ທາງການກຳປູເຈຍ ແຈ້ງເຕືອນປະຊາຊົນໃຫ້ເຝົ້າລະວັງການແຜ່ລະບາດຂອງເຊື້ອໄວຣັສ H5N1 ຫລັງຈາກພົບເຊື້ອດັ່ງກ່າວລະບາດຢູ່ເຂດແຊນຊຸກ ໃນນະຄອນຫລວງພະນົມເປັນ.
ຮອງເລຂາທິການ ປະຈຳກະຊວງກະສິກຳປ່າໄມ້ ແລະ ການປະມົງ ຂອງປະເທດກຳປູເຈຍກ່າວວ່າ ເມື່ອອາທິດທີ່ຜ່ານມານີ້ ເຈົ້າຫນ້າທີ່ພົບເຊື້ອໄວຣັສໄຂ້ຫວັດນົກຈາກການລົງກວດໄກ່ບ້ານຈຳນວນຫນື່ງໃນຫມູ່ບ້ານຕຶກທລາ ເຮັດໃຫ້ຕ້ອງກຳຈັດໄກ່ຈຳນວນ 135 ໂຕໃນພື້ນທີ່ດັ່ງກ່າວ, ນອກຈາກນີ້ຍັງໄດ້ສີດພົ່ນຢາຂ້າເຊື້ອໂລກໃຫ້ພື້ນທີ່ໃກ້ຄຽງທີ່ມີເຊື້ອໄວຮັສໄຂ້ຫວັດນົກ ເພື່ອຄຸ້ມກັນບໍ່ໃຫ້ເຊື້ອດັ່ງກ່າວແຜ່ລະບາດອອກໄປ. ເຊື້ອໄວຣັສດັ່ງກ່າວເກີດຂື້ນທີ່ເຂດແຊນຊຸກ ຕໍ່ຈາກແຂວງກຳປົງຈາງ ແລະ ໄພຣແວງ.
ກ່ອນຫນ້ານີ້ມີຜູ້ສົງໃສຢູ່ເຂດກຳປົງຈາງວ່າອາດຈະຕິດເຊື້ອດັ່ງກ່າວແຕ່ຜົນການກວດຢືນຢັນແລ້ວວ່າບໍ່ພົບເຊື້ອດັ່ງກ່າວໃນຮ່າງກາຍ ເຖີງຢ່າງໃດກໍຕາມປະຈຸບັນຍັງບໍ່ມີຂໍ້ມູນຂອງຜູ້ຕິດເຊື້ອໄຂ້ຫວັດນົກ H5N1 ແຕ່ກໍໃຫ້ລະມັດລະວັງການແພ່ລະບາດຂອງໄວຣັສຊະນິດນີ້ ແລະ ຄວນຫລີກລ້ຽງການຮັບປະທານສັດປີກເປັນພະຍາດ ແລະ ຂໍໃຫ້ປະຊາຊົນລາຍງານທັນທີ ຫາກພົບກໍລະນີສົງໃສວ່າມີການແພ່ລະບາດຂອງເຊື້ອໄຂ້ຫວັດນົກ.
ໄວຣັສໄຂ້ຫວັດນົກ ຫລື Avian Influenza ເກີດຈາກການທີ່ໄກ່ຕິດໄວຣັສໄຂ້ຫວັດ Avian Influenza Type A ທີ່ເກີດໃນນົກເນື່ອງຈາກເປັນເຊື້ອໄວຣັສທີ່ເກີດໃນນົກ ໄກ່ບໍ່ມີພູມຄຸ້ມກັນຈື່ງປ່ວຍ ແລະ ຕາຍ, ຄົນເຮົາຈະຕິດໄຂ້ຫວັດນົກຈາກໄກ່ໂດຍການຮັບເຊື້ອຈາກການສຳພັດໄກ່ທີ່ປ່ວຍ ຫລື ລະຫວ່າງທີ່ຂ້າ ຫລື ຄົວໄກ່ ຫລື ຮັບປະທານໄກ່ທີ່ເປັນພະຍາດ ປຸງແຕ່ງບໍ່ສຸກດີ ແລະ ນອກຈາກນັ້ນຍັງສາມາດຮັບເຊື້ອໄດ້ຈາກພື້ນທີ່ປົນເປື້ອນ.
ຄົນທີ່ໄດ້ຮັບເຊື້ອພະຍາດດັ່ງກ່າວ ສ່ວນຫລາຍແມ່ນພົບເຫັນ ແລະ ເກີດ ກັບຄົນທີ່ສຳພັດໄກ່ທີ່ປ່ວຍດ້ວຍໄວຣັສຊະນິດນີ້ 60ເປີເຊັນ ແມ່ນອາດເສຍຊີວິດ.
ທັງນີ້ ໄວຣັສ H5N1 ເປັນຕົ້ນເຫດເຮັດໃຫ້ປະຊາຊົນກຳປູເຈຍເສຍຊີວິດມາແລ້ວ 4 ຄົນ ໃນປີ 2014 ແລະ ອີກ 14 ຄົນ ໃນປີ 2015.
ແຫລ່ງຂ່າວຕ່າງປະເທດ TNA