ພັນ​ໂທ ​ບົວ​ພາ ​ໄມ​ສອນ ຫົວໜ້າ​ພະ​ແນກຂົວ​ທາງ ກົມ​ໃຫຍ່​ເສນາ​ທິການ ກອງທັບ​ປະຊາຊົນ​ລາວ ຖະ​ແຫຼ​ງວ່າ​ ພິທີ​ເປີດ​ໂຄງການ​ກໍ່ສ້າງ​ເສັ້ນທາງ​ຍຸດ​ທະ​ສາດ​ລຽບ​ຕາມ​ຊາຍ​ແດນ​ລາວ​-ຫວຽດນາມ ​ໄດ້​ມີ​ຂຶ້ນ​ຢ່າງ​ເປັນ​ທາງ​ການ​ທີ່​ເມືອງ​ຊານໄຊ ​ແຂວງ​ອັດ​ຕະປື ​ເມື່ອ​ວັນ​ທີ 29 ທັນວາ 2017 ທີ່ຜ່ານມາ ​ໂດຍ​ມີ​ພົນ​ຈັດຕະວາ ສິງ​ສະຫວັດ ພົມມະ​ສັກ ຮອງ​ຫົວໜ້າ​ກົມ​ໃຫຍ່​ເສນາ​ທິການ ​ເປັນ​ປະທານໃນ​ພິທີ ຖື​ເປັນ​ໄລຍະທີ 1 ຂອງໂຄງການ ເຊິ່ງຈະ​ເປັນ​ການ​ກໍ່ສ້າງ​ຖະຫນົນ​ ຈາກ​ຈຸດ​ເລີ່​ມຕົ້ນ​ເຂດ​ສາມ​ຫຼ່ຽມ​ພັດທະນາ ​ລະຫວ່າງ​ລາວ-​ຫວຽດນາມ-​ກຳ​ປູ​ເຈ​ຍ ​ໃນເຂ​ດ​ແຂວງ​ອັດຕະປື ​ໄປ​ຫາ​ຊາຍ​ແດນ​ແຂວງ​ເຊ​ກອງ ​ໄລຍະ​ທາງ 115 ກິ​ໂລ​ແມັດ, ກວ້າງ 5 ​ແມັດ ແລະ ​ຢູ່​ຫ່າງ​ຈາກ​ເສັ້ນ​ຊາຍ​ແດນ​ລາວ-​ຫວຽດນາມ 150-200 ແມັດ.

​ກໍ່ສ້າງ​ເສັ້ນທາງ​ໃນ​ໄລຍະ​ທີ 1 ນີ້ ​ໂດຍ​ຈະ​ໃຊ້​ງົບປະມານ​ຫຼາຍ​ກວ່າ 301 ຕື້​ກີບ ​ທີ່​ລັດຖະບານ​ລາວ​ໄດ້​ອະນຸມັດ​ຮຽບຮ້ອຍ​ແລ້ວ
​ໃນ​ແຜນການ​ປະຈຳ​ປີ 2017 ​ແລະ​ຄາດ​ວ່າ ຍັງ​ຈະ​ສືບ​ຕໍ່​ອະນຸມັດ​ງົບປະມານ​ສຳ​ລັບ​ດຳ​ເນີນ​ງານ​ໄລຍະທີ 2 ຂອງ​ໂຄງການ​ໃນ​ແຜນການ​ປີ 2018 ນີ້​ອີກ​ດ້ວຍ ​ເພາະ​ລັດຖະບານ​ລາວ ​ແລະ​ຫວຽດນາມ​ຕ້ອງການ​ພັດທະນາ​ເມືອງ​ໃນ​ຕະຫຼອດ​ແນວ​ເຂດ​ຊາຍ​ແດນ​ລະຫວ່າງ 2 ປະ​ເທດ​ໃຫ້​ເປັນ​ເມືອງ​ພັດທະນາ​ຢ່າງຮອບດ້ານ​ແລະ​ມີ​ຄວາມ​ສະ​ຫງົບ​ປອດ​ໄພ 100 ​ເປີ​ເຊັນ ​ໃຫ້​ໄດ້​ໄວ​ທີ່​ສຸດ​ນັ້ນ​ເອງ.