ແຫ່ງຂ່າວສະຫວັນນະເຂດລາຍງານໃຫ້ຮູ້ວ່າ ເມື່ອວັນທີ 20 ຕຸລາ 2017 ທີ່ຜ່ານມາ ເກີດເຫດບໍ່ຄາດຄິດຂຶ້ນທີ່ບ້ານ ໂນນຄູ້ ເມືອງ ຊົນນະບູລີ ແຂວງ ສະຫວັນນະເຂດ ເມື່ອມີອຸປະຕິເຫດຕີນລົດໄຖເກີດລະເບີດໃນຂະນະທີ່ກຳລັງສູບລົມ ສົ່ງຜົນເຮັດໃຫ້ມີຜູ້ເສຍຊີວິດຄ່າທີ່ ຊື່ນາງ ຄຳຫຼ້າ ອາຍຸ 23 ປີ ອາຊີບນັກສຶກສາຢູ່ວິທະຍາໄລກະສິກຳ ແລະ ປ່າໄມ້
ເຫດການໄດ້ເກີດຂຶ້ນເມື່ອປະມານ 14:00 ໂມງ ຂອງວັນດັ່ງກ່າວ ທ້າວ ຈ໋ອດ ອາຍຸ 25 ປີ ປະຊາຊົນຈາກບ້ານຕຸ່ມແຍ ໄດ້ຂັບລົດໄຖນາເດີນຕາມເພື່ອມາສູບຢ່າງຕີນລົດຢູ່ທີ່ຮ້ານທ້າວ ໄຂ ອາຍຸ 59 ປີ ປະຊາຊົນບ້ານໂນນຄູ້ ເປັນເຈົ້າຂອງຮ້ານ ແລະ ເປັນພໍ່ຂອງຜູ້ເສຍຊີວິດ ເຊິ່ງໃນເວລານັ້ນຜູ້ກ່ຽວຄາວຽກຈິ່ງໄດ້ໃຫ້ນາງ ຄຳຫຼ້າ ຜູ້ເປັນລູກສາວສູບຕີນລົດໃຫ້ແທນ ແລະ ໃນຂະນະທີ່ກຳລັງສູບຢາງລົດໄຖນາເບື້ອງຂວາຢູ່ນັ້ນ, ເຫດບໍ່ຄາດຄິດກໍ່ເກີດຂຶ້ນ ເມື່ອຕີນລົດໄຖນາໄດ້ເກີດລະເບີດຢ່າງແຮງ ເຮັດໃຫ້ຕີນລົດຟົ້ງອອກໄປຖືກຄາງ ແລະລຳຄໍຂອງນາງຄຳຫຼ້າ ເຮັດໃຫ້ຜູ້ກ່ຽວເສຍຊີວິດຄາທີ່ທັນທີ.
ສາຍເຫດຂອງການລະເບີດຄັ້ງນີ້, ຄາດວ່າຍ້ອນຜູ້ສູບຕີນລົດ ອາດຍັງບໍ່ທັນມີຄວາມຊຳນິຊຳນານ ແລະຍັງຂາດສະຕິໃນການຕິດຕາມເຂັມຄວາມດັນຂອງລົມ ວ່າຈະເອົາຂະໜາດໃດ. ອີກຢ່າງ ກໍ່ຕ້ອງກວດເບິ່ງຢາງລົດວ່າ ໃໝ່ ຫຼື ເກົ່າ ຄວນຕື່ມລົມໃສ່ຊ່ຳໃດ ແລະ ຄວນກວດເບິ່ງຂອບຊັງລົດວ່າຢູ່ໃນສະພາບດີສໍ່າໃດ.
ທາງທີມງານລາວໂພສຂໍສະແດງວາມເສຍໃຈກັບຄອບຄົວຜູ້ເສຍຊີວິດ ແລະ ຂໍໃຫ້ດວງວິນຍານຂອງຜູ້ເສຍຊີວິດໄປສູ່ສຸຂະຕິ ນີ້ເປັນອີກໜຶ່ງອຸທາຫອນໃຫ້ທຸກຄົນມີສະຕິລະວັງຕົວ ເພາະຄວາມຕາຍແຂວນຄໍເຮົາທຸກບາດຍ່າງ.