ຕອນເຊົ້າມື້ຂຶ້ນ 15 ເດືອນ 12 ກົງກັບວັນທີ 3 ພະຈິກ 2017 ທົ່ວທຸກທ້ອງຖະໜົນທີ່ມົ່ງໜ້າໄປທາດຫຼວງ ອັ່ງອໍໄປດ້ວຍລົດລາພະຫະ ສ່ອງແສງໃຫ້ເຫັນ 2 ທາງຂອງຄວາມຈະເລີນ ຄືຈະເລີນທາງດ້ານວັດຖຸແລະຈະເລີນທາງດ້ານຈິດໃຈ.
ເປັນປະຈຳທຸກໆ ປີ ເມື່ອຮອດມື້ ຂຶ້ນ 14 ຄໍ່າເດືອນ 12 ຕອນບ່າຍແກ່ໆ ປະຊາຊົນລາວທົ່ວປະເທດ ໂດຍສະເພາະແມ່ນຊາວນະຄອນຫຼວງວຽງຈັນ ຈະພ້ອມກັນແຕ່ງຊຸດລາວ ນຸ່ງເຄື່ອງໄໝບ່ຽງແພ ແລະຖືຜາສາດເຜີ້ງ, ຕົ້ນກັນລະພຶກ ຫຼືຂັນໝາກເບັງ ຍ່າງເຂົ້າສູ່ເດິ່ນພະທາດຫຼວງ ໂດຍບໍ່ໄດ້ມີນັດໝາຍຫຼືຈັດຕັ້ງກັນ ແຕ່ລະຄົນແມ່ນມາດ້ວຍສັດທາ ທຸກຄົນສາມາດເຂົ້າຮ່ວມໄດ້ ຈະນ້ອຍ ໃຫຍ່ ທຸກຍາກ ຫຼືລໍ່າລວຍ ງານນີ້ສະເໝີພາບ ເສລີພາບ. ມື້ນີ້ແມ່ນເພິ່ນໄປແຫ່ຜາສາດເຜີ້ງ ເພື່ອເຂົ້າບູຊາຫຼືນະມັດສະການພະທາດຫຼວງ ເຊິ່ງເປັນມິ່ງຂວັນຂອງຄົນລາວທັງສອງຟາກຝັ່ງແມ່ນໍ້າຂອງ ກໍຄືຂອບເຂດຂອງອານາຈັກລາວລ້ານຊ້າງໃນເມື່ອກ່ອນ.
ຕອນເຊົ້າຂອງມື້ຂຶ້ນ 15 ຄໍ່າ ເດືອນ 12 ຊາວພຸດທົ່ວທຸກສາລະທິດ ພ້ອມກັນກະກຽມເຄື່ອງພັດຕາຫານ ມຸ່ງໜ້າສູ່ເດິ່ນພະທາດຫຼວງອີກເທື່ອໜຶ່ງ ເພື່ອປ່ອນບາດ ອຸທິດສ່ວນກຸສົນແດ່ ບຸບພະກາລີຊົນ ທີ່ລ່ວງລັບໄປແລ້ວ ລວມທັງເຜດຜີແລະເຈົ້າກຳນາຍເວນ, ສ້າງເສີມບາລະມີໄວ້ໃນພົບຊາດຕໍ່ໄປ.
ຕອນຄໍ່າແລງຂອງມື້ຂຶ້ນ 15 ຄໍ່າ ເດືອນ 12 ຜູ້ຄົນທີ່ມີຈິດສັດທາ ຍັງເດິນທາງກັບໄປຍັງເດິ່ນພະທາດຫຼວງອີກບາດໜຶ່ງ ເພື່ອເຮັດພິທີວຽນທຽນອ້ອມພະທາດຫຼວງ ບູຊາພະທາດຫຼວງ ລະນຶກເຖິງອົງສຳມາສຳພຸດທະເຈົ້າ.
ການເດິນທາງເຂົ້າສູ່ເດິ່ນພະທາດຫຼວງໃນມື້ບຸນ ນັບມື້ອັ່ງອໍໄປດ້ວຍລົດລາງພາຫະນະ ນັ້ນສະແດງໃຫ້ເຫັນວ່າ ສະພາບເສດຖະກິດຫຼືຊີວິດເປັນຢູ່ຂອງປະຊາຊົນ ໄດ້ຮັບການພັດທະນາ.
