ສຳນັກຂ່າວວຽງຈັນທາມລາຍງານວ່າ ການກໍ່ສ້າງທາງລົດໄຟລາວ-ຈີນ ຄວາມຍາວ 409 ກິໂລແມັດ ສຳເລັດແລ້ວ 20.3% ອີງຕາມຂໍ້ມູນໃນເດືອນທັນວາ 2017 ທີ່ຜ່ານມາ ຫຼັງຈາກທີ່ເລີ່ມດຳເນີນການກໍ່ສ້າງມາໄດ້ໜຶ່ງປີເຕັມ.
ໂຄງການກໍ່ສ້າງມູນຄ່າ 5,986 ລ້ານໂດລາສະຫະລັດດັ່ງກ່າວໄດ້ມີການປັບປ່ຽນວັນກໍ່ສ້າງສຳເລັດໃຫ້ໄວຂຶ້ນ 29 ວັນ ຈາກວັນທີ 31 ທັນວາ 2021 ເປັນວັນທີ 2 ທັນວາ 2021 ເຊິ່ງກົງກັບວັນຊາດຂອງ ສປປ ລາວ ຄົບຮອບ 46 ປີ ຕາມການຮ້ອງຂໍຂອງທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໂດຍໃຫ້ເຫດຜົນວ່າຕ້ອງການໃຫ້ໂຄງການດັ່ງກ່າວສຳເລັດໃນວັນຊາດປີ 2021 ເພື່ອເປັນຂອງຂວັນແກ່ປະຊາຊົນລາວ.
ໃນປັດຈຸບັນ ອຸງມົງຈຳນວນ 53 ແຫ່ງກຳລັງໄດ້ຮັບການຂຸດເຈາະ ເພື່ອໃຫ້ລົດໄຟສາມາດແລ່ນຜ່ານເຂດພູສູງໄດ້ ເຊິ່ງມາຮອດຕອນນີ້ຄວາມຍາວຂອງອຸມົງທີ່ຂຸດເຈາະແລ້ວແມ່ນ 37,314 ແມັດ ກວມເອົາ 18.8% ຂອງຄວາມຍາວທັງໝົດ 197.83 ກິໂລແມັດຂອງອຸມົງຈຳນວນ 75 ແຫ່ງ. ພ້ອມດຽວກັນນັ້ນ ຂົວຈຳນວນ 47 ແຫ່ງຈາກທັງໝົດ 167 ແຫ່ງ ກໍກຳລັງດຳເນີນການກໍ່ສ້າງ.
ແນວໃດກໍຕາມ ທ່ານ ໂພທອງ ໂງ່ນພະຈັນ ໜຶ່ງໃນຄະນະກຳມະການຄຸ້ມຄອງໂຄງການກໍ່ສ້າງທາງລົດໄຟລາວ-ຈີນ ຍອມຮັບວ່າ ຍັງບໍ່ທັນໄດ້ມີການຈ່າຍຄ່າຊົດເຊີຍຄືນໃຫ້ແກ່ຜູ້ທີ່ສູນເສຍເນື້ອທີ່ດິນ ແລະ ຊັບສິນຕາມແລວໂຄງການກໍສ້າງທາງລົດໄຟລາວ-ຈີນ ໂດຍລະບຸວ່າການທົດແທນຄືນມີຫຼາຍຂັ້ນຕອນ ແລະ ຍັງມີປັນຫາທີ່ຕ້ອງໃຊ້ເວລາໃນການແກ້ໄຂ.
ທ້າວ ວົງດາວ ໄຊຍະວົງ ປະຊາຊົນທ່ານໜຶ່ງໃນບ້ານດົງຊຽງດີ ເມືອງນາຊາຍທອງ ເຊິ່ງໄດ້ຮັບຜົນກະທົບຈາກໂຄງການກ່າວວ່າ ເຮືອນຂອງຕົນເອງຕັ້ງຢູ່ໃນແລວຂອງໂຄງການກໍ່ສ້າງທາງລົດໄຟລາວ-ຈີນ ແລະ ຕ້ອງໄດ້ຍ້າຍອອກ ແຕ່ບໍ່ສາມາດເຮັດແນວນັ້ນໄດ້ ເນື່ອງຈາກຍັງບໍ່ທັນໄດ້ຮັບຄ່າຊົດເຊີຍ.
ຕາມການລາຍງານ ປະຊາຊົນຈຳນວນ 4,411 ຄອບຄົວໃນແຂວງຫຼວງນໍ້າທາ, ອຸດົມໄຊ, ຫຼວງພະບາງ, ວຽງຈັນ ແລະ ນະຄອນຫຼວງວຽງຈັນໄດ້ຮັບຜົນກະທົບຈາກໂຄງການ ກວມເອົາເນື້ອທີ່ດິນຈຳນວນ 3,832 ເຮັກຕາ, ຕຶກອາຄານ 346 ຫຼັງ ລວມທັງເນື້ອທີ່ປູກຝັງ ແລະ ຕົ້ນໄມ້.