ສຳລັບ ອາການຂອງຄົົນທີ່ ເຈັບຄໍ ທຸກເຊົ້າ ຍັງຈະມີຂີ້ກະເທີຂົ້ນໜຽວ ເຮັດລຳຄານ ຄໍເພີ່ມມານໍາ ແຕ່ພໍຮອດເຂົ້າຕອນສວຍ ອາການຜິດປົກກະຕິເຫລົ່ານີ້ກໍຈະເຊົາເປັນແບບບໍ່ມີຫຍັງເກີດຂຶ້ນ ແລ້ວວົນວຽນມາແຜງລິດໃໝ່ໃນຕອນເຊົ້າຫລັງຕື່ນນອນມື້ຖັດໄປ ໃນກໍລະນີທີ່ບໍ່ກ່ຽວກັບ ຄໍອັກເສບຕິດເຊື້ອ ຫລື ອາມິດານອັກເສບ ສະແດງວ່າມີສາຍເຫດມາຈາກພູມແພ້ ຫລື ແພ້ອາກາດ ສົ່ງຜົນໃຫ້ໃນໄລຍະກາງຄືນຊຶ່ງອາກາດເຢັນລົງ ເຍື່ອໂພ້ງດັງຈະໂພງຂຶ້ນ ເພື່ອເພີ່ມພື້ນທີ່ໃນການ ອຸ່ນອາກາດທີ່ຈະເຂົ້າປອດໃຫ້ ໃຫ້ມີຄວາມອົບອຸ່ນຊຸ່ມຊື້ນບໍ່ເປັນບັນຫາກັບປອດ
ກົນໄກ ຂອງເຍື່ອໂພ້ງດັງທີ່ໂພງຂຶ້ນນັ້ນ ຫາກໂພງຫລາຍໆ ອາດເຮັດໃຫ້ຮູດັງຕັນ ຖ້າວ່າ ຍິ່ງມີນ້ຳມູກອອກມາປົນນໍາແລ້ວ ຍິ່ງເຮັດໃຫ້ຮູດັງຕັນ ອີກຢ່າງໜຶ່ງຄືເຮັດໃຫ້ຫາຍໃຈທາງດັງບໍ່ໄດ້ ຫລື ບໍ່ສະດວກ ຊຶ່ງຕາມທຳມະຊາດເມື່ອເກີດຄັດດັງ ຮ່າງກາຍຈະຖືກສັ່ງໃຫ້ອ້າປາກຫາຍໃຈ ເມື່ອອາກາດຜ່ານເຂົ້າອອກທາງຄໍ ກໍຈະເຮັດໃຫ້ຄໍແຫ້ງ ແລະ ຈະຍິ່ງແຫ້ງຫລາຍຫາກຢູ່ໃນສະພາບອາກາດເຢັນ ເຖິງແມ່ນຈະມີເມືອກທີ່ມື່ນໆ ຄອຍຖ້າເຄືອບເຍື່ອໃນຊ່ອງຄໍບໍ່ໃຫ້ແຫ້ງ ພົບສະພາບເຊັ່ນນີ້ກໍຕ້ານທານບໍ່ຢູ່ ແລະ ຍັງຈະແປສະພາບເປັນ ຂີ້ກະເທີທີ່ຕິດໃນຄໍນໍາອີກ
ວິທີແກ້ບໍ່ຢາກ ຢ່າງທີ່ຮູ້ກັນດີວ່າ ອາການເຊັ່ນນີ້ ພໍຕອນສວຍກໍຫາຍໄປ ແຕ່ລະຫວ່າງທີ່ຍັງຮູ້ສຶກ ເຈັບຄໍ ຫລັງຈາກຕື່ນນອນ ໃຫ້ດື່ມນ້ຳອຸ່ນ ນ້ຳອຸນຫະພູມຫ້ອງ ຫລືກໍ່ໄປບ້ວນປາກຖູແຂ້ວຕາມກິດຈະວັດປະຈໍາວັນ ນ້ຳທີ່ປຽກຄໍ ຈະເຮັດໃຫ້ຄໍຊຸ່ມຊື່ນ ຂີ້ກະເທີ ຈະລະລາຍລົງຄໍໄປ ອາການ ເຈັບຄໍ ກໍບັນເທົາລົງ ແຕ່ກໍລະນີທີ່ ເຈັບຄໍ ຫລາຍ ໃຫ້ດື່ມນ້ຳຮ້ອນ ເນື່ອງຈາກຄວາມຮ້ອນຈະຊ່ວຍໃຫ້ເສັ້ນເລືອດນ້ອຍໆ ໃນຄໍຂະຫຍາຍໂຕ ແລະ ກະຕຸ້ນໃຫ້ເຍື່ອຊ່ອງຄໍ ປ່ອຍເມືອກອອກມາ ລໍລ້ຽງຄໍຫລາຍຂຶ້ນ
ສ່ວນການປ້ອງກັນບໍ່ໃຫ້ ເຈັບຄໍ ຕອນເຊົ້າຫລັງຕື່ນນອນມີຫລາຍຢ່າງທີ່ຄວນປະຕິບັດ ຕົວຢ່າງ ບໍ່ນອນໃນຫ້ອງນອນ ຫລື ຢູ່ໃນຫ້ອງທີ່ອຸນຫະພູມຕ່ຳກວ່າ 25 ອົງສາເຊ ຢ່າປິ່ນພັດລົມຈີ້ໃສ່ໂຕບໍ່ວ່າສ່ວນໃດກໍຕາມ ຢ່າໃຫ້ຮ່າງກາຍຂາດນ້ຳ ໂດຍສັງເກດໄດ້ຈາກຍ່ຽວ ຖ້າມີສີສະແດງວ່າ ຮ່າງກາຍຂາດນ້ຳ ຈຶ່ງຄວນດື່ມນ້ຳຢ່າງຕ່ຳ 8ຈອກຕໍ່ມື້ ໂດຍແນະນຳໃຫ້ດື່ມທີ່ລະໜ້ອຍແບບຄ່ອຍໆກິນ