ສຳນັກຂ່າວເອພີ ແລະ ເອເອຟພີລາຍງານຈາກນະຄອນຫຼວງຮ່າໂນ່ຍ ປະເທດຫວຽດນາມ ເມື່ອວັນທີ 31 ມັງກອນ 2018 ວ່າ ການປະກາດຂອງລັດຖະບານຫວຽດນາມໃນນະຄອນຫຼວງຮ່າໂນຍ ມີຂຶ້ນເມື່ອ 1 ເດືອນ ຫຼັງຈາກສະມາຊິກ 15 ຄົນໃນຫວຽດນາມຂອງກຸ່ມລີ້ໄພໃນສະຫະລັດ ຖືກສານຕັດສິນໃຫ້ມີຄວາມຜິດຈາກການປະຕິບັດການລົ້ມເຫລວໃນຄວາມພະຍາຍາມໂຈຕີດ້ວຍລະເບີດ ທີ່ສະໜາມບິນນານາຊາດເຕິນເຊິນເຫມິດ ໃນເມືອງໂຮຈີມິນ ທາງພາກໃຕ້ ເຊິ່ງເປັນສະໜາມບິນທີ່ໃຫຍ່ທີ່ສຸດຂອງປະເທດ ເມື່ອເດືອນ ເມສາ 2017
ລັດຖະບານຄອມມູນິດຫວຽດນາມເຊື່ອມໂຍງປະຕິບັດການດັ່ງກ່າວກັບກຸ່ມຊາວຫວຽດນາມໃນລັດແຄລິຟໍເນຍ ສະຫະລັດອາເມລິກາ ທີ່ກໍ່ຕັ້ງລັດຖະບານພັດຖິ່ນໃນນາມ ລັດຖະບານກາງຊົ່ວຄາວຂອງຫວຽດນາມ ຫຼື ພີຊີຈີວີ (Provisional Central Government of Vietnam) ເມື່ອປີ 1993 ແລະ ມີຄວາມກ່ຽວພັນກັບອະດີດລັດຖະບານຫວຽດນາມໃຕ້ທີ່ສະຫະລັດໜູນຫຼັງ ແລະ ບໍ່ຊະນະສົງຄາມ
ເມື່ອທ້າຍເດືອນ ທັນວາ 2017 ສານໃນເມືອງໂຮຈີມິນມີຄຳພິພາກສາລົງໂທດຈຳຄຸກສະມາຊິກ 15 ຄົນຂອງ ພີຊີຈີວີ ສູງສຸດ 16 ປີ ຈາກຄວາມຜິດຖານກໍ່ການຮ້າຍ ແລະ ຕຳຫຼວດຍັງໄດ້ອອກໝາຍຈັບກຸມທ້າວ ດ໋າວ ມິນ ກວນ ຊາວຫວຽດນາມທີ່ແປງສັນຊາດເປັນສະຫະລັດ ແລະ ປະກາດຕົວເປັນນາຍົກລັດຖະມົນຕີຂອງພີຊີຈີວີ ແລະ ນາງ ລີຊາ ຝ່າມ ສະມາຊິກຂອງກຸ່ມ ຕາມຂໍ້ຫາຢູ່ເບື້ອງຫຼັງຄວາມພະຍາຍາມໂຈມຕີສະໜາມບິນເຕິນເຊິນເໝິດ
ກະຊວງຄວາມໝັ້ນຄົງສາທາລະນະຫວຽດນາມ ກ່າວໃນຖະແຫຼງການເມື່ອວັນພຸດວ່າ ພີຊີຈີວີເປັນອົງກອນກໍ່ການຮ້າຍ ຜູ້ທີ່ກ່ຽວຂ້ອງກັບກຸ່ມນີ້ ບໍ່ວ່າໃນຮູບແບບໃດ ຈະຖືວ່າເປັນຜູ້ກໍ່ການຮ້າຍ ເຊິ່ງທາງການຫວຽດນາມຈະດຳເນີນມາດຕະການຕາມກົດໝາຍ
ອີກກຸ່ມຊາວຫວຽດນາມລີ້ໄພໃນລັດແຄລິຟໍເນຍ ພັກປະຕິຮູບຫວຽດນາມ (Vietnam Reform Party) ຫຼື ຫວຽດເຕິນ ຖືກທາງການຮ່າໂນຍປະກາດໃຫ້ເປັນອົງກອນກໍ່ການຮ້າຍໃນປີ 2016 ແລະ ຖືກກ່າວຫາວ່າສົ່ງອາວຸດ ແລະ ແຜນໂຈມຕີຫວຽດນາມ