ນອກເຫນືອຈາກການເລືອກຮັບປະທານອາຫານທີ່ມີປະໂຫຍດ ແລະ ສຶກສາເບີ່ງວ່າອາຫານຊະນິດໃດມີຄຸນປະໂຫຍດທາງໂພສະນາການແລ້ວ ສິ່ງຫນື່ງທີ່ຜູ້ບໍລິໂພກຄວນຄໍານືງເຖີງເຊັ່ນກັນກໍຄື ອາຫານບາງຊະນິດກໍອາດຈະເຊື່ອມໂຍງເຖີງພາວະການເຈັບປ່ວຍ.
ນັກວິໄຈຈາກວິທະຍາໄລສາທາລະນະສຸກ ທີເຮດສ໌ ຊານ ຮາວາດ ແລະ ມະຫາວິທະຍາໄລ ບຣິກແຮມ ລວມທັງໂຮງພະຍາບານຍິງໃນເມືອງບອສຕັນ, ສະຫະລັດອາເມລິກາ ເຜີຍວ່າ ຜູ້ທີ່ມັກກິນອາຫານຊີ້ນສີແດງ, ຊີ້ນສັດແປຮູບ, ທັນຍາພືດທີ່ຜ່ານການຂັດສີ, ເຄື່ອງດື່ມທີ່ມີຣົດຫວານຫລາຍ ອາດມີແນວໂນ້ມທີ່ຈະເກີດໂຣກມະເລັງລໍາໄສ້ໃຫຍ່ ແລະ ທະວານຫນັກ, ເນື່ອງຈາກອາຫານດັ່ງກ່າວມີສ່ວນກ່ຽວຂ້ອງກັບການອັກເສບເຮື້ອຮັງ.
ຫລາຍກວ່າ 20 ປີ ທີ່ນັກວິໄຈໄດ້ສຳຫລວດພຶດຕິກຳການກິນ ແລະ ການວິນິດໄສໂລກມະເຮັງຂອງພະຍາບານຍິງຈຳນວນ 74,246 ຄົນ ແລະ ຜູ້ຊ່ຽວຊານດ້ານສຸຂະພາບຊາຍຈຳນວນ 46,804 ຄົນ ໂດຍແບ່ງອອກເປັນ 5 ກຸ່ມ ຕາມພຶດຕິກຳການກິນອາຫານປະຈຳວັນ ທີ່ອາດເຮັດໃຫ້ເກີດການອັກເສບ ນັກວິໄຈພົບວ່າອາຫານຄືສ່ວນຫນື່ງທີ່ມີແນວໂນ້ມເຮັດໃຫ້ເກີດການອັກເສບໃນກະແສເລືອດຫລາຍທີ່ສຸດ ແລະ ພົບວ່າ 32% ຂອງກຸ່ມທົດສອບມີແນວໂນ້ມຈະເປັນມະເຮັງລຳໄສ້ໃຫຍ່ ໂດຍຜູ້ຊາຍມັກກິນອາຫານຫນັກຫລາຍທີ່ສຸດ ແລະ ມີໂອກາດເກີດມະເຮັງລຳໄສ້ໃຫຍ່ປະມານ 44% ແຕ່ສຳລັບຜູ້ຍິງແມ່ນມີໂອກາດພຽງ 22%.
ປັດໄຈສ່ຽງຕໍ່ການເກີດພະຍາດມະເຮັງລຳໄສ້ໃຫຍ່ ແລະ ທະວານຫນັກ ຫລາຍສຸດນັ້ນກໍຄື ຄົນໃນຄອບຄົວມີປະຫວັດການເປັນມະເຮັງຊະນິດດັ່ງກ່າວ ຢ່າງໃດກໍຕາມ ການວິໄຈນີ້ມີຂໍ້ຈຳກັດຄື ຍັງບໍ່ແມ່ນການທົດລອງທີ່ມີການຄວບຄຸມຊື່ງອອກແບບມາເພື່ອພິສູດ ວ່າພຶດຕິກຳການບໍລິໂພກອາຫານບາງຢ່າງຈະສົ່ງຜົນໂດຍກົງຕໍ່ໂອກາດໃນການພັດທະນາເປັນມະເຮັງລຳໄສ້ໃຫຍ່ ຫລື ບໍ່?
ແຫລ່ງຂ່າວຕ່າງປະເທດ TRN