື ປະຕິບັດຕາມລະບຽບທີ່ວາງອອກ

ແຫລ່ງຂ່າວ: ລາວອັບເດດ