ທ່ານ ສີ ຈິ້ນຜິງ ເລຂາທິການໃຫຍ່ ຄະນະບໍລິຫານງານ ສູນກາງພັກກອມມູນິດຈີນ, ປະທານປະເທດ ແຫ່ງ ສາທາລະນະລັດ ປະຊາຊົນຈີນ ຈະເດີນທາງມາຢ້ຽມຢາມ ທາງລັດຖະກິດ ສາທາລະນະລັດ ປະຊາທິປະໄຕ ປະຊາຊົນລາວ ໃນລະຫວ່າງວັນ 13-14 ພະຈິກ 2017.
ທ່ານ ສີ ຈິ້ນຜິງ ໄດ້ຖືກເລືອກໃຫ້ດຳລົງຕຳແໜ່ງ ເລຂາທິການໃຫຍ່ພັກກອມມູນິດຈີນອີກໜຶ່ງສະໄໝ ໃນກອງປະຊຸມໃຫຍ່ຂອງພັກກອມມູນິດຈີນ ຄັ້ງທີ XIX ທີ່ຈັດຂຶ້ນໃນທ້າຍເດືອນຕຸລາ 2017 ທີ່ຜ່ານມາ. ສົ່ງຜົນໃຫ້ທ່ານ ສີ ຈິ້ນຜິງ ກາຍເປັນຜູ້ນຳຈີນທີ່ຊົງອິດທິພົນທີ່ສຸດໃນຮອບຫຼາຍທົດສະວັດ.
“ການຢ້ຽມຢາມລາວໃນຄັ້ງນີ້, ເປັນນິມິດໝາຍທີ່ສຳຄັນ ສຳລັບສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ. ສປ ຈີນ ໄດ້ຖືຄວາມສຳຄັນຢ່າງສູງ ຕໍ່ການຜັນຂະຫຍາຍ ສາຍພົວພັນ ແລະ ການເປັນຄູ່ຮ່ວມ ຍຸດທະສາດຮອບດ້ານ ລະຫວ່າງ ສອງປະເທດ ຈີນ-ລາວ. ພາຍຫລັງກອງປະຊຸມໃຫຍ່ ຄັ້ງທີ XIX ຂອງພັກກອມມູນິດຈີນ ສໍາເລັດລົງ, ທ່ານ ສີ ຈິ້ນຜິງ ໃນຖານະເປັນເລຂາທິການໃຫຍ່ ຂອງຄະນະບໍລິຫານງານ ສູນກາງພັກ ກອມມູນິດຈີນ ໄດ້ເລືອກເອົາ ສປປ ລາວ ເປັນປະເທດ ທຳອິດໃນການຢ້ຽມ ຢາມຢ່າງເປັນທາງການ” ທ່ານ ຫວາງ ເວີນ ທ່ຽນ ເອກອັກຄະລັດ ຖະທູດ ສປ ຈີນ ປະຈຳ ສປປ ລາວ ໃຫ້ສຳພາດຕໍ່ສື່ມວນຊົນລາວ ແລະ ຈີນ ໃນວັນທີ 7 ພະຈິກ ວານນີ້.
ທ່ານ ຫວາງ ເວີນ ທ່ຽນ ກ່າວຕື່ມວ່າ: “ສປ ຈີນ ຍິນດີຈະສືບຕໍ່ເປັນກຳລັງໜູນ ທີ່ເຂັ້ມແຂງໃຫ້ແກ່ພັກ ແລະ ລັດຖະບານ ຂອງປະເທດລາວ ໃນການສະໜັບສະໜູນ ຕໍ່ພາລະກິດປະຕິຮູບໃໝ່ ແລະ ການສ້າງສັງຄົມນິຍົມ ຂອງພັກປະຊາຊົນ ປະຕິວັດລາວ, ພ້ອມຈະສະໜັບສະໜູນ ສປປ ລາວ ໃນການພັດທະນາ ໃຫ້ເໝາະສົມກັບສະພາບຕົວຈິງຂອງປະເທດ. ການມາຢ້ຽມຢາມໃນຄັ້ງນີ້, ຍັງຈະເປັນການ ວາງແຜນຍຸດທະສາດ ແຫ່ງການພັດທະນາຮ່ວມກັນ ສຳລັບສາຍພົວພັນ ຂອງສອງປະເທດໃນໄລຍະໃໝ່, ກຳນົດທິດທາງການຮ່ວມມື ໃນອະນາຄົດ ທັງເປັນການ ຜັນຂະຫຍາຍສາຍພົວພັນ ແລະ ການເປັນຄູ່ຮ່ວມ ຍຸດທະສາດຮອບດ້ານ ລະຫວ່າງ ປະເທດທີ່ມີລັກສະນະ ໄວ້ເນື້ອເຊື້ອໃຈ, ຊ່ວຍເຫລືອ ແລະ ຕ່າງຝ່າຍຕ່າງໄດ້ຮັບ ຜົນປະໂຫຍດ. ນອກຈາກນັ້ນ, ທ່ານເອກອັກຄະລັດຖະທູດ ຍັງຕີລາຄາເຖິງ ຄວາມສຳຄັນຂອງການມາຢ້ຽມຢາມຄັ້ງນີ້ ເພາະວ່າຈະເປັນການຊຸກຍູ້ ການພັດ ທະນາຂອງສັງຄົມນິຍົມ ແລະ ຄວາມຈະເລີນຮຸ່ງເຮືອງ ຂອງສອງປະເທດ ໃນໄລຍະໄໝ່“.
ແຫຼ່ງຂ່າວ: ຊິວຫົວ ແລະ ຂປລ