ວັນທີ 14 ພະຈິກ 2017 ນີ້ ຢູ່ທີ່ໂຮງໝໍມະໂຫສົດ ໄດ້ມີພິທີວາງສິລາເລີກ ການກໍ່ສ້າງໂຮງໝໍມະໂຫສົດຫຼັງໃໝ່ຂຶ້ນ ໂດຍໃຫ້ກຽດເຂົ້າຮ່ວມວາງສິລາເລີກຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ພັກປະຊາຊົນປະຕິວັດລາວ, ປະທານປະເທດລາວ ແລະສະຫາຍ ສີ ຈິ້ນຜິງ ເລຂາທິການໃຫຍ່ພັກຄອມມູນິດຈີນ, ປະທານປະເທດຈີນ ພ້ອມດ້ວຍຄະນະນຳທັງສອງຝ່າຍ (ລາວ-ຈີນ) ເຂົ້າຮ່ວມ.
ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ລາຍງານວ່າ ໂຄງການກໍ່ສ້າງໂຮງໝໍມະໂຫສົດຫລັງໃໝ່ ເປັນໂຮງໝໍຂະໜາດໃຫຍ່ແລະມີຄວາມທັນສະໄໝສູງ ເຊິ່ງປະກອບມີ 600 ຕຽງ, ສູງ 8 ຊັ້ນ, ເນື້ອທີ່ດິນກໍ່ສ້າງ 31 ພັນຕາແມັດ, ພື້ນທີ່ຊົມໃຊ້ 54 ພັນຕາແມັດ, ລວມມູນຄ່າການກໍ່ສ້າງທັງໝົດ 600 ລ້ານກວ່າຢວນ ຫຼື ປະມານ 751,8 ຕື້ກີບ ( 1 ຢວນ = 1.253 ກີບ) ຄາດວ່າຈະສ້າງສຳເລັດໃນປີ 2020.
ໂຄງການດັ່ງກ່າວ, ເປັນໂຄງການຂະໜາດໃຫຍ່ທີ່ສຸດ, ຈຳນວນຕຽງ ແລະ ມູນຄ່າການກໍ່ສ້າງຫລາຍທີ່ສຸດທີ່ລັດຖະບານຈີນ ໄດ້ໃຫ້ການຊ່ວຍເຫລືອໃນການກໍ່ສ້າງໂຮງໝໍແກ່ຕ່າງປະເທດ.
ໂຮງໝໍມະໂຫສົດຫຼັງໃໝ່ ຈະສ້າງຂຶ້ນໃນບໍລິເວນດຽວກັນກັບໂຮງໝໍມະໂຫສົດໃນປັດຈຸບັນ ໂດຍຄ່ອຍໆສ້າງໄປເທື່ອລະອາຄານແລະມ້າງໄປເທື່ອລະອາຄານ.
ແຫຼ່ງຂ່າວ: ສຳນັກຂ່າວສານປະເທດລາວ