ຕອນທີ 2 ຫວໍ ສີ໋ ຮວນ ຫນີ່

ຕອນຫົວຄ່ຳວັນເສົາໂທນີໄດ້ອອກໄປຮ້ານເກມ ແລະ ກໍ່ໄດ້ພົບກັບ ສອນໄຊ ເພື່ອນຮ່ວມຫ້ອງທີ່ກຳລັງຈິງຈັງກັບການຫຼິ້ນເກມ Point Blank ໂທນີໄດ້ໄປນັ່ງລົງຂ້າງໆສອນໄຊ ໃນຂະນະນັ້ນສອນໄຊຖືກຍິງຕາຍ (ໃນເກມ) ເລີຍອຸທານອອກໄປວ່າ “ແມ໊ງເອີ້ຍ” ແລ້ວສອນໄຊກໍ່ພົບວ່າຊາຍທີ່ນັ່ງຂ້າງໆລາວນັ້ນ ແມ່ນໂທນີມາດນິ້ງນັ້ນເອງ ສອນໄຊຊວນໂທນີລວມທີມຫຼິ້ນເກມນັ້ນກັນແບບບໍ່ຈິງຈັງ ແລະ ໂທນີກໍ່ຕອບຕົກລົງລວມທີມ ເຊິ່ງມັນເຮັດໃຫ້ສອນໄຊເຖິງກັບຄ້າງ ເພາະບໍ່ນຶກວ່າການຊວນຫຼິ້ນໆຂອງລາວໂທນີຈະຮັບປາກຫຼິ້ນນຳແທ້ ທັງສອງໄດ້ຮ່ວມກັນຕໍ່ສູ້ໃນເກມຈົນຜ່ານໄປຫຼາຍດ່ານ ຜ່ານໄປ 2 ຊົ່ວໂມງ ດວງຕາເວັນກຳລັງຈະລັບຂອບຟ້າຄວາມມືດກໍ່ຄືບຄານເຂົ້າມາ ຫຼັງຈາກຫຼິ້ນເກມຈົບກ່ອນຈະແຍກຍ້າຍກັນກັບເຮືອນ
ສອນໄຊ: ສີມືບໍ່ທຳມະດາໃດ໋ເຈົ້ານິ
ໂທນີ: ຍ້ອງເກີນໄປ ເຈົ້າກໍ່ຄືກັນ
ສອນໄຊ: ມື້ນີ້ເຮົາຫຼິ້ນເກມນຳກັນແລ້ວ ຕໍ່ໄປເຮົາກໍ່ເປັນໝູ່ກັນລະເດີ້! ມື້ໜ້າເຮົາມາຫຼິ້ນນຳກັນອີກ ໂອເຄບໍ່
ໂທນີ: ໂອເຄ

ທີ່ໂຮງຮຽນຫ້ອງ 5/1 ຈະມີການເລືອກຕັ້ງຄະນະຫ້ອງ ສາວໆໃນຫ້ອງລົງຄວາມເຫັນເລືອກໂທນີເປັນຄະນະຫ້ອງ ແຕ່ໂທນີກໍ່ປະຕິເສດ ເຊິ່ງມັນເຮັດໃຫ້ສອນໄຊຮູ້ສຶກເສຍດາຍ ດັ່ງນັ້ນ ທີ່ຮ້ານອາຫານຂອງໂຮງຮຽນໃນລະຫວ່າງທີ່ພວກເຂົານັ່ງດື່ມນ້ຳ ສອນໄຊ ຈິ່ງໄດ້ເອີ່ຍຖາມໂທນີດ້ວຍຄວາມສົງໃສ
ສອນໄຊ: ໂທນີ! ເປັນຫຍັງເພິ່ນຈິ່ງບໍ່ຍອມຮັບຕຳແໜ່ງຄະນະຫ້ອງ
ໂທນີ: ເປັນຕຳແໜ່ງທີ່ໜ້າເບື່ອ
ສອນໄຊ: ເຮີ້ຍ! ຕຳແໜ່ງນີ້ບໍ່ແມ່ນວ່າໃຜຢາກເປັນກໍ່ຈະໄດ້ເປັນໃດ໋ ຖ້າບໍ່ໄດ້ຮັບການຍອມຮັບຈາກຄົນໃນຫ້ອງ
ໂທນີ: ເປັນຄະນະຫ້ອງ ຕ້ອງຮັບຜິດຊອບຫຼາຍຢ່າງ ເຊິ່ງເຮົາບໍ່ມັກ
ສອນໄຊ: ມັນກໍ່ແມ່ນຄວາມໂຕ

ໃນຂະນະທີ່ໂທນີ ແລະ ສອນໄຊກຳລັງນັ່ງດື່ມນ້ຳ, ຂະໜົມລົມກັນຢູ່ນັ້ນ ກໍ່ມີສຽງຫົວດັງຂຶ້ນຈາກດ້ານຫຼັງໄກໆ ໂທນີໄດ້ຫັນໄປເບິ່ງ ກໍ່ເຫັນມາລີກຳລັງຍາດກິນຂະໜົມກັບເກສອນ ແລະ ຍັງມີຜູ້ຊາຍອີກຄົນ (ມັງກອນ) ທີ່ກຳລັງຊູຊີໃຫ້ມາລີກິນຂະໜົມຂອງຕົນເອງໃຫ້ໄດ້ ໂທນີເຫັນພາບແລ້ວເຖິງກັບຖອນຫາຍໃຈກ່ອນຈະລຸກຍ່າງອອກຈາກຮ້ານໄປພ້ອມກັບສອນໄຊ ໂດຍທີ່ມາລີຍັງມົວແຕ່ຍາດກິນຂະໜົມກັບເກສອນແບບເດັກນ້ອຍຫຼິ້ນກັນຢູ່

ໃນເວລາຮຽນດ້ວຍຄວາມທີມາລີຢາກເຫັນໜ້າໂທນີ ມາລີຈິ່ງໄດ້ຫາເລື່ອງຄອບຄູອອກໄປຫ້ອງນ້ຳເປັນປະຈຳ ພໍດີທາງໄປຫ້ອງນ້ຳຕ້ອງຜ່ານຫ້ອງ 5/1 ເຊິ່ງມັນເປັນໂອກາດດີທີ່ມາລີຈະໄດ້ຍ່າງຜ່ານ ແລະ ແອບເບິ່ງໂທນີທັງຂາໄປ-ຂາກັບ

ພາກບ່າຍມື້ນີ້ຫ້ອງ 5/1 ມີວິຊາພາລະສຶກສາ ນັກຮຽນຕ່າງນຸ່ງຊຸດກິລາມາລົງເດີ່ນ ໂທນີໃນຊຸດກິລາຫລໍ່ບາດໃຈສາວ ດ້ວຍຄວາມສູງ 183 ຊມ, ຫຸ່ນນາຍແບບ ໜ້າຕີ໋ເກົາຫຼີຜິວຂາວນ້ຳນົມ ແຖມຍັງມີກິ່ນກາຍທີ່ຫອມຫວນຊວນຫຼົງໄຫຼເຮັດໃຫ້ສາວໆທັງໃນຫ້ອງນອກຫ້ອງກີ໊ດກ໊າດແທບບໍ່ເປັນອັນຮຽນ ແນ່ນອນວ່າມາລີຜູ້ທີ່ເປັນເອັບຊີຕົວແມ່ຂອງໂທນີກໍ່ບໍ່ພາດທີ່ຈະສົ່ງສາຍຕາຈອບເບິ່ງໂທນີຜ່ານປ່ອງຢຽມຂອງຫ້ອງດ້ວຍໃຈຈົດຈໍ່

ຫ້ອງ 5/6 ຮຽນເລກ ມາລີວັນນີ້ຖືກລົງໂທດເພາະມົວແຕ່ເບິ່ງໂທນີຈົນບໍ່ຕັ້ງໃຈຟັງຄູອະທິບາຍ ແລະ ຍັງແກ້ໂຈດເລກບໍ່ໄດ້ ຄູຈິ່ງໃຫ້ມາລີອອກມາຢືນຂາດຽວນອກຫ້ອງ ແຕ່ນັ້ນກໍ່ບໍ່ໄດ້ສ້າງຄວາມທຸກໃຈໃຫ້ມາລີເລີຍຈັກໜ້ອຍ ຊ້ຳບໍ່ໜຳມາລີຍັງຍິນດີກັບການຖືກລົງໂທດໃນຄັ້ງນີ້ ມັງກອນຄິດຢ້ານວ່າມາລີຈະຮູ້ສຶກອາຍກັບການທີ່ຕ້ອງຖືກລົງໂທດຄົນດຽວລາວຈິ່ງຫາເລື່ອງອາສາອອກໄປແກ້ເລກ ແລະ ກໍ່ແກ້ໂຈດເລກບໍ່ໄດ້ ຄູກໍ່ເລີຍລົງໂທດມັງກອນໂດຍການໃຫ້ມາຢືນໜ້າຫ້ອງຄູ່ກັບມາລີ
ມັງກອນກ່າວດ້ວຍຮອຍຍິ້ມ: ມີຄົນມາຢືນເປັນເພື່ອນແລ້ວສະບາຍໃຈຂຶ້ນບໍ່
ມາລີຖອຍຫາຍໃນແລ້ວຕອບກັບໄປສັ້ນໆ: ອື
ມັງກອນເບິ່ງມາລີ ມາລີເບິ່ງໂທນີ ສ່ວນໂທນີກໍ່ຕັ້ງໃຈແອບຊ້ອມກິລາກັບເພື່ອນໆໃນຫ້ອງຢ່າງມີຄວາມສະນຸກສະໜານ

ຄະແນນເສັງປະຈຳເດືອນອອກມາແລ້ວທີ່ຫ້ອງ 5/1 ເດືອນນີ້ໂທນີໄດ້ເປັນທີ 1 ຂອງຫ້ອງ ແລະ ມີຄະແນນທີ່ສູງທີ່ສຸດໃນຊັ້ນ ມ5 ສ່ວນມາລີຫ້ອງ 5/6 ເກືອບໄດ້ຄະແນນຕ່ຳທີ່ສຸດໃນຫ້ອງ ເຫຼືອພຽງ 5 ຄົນກໍ່ຈະເປັນທີ່ສຸດທ້າຍ ແລະ ເກືອບຈະໄດ້ຄະແນນທີ່ຕ່ຳທີ່ສຸດໃນໂຮງຮຽນ

ທີ່ເຮືອນໂທນີເອົາປື້ມຕິດຕາມໄປໃຫ້ພໍ່ແມ່ເຊັນຕ່າງກໍ່ໄດ້ຮັບຄຳຊົມເຊີຍຈາກພໍ່ແມ່ ຜິດຈາກທາງມາລີເມື່ອພໍ່ແມ່ເຫັນຜົນຄະແນນເຖິງຂັ້ນດົມຢາດົມທັນທີ ເພາະຄະແນນຕົກຕ່ຳເຖິງຂັ້ນສຸດ
ພໍ່ຫວັນ (ພໍ່ຂອງມາລີ): ພໍ່ກັບແມ່ປຶກສາກັນວ່າຈະໃຫ້ລູກຮຽນເພີ່ມ
ມາລີ: ຮຽນເພີ່ມ
ແມ່ມະລິ (ແມ່ມາລີ): ບໍ່ຕ້ອງສຽງສູງ! ລູກຕ້ອງຮຽນເພີ່ມທຸກວິຊາ
ມາລີ: ທຸກວິຊາ
ພໍ່ຫວັນ: ບໍ່ຕ້ອງເຮັດສຽງສູງ ຕາຊວດຕົກໃຈໄປດອກທີ່ລູກໄດ້ຍິນບໍ່ຜິດດອກ
ມາລີ: ແຕ່ວ່າ…
ແມ່ມະລິ: ບໍ່ມີແຕ່! ເອົາຕາມນັ້ນ

ທີ່ໂຮງຮຽນເລື່ອງທີ່ຕອນນີ້ຄະແນນຂອງໂທນີມີອັນດັບສູງສຸດຂອງຊັ້ນ ມ5 ໄດ້ແຜ່ລາມໄປທົ່ວ ສາວໆຕ່າງກໍ່ຍ້ອງຍໍ ແລະ ເພີ່ມທະວີຄວາມປື້ມປິຕິກັນເຂົ້າໄປອີກ ເລື່ອງນີ້ໄດ້ຜ່ານຫູຂອງມາລີແລ້ວເຮັດໃຫ້ຮູ້ສຶກຫງຸດງິດ ເພາະຕອນນີ້ສະຖານະການບໍ່ຄ່ອຍດີ ເນື່ອງຈາກມີກອງທັບຄູ່ແຂ່ງເຕັມຫ້ອງຮຽນ ບໍ່ວ່າຈະເປັນຍິງແທ້ຍິງທຽມເຕັມໄປໝົດ

ເຖິງແມ່ນວ່າບໍ່ຮອດວັນວາເລັນທາຍແຕ່ໂທນີກໍ່ໄດ້ຂອງຂວັນຂອງກິນຈາກສາວໆຕະຫຼອດ ແລະ ຄົນທີ່ໂຊກດີໄດ້ຮັບຊັບຕໍ່ກໍ່ຄືສອນໄຊ ເພາະຂອງເຫຼົ່ານັ້ນໂທນີບໍ່ເຄີຍເອົາກັບບ້ານທັງໝົດແມ່ນຍົກໃຫ້ສອນໄຊ

ໃນຊ່ວງວັນຄູທາງໂຮງຮຽນໄດ້ຈັດກິດຈະກຳກິລາ ແລະ ສີລະປະ ວັນນີ້ກໍ່ເປັນການແຂ່ງກີລາບາສລະຫວ່າງຫ້ອງ 5/6 ກັບ ຫ້ອງ 5/1 ພົບກັນໃນຮອບຊິງ ມາລີກັບເກສອນພ້ອມດ້ວຍກອງເຊຍກໍ່ມາຮັບຊົມທີ່ຂ້າງສະໜາມ ເຖິງຈະເປັນການພົບກັນຂອງຫ້ອງ5/6 ກັບ 5/1 ແຕ່ເບິ່ງກອງເຊຍສາວໆແລ້ວ ເຫັນໄດ້ຢ່າງຊັດເຈນວ່າຕ່າງກໍ່ເທໃຈເຊຍນັກກີລາບາສຫ້ອງ 5/1 ໂດຍສະເພາະພວກເຂົາຕ່າງຮ້ອງເຊຍໃຫ້ກຳລັງໃຈໂທນີດັງລັ່ນສະໜາມແຂ່ງບາສ ດ້ວຍເກມການຫຼິ້ນທີ່ເໜືອຊັ້ນກວ່າທີມ 5/1 ກໍ່ເປັນຝ່າຍຊະນະໄດ້ແຊັມປີນີ້ໄປ ເຮັດໃຫ້ມາລີດີໃຈຈົນອອກນອກໜ້າຈົນບໍ່ໄດ້ສົນໃຈທີ່ຈະໄປເບິ່ງມັງກອນທີ່ນັ່ງຫາຍໃຂເຫມື່ອຍທີ່ຂ້າງສະໜາມ

ທີ່ຫ້ອງນອນຂອງມາລີ, ມາລີນັ່ງຄ້ຳແກ້ມທີ່ໂຕະອ່ານໜັງສື ແລ້ວແນມໄປເບິ່ງທີ່ປ່ອງຢຽມຫ້ອງນອນຂອງໂທນີ ດ້ວຍຄວາມມັກທີ່ລຶກຊຶ້ງ ຈົນກາຍເປັນຄວາມຮັກທີ່ຢາກບອກແຕ່ຕິດໃຈໜຶ່ງກໍ່ບໍ່ກ້າບອກໄປຕົງໆແບບລັກສະນະເປີດເຜີຍຈົນເກີນໄປ ເພາະຫວັ່ນໄຫວຢ້ານໜ້າແຕກ ຢ້ານຄົນອື່ນຮູ້ ດັ່ງນັ້ນ ມາລີຈິ່ງໄດ້ປຶກສາກັບ ກູໂກ ຜູ້ຮູ້ທຸກຢ່າງໃນໂລກນີ້ ມາລີໄດ້ຄົ້ນຫາຄຳບອກຮັກຄຳສາລະພາບຮັກເປັນພາສາຕ່າງໆໃນອິນເຕີເນັດ ໂດຍທີພຶມພຳຢູ່ຄົນດຽວ
ມາລີ: I Like you (ຂ້ອຍມັກເຈົ້າ), I Love u (ຂ້ອຍຮັກເຈົ້າ), ຫວໍ ອ້າຍ ຫນີ່ (ຂ້ອຍຮັກເຈົ້າ), ຊະລ່າງເຮໂຢ (ຂ້ອຍຮັກເຈົ້າ) ບໍ່ໄດ້ບໍ່ໄດ້! ຄຳພວກນີ້ໃຜໆກໍ່ຮູ້ ມັນໂຈ່ງແຈ້ງເກີນໄປ! ຕ້ອງຫາຄຳໃໝ່
ແລະ ໃນທີສຸດມາລີກໍ່ເຫັນຄຳວ່າ “ຫວໍ ສີ໋ ຮວນ ຫນີ່” (ຂ້ອຍມັກເຈົ້າ) ມາລີຍິ້ມແບບມີໄນແອບແຝງ ແລະ ກໍ່ຕົກລົງເລືອກໃຊ້ຄຳນີ້ ເພາະຄິດວ່າຄົງບໍ່ມີໃຜຮູ້ຈັກຄຳນີ້ລວມທັງໂທນີກໍ່ຄົງຈະບໍ່ຮູ້ຄວາມໝາຍຂອງຄຳນີ້ຄືກັນ

ເຊົ້າວັນຕໍ່ມາທີ່ໂຮງຮຽນລະຫວ່າງໂທນີກຳລັງຈະຍ່າງເຂົ້າຫ້ອງ ມາລີກໍ່ຟ້າວຍ່າງກາຍແລ້ວເວົ້າຄຳວ່າ (ຫວໍ ສີ໋ ຮວນ ຫນີ່) ແລ້ວກໍ່ຟ້າວຍ່າງຈາກໂທນີໄປແບບເຂີນໆ ໂທນີເມື່ອໄດ້ຍິນຄຳນີ້ກໍ່ຢຸດຈຶກພ້ອມທັງເບິ່ງມາລີທີ່ກຳລັງຍ່າງຈາກໄປ

ນັບຈາກນັ້ນມາລີກໍ່ເລີ່ມເວົ້າຄຳນີ້ກັບໂທນີເລື່ອຍໆ ໃນທຸກຄັ້ງທີ່ພົບກັນ (ໂທນີ! ຫວໍ ສີ໋ ຮວນ ຫນີ່) ຈົນເຮັດໃຫ້ໂທນີຢາກລົບໜ້າມາລີໄປໃຫ້ໄກໆ ແຕ່ກໍ່ບໍ່ພົ້ນ ຢູ່ເຮືອນບາງເທື່ອກໍ່ພົບກັນໂດຍບັງເອີນ ຢູ່ໂຮງຮຽນອີກ ບາງຄືນໂທນີຕ້ອງຕື່ນຂື້ນກາງເດິກເພາະຕົກໃຈທີ່ມາລີຕາມມາຫຼອກຫຼອນຕົນຮອດໃນຄວາມຝັນ