ສະພາບການປຸ້ນຈີ້, ຊິງຊັບ ແລະ ລັກຊັບຂອງພົນລະເມືອງ ນອກຈາກມີໃຫ້ເຫັນໃນຕົວເມືອງໃຫຍ່ ແລະ ຢູ່ຕາມຊຸມຊົນທ້ອງຖີ່ນ ກໍມີໃຫ້ເຫັນແລ້ວໃນປັດຈຸບັນ, ເຊິ່ງສະແດງອອກ ໃນວັນທີ 18 ຕຸລາ 2017 ມີຜູ້ເສຍຫາຍເຂົ້າແຈ້ງຄວາມຕໍ່ເຈົ້າໜ້າທີ່ຕຳຫຼວດ ປກສ ເມືອງສິງ ແຂວງຫຼວງນໍ້າທາ ວ່າ: ມີໄວລຸ້ນສອງຄົນຂີ້ລົດຈັກກໍ່ເຫດຊິງຊັບ (ໂທລະສັບ) ຢູ່ເສັ້ນທາງເທດສະບານເມືອງ, ຈາກນັ້ນ ເຈົ້າໜ້າທີ່ວິຊາສະເພາະຈຶ່ງຈັດກຳລັງເຂົ້າຕິດຕາມ, ຜ່ານການລົງຕິດຕາມຜູ່ກໍ່ເຫດປະມານ 15 ນາທີ ກໍສາມາດຈັບຕົວຜູ້ກໍເຫດໄດ້ຊື່: ທ້າວ ສົມສີ ອາຍຸ 15 ປີ ຢູ່ບ້ານແດນກາງ ເມືອງລອງ ແລະ ທ້າວ ຊົວລີ ອາຍຸ 13 ປີ ຢູ່ບ້ານກາງໃໝ່ ເມືອງສິງ ແຂວງຫຼວງນໍ້າທາ ພ້ອມຂອງກາງ ໂທລະສັບ 2 ເຄື່ອງ (ໄອໂຟນ 7 ແລະ ຊຳຊຸງ) ມາດຳເນີນຄະດີ.
ເຈົ້າໜ້າທີ່ໜ່ວຍງານຕຳຫຼວດສຶບສວນ-ສອບສວນຄະດີອາຍາ ປກສ ເມືອງສິງ ໃຫ້ຮູ້ວ່າ: ຜ່ານການສອບສວນ ທ້າວສົມສີ ສາລະພາບວ່າ: ວັນທີ 18 ຕຸລາ 2017 ທ້າວ ສົມສີ ໄດ້ພາທ້າວຊົວລີ ໄປຫຼິ້ນຢູ່ເຂດສວນຫຼັກເມືອງ ຕະຫຼາດກາງຄືນ ເຂດເມືອງສິງ ພໍມາຮອດຕໍ່ໜ້າບໍລິສັດ ອີທີແອວ ເຫັນຜູ້ຍິງຄົນໜຶ່ງຍ່າງຫຼິ້ນໂທລະສັບຢູ່ແຄມທາງຈຶ່ງ ໄດ້ບອກໃຫ້ ທ້າວຊົວລີ ຂັບຂີ່ລົດຈັກເຂົ້າໄປຫາແລ້ວກໍລົງມືກໍ່ເຫດດຶງເອົາໂທລະສັບ ພາຍຫຼັງດຶງໄດ້ໂທລະສັບແລ້ວ ພວກກ່ຽວໄດ້ຂີ່ລົດຫຼົບໜີໄປຕາມຮ່ອມຕ່າງໆພາຍໃນເທດສະບານເມືອງໄດ້ປະມານ 15 ນາທີ ໄດ້ມີເຈົ້າໜ້າທີ່ວິຊາສະເພາະ ປກສ ເມືອງສິງ ຂີ່ລົດຕິດຕາມສະກັດຈັບຕົວ.
ນອກນີ້, ທ້າວ ສົມສີ ຍັງສາລະພາບອີກວ່າ: ກ່ອນໜ້ານີ້ໃນວັນທີ 16 ຕຸລາ 2017 ໄດ້ໄປຊວນໝູ່ອີກ 3 ຄົນ ຊື່ທ້າວ ທອງ, ທ້າວ ທອງສຸກ ແລະ ທ້າວຊົວລີ ໄດ້ອອກຈາກເມືອງລອງ ພາກັນໄປຫຼີ້ນເທດສະບານແຂວງຫຼວງນໍ້າທາ ແລະ ໄດ້ພັກເຊົາຢູ່ເຮືອນພັກເຂດຄິວລົດຕ່າງແຂວງ ພໍຮອດເວລາ 19 ໂມງວັນດຽວກັນໄດ້ພາກັນໄປຫຼິ້ນຢູ່ບ້ານຫາດຍາວ ຈາກນັ້ນໝູ່ທີ່ມານຳກັນແມ່ນໄດ້ໄປຫຼິ້ນນຳແຟນສາວຂອງໃຜລາວ ຈຶ່ງໄປຊວນ ທ້າວ ກາລົງ ຄົນບ້ານນໍ້າລ້າ ໄປເລາະລັກໂທລະສັບ ເມື່ອຂີ້ລົດໄປຮອດເສັນທາງ 3 ແຍກ ເຂດກອງບັນຊາການ ປກສ ແຂວງ ພົບເຫັນຜູ້ຍິງຄົນໜຶ່ງ ຢ່າງຫຼິ້ນໂທລະສັບຢູ່ແຄມທາງຜູ້ດຽວ ຈາກນັ້ນ ທ້າວ ກາລົງ ເລັ່ງລົດເຂົ້າໄປໃກ້ ລົງມືດຶງເອົາໂທລະສັບແລ້ວຫຼົບໜີໄປ; ໂທລະສັບທີ່ໄດ້ຈາກການກໍ່ເຫດແມ່ນເອົາໄປຂາຍ ເພື່ອເອົາເງິນໄປຊື້ຢາບ້າໄປເສບ ແລະ ຫຼິ້ນກິນຟຸມເຟືອຍ, ປັດຈຸບັນເຈົ້າໜ້າທີ່ກໍາລັງລວບລວມຂໍ້ມູນຫຼັກຖານເພື່ອສະຫຼຸບສໍານວນຄະດີສົ່ງໃຫ້ໄອຍະການສົ່ງຟ້ອງສານຕາມລະບຽບກົດໝາຍ.
ແຫລ່ງຂ່າວ: ໜັງສືພິມ ປກສ.