ບັນຫາການຂຽນໜັງສືລາວບໍ່ຖືກຂອງຄົນລາວ ເປັນບັນຫາຊໍ້າເຮື້ອມາຍາວນານ ແລະຍັງແກ້ໄຂບໍ່ຕົກ ຊໍ້າຍັງນັບມື້ປາກົດເຫັນການຂຽນໜັງສືລາວຂອງຄົນລາວຜິດຫຼາຍຂຶ້ນເລື້ອຍໆ ແມ່ນແຕ່ຊື່ “ໝາກຫຸ່ງ” ກໍຍັງຫາຄົນຂຽນຖືກໜ້ອຍລົງ. ຍ້ອນຫຍັງຈັ່ງເປັນແບບນັ້ນ ແລະເຮົາຈະແກ້ໄຂແນວໃດ?

ຄວາມພະຍາຍາມທີ່ຈະແກ້ໄຂບັນຫາດັ່ງກ່າວນີ້ມີມາຍາວນານແລະມີການຈັດຕັ້ງຄົ້ນຄວ້າຫາທາງອອກຫຼາຍເທື່ອ ແຕ່ເບິ່ງແລ້ວກໍຍັງບໍ່ມີວີ່ແວວວ່າການແກ້ບັນຫາດັ່ງກ່າວຈະເກີດດອກອອກຜົນຫຼືປະສົບຜົນສຳເລັດແຕ່ຢ່າງໃດ ເນື່ອງຈາກວ່າບັນຫາການຂຽນໜັງສືລາວບໍ່ຖືກນັ້ນ ມັນບໍ່ແມ່ນບັນຫານ້ອຍ ແຕ່ມັນພັດແມ່ນບັນຫາໃຫຍ່ລະດັບຊາດ ເປັນບັນຫາທົ່ວສັງຄົມ ເຊິ່ງສາມາດເວົ້າໄດ້ວ່າ ຄົນລາວລຸ້ນໜຸ່ມຫຼາຍກວ່າ 90% ແມ່ນມັກຂຽນໜັງສືລາວຜິດ ມັນຈຶ່ງເປັນເລື່ອງຍາກທີ່ບຸກຄົນຫຼືກຸ່ມຄົນນ້ອຍໆ ຈະສາມາດແກ້ບັນຫາໃນໂຕຂອງຄົນທົ່ວປະເທດໄດ້ໃນເວລາອັນສັ້ນ.

ທິດທາງຂອງການແກ້ບັນຫາດັ່ງກ່າວນັ້ນ ຕາມທັດສະນະຂອງທ່ານ ສຈ. ປອ. ບົວລີ ປະພາພັນ ອະດີດຫົວໜ້າພາກວິຊາພາສາລາວ-ສື່ສານມວນຊົນ ໄດ້ໃຫ້ທັດສະນະວ່າ: “ຖ້າຢາກແກ້ບັນຫາຄົນລາວຂຽນໜັງສືລາວບໍ່ຖືກ ຕ້ອງເລິ່ມແຕ່ຕອນນັກຮຽນຍັງຮຽນຢູ່ ມັດທະຍົມ ຄືກະໂຕຄູສອນທຸກວິຊາຕ້ອງເປັນແບບຢ່າງ ຕ້ອງເຄັ່ງຄັດໃນຫຼັກການຂຽນພາສາລາວ“. 

ຖ້າຂຽນໜັງສືລາວບໍ່ຖືກ ຈະເປັນວິຊາຫຍັງກໍບໍ່ຄວນໃຫ້ຜ່ານ ຫຼືເວົ້າອີກຢ່າງໜຶ່ງວ່າ ຖ້າຫາກບໍ່ສາມາດຂຽນພາສາລາວໃຫ້ຖືກຕ້ອງແລ້ວ ກໍບໍ່ຄວນຈະໃຫ້ຈົບມັດທະຍົມ, ຄູສອນເອງ ຖ້າຂຽນໜັງສືລາວບໍ່ຖືກກໍບໍ່ຄວນຈະອະນຸຍາດໃຫ້ເປັນຄູສອນ ແລະເອກະສານທາງການຕ່າງໆ ຖ້າບໍ່ຖືກຫຼັກໄວຍາກອນລາວຄັກແນ່ ແມ່ນບໍ່ໃຫ້ຜ່ານ.

ລິດຈະນາ ງາມວິໄລ