ຮູບເງົາສັ້ນ ຂອງນັກຮຽນລາວເລື່ອງ “ໂອກາດ” ໄດ້ຮັບລາງວັນດີເດັ່ນ ແລະ ເລື່ອງຄູສາຍພັນ ໃໝ່ ໄດ້ຮັບລາງວັນຊະນະເລີດ ໃນງານແຂ່ງຂັນຮູບເງົາ ເດັກນ້ອຍສາກົນ-ອາຊີ, ຊຶ່ງໄດ້ມີຂຶ້ນໃນວັນທີ 25 ພະ ຈິກ 2017 ຜ່ານມາ ທີ່ປະເທດຍີ່ປຸ່ນ. ໃນຂະນະທີ່ ເລື່ອງ “ແກະດຳ” ໄດ້ຮັບລາງວັນຊະນະເລີດ ປະເພດພູມໃຈໃນຕົວເອງ ແລະ ເລື່ອງ “ຄູບ້ານນອກ” ໄດ້ຮັບລາງວັນຊະນະເລີດ ປະເພດພູມໃຈໃນຄອບຄົວ ໃນການແຂ່ງຂັນຮູບເງົາເດັກນ້ອຍອາຊຽນ ຄັ້ງທີ I ທີ່ໄດ້ຈັດຂຶ້ນ ຢູ່ປະເທດຟີລິບປິນ ໃນລະຫວ່າງ ວັນທີ 27-30 ພະ ຈິກ 2017 ພາຍໃຕ້ຫົວຂໍ້ “ພູມໃຈໃນຕົວເອງ, ຄຸນຄ່າຂອງຄອບຄົວ ແລະ ຮີດຄອງປະເພນີ ” ຈາກຈຳນວນຜູ້ສົ່ງເຂົ້າແຂ່ງຂັນທັງໝົດ 107 ເລື່ອງ ໃນ 10 ປະເທດອາຊຽນ.
ໃນວັນທີ 27 ທັນວາ 2017 ທີ່ກົມຮູບເງົາ, ໄດ້ຈັດພິທີຖະແຫລງຂ່າວ ກ່ຽວກັບຜົນສຳເລັດ ການເຂົ້າຮ່ວມແຂ່ງຂັນຮູບເງົາສັ້ນ ຂອງ ເດັກນ້ອຍນັກຮຽນລາວ ຢູ່ທີ່ປະເທດຍີ່ປຸ່ນ ແລະ ຟີລິບປິ່ນ, ໂດຍການເປັນປະ ທ່ານຂອງທ່ານ ວິທູນ ສຸນດາລາ ຮັກສາການຫົວໜ້າກົມຮູບເງົາ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ມີບັນດາຄູອາຈານ, ນັກຮຽນ ພ້ອມດ້ວຍສື່ມວນຊົນເຂົ້າຮ່ວມ.
ທ່ານ ວິທູນ ສຸນດາລາ ກ່າວວ່າ: ໂຄງການແຂ່ງຂັນຮູບເງົາເລື່ອງສັ້ນ ສຳລັບນັກຮຽນມຕົ້ນ ແລະ ມ ປາຍ ເພື່ອຄັດເລືອກເອົາຮູບເງົາດີເດັ່ນ ເຂົ້າຮ່ວມແຂ່ງຂັນ ໃນງານມະຫາກຳຮູບເງົາ ເດັກນ້ອຍສາກົນ-ອາຊີ ທີ່ປະເທດຍີ່ປຸ່ນ, ຊຶ່ງໃນປີນີ້ ທາງຄະນະກຳມະການຈັດງານ ໄດ້ຕັ້ງຫົວຂໍ້ຂອງການແຂ່ງຂັນວ່າ “ຄູໃນໂຮງຮຽນຂອງຂ້ອຍ (School Teacher)” ພາຍຫລັງຄັດເລືອກເອົາຮູບເງົາ 3 ເລື່ອງ ຄື: ຄູສາຍພັນໃໝ່, ໂອກາດ ແລະ ສໍດຳ ຈາກ 51 ທິມ ທີ່ມາຈາກໂຮງຮຽນມັດທະຍົມຕ່າງໆ ໃນທົ່ວປະເທດ ເພື່ອເປັນຕົວແທນຂອງປະເທດລາວ ເຂົ້າແຂ່ງຂັນ.
ໃນໂອກາດດັ່ງກ່າວ, ທ່ານ ວິທູນ ສຸນດາລາ ໄດ້ປະກາດແຈ້ງການຊັກຊວນພໍ່ແມ່, ຄູອາຈານ ແລະ ນັກຮຽນທົ່ວປະເທດ ກຽມພ້ອມ, ສໍາລັບການຜະລິດ ແລະ ສົ່ງຮູບເງົາສັ້ນເຂົ້າແຂ່ງຂັນໃນປີ 2018, ຊຶ່ງຈະຈັດຂຶ້ນ ທີ່ປະເທດສິງກະໂປ.