ໃນວັນທີ 23 ຕຸລາ 2017 ນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຊີ້ແຈງຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດ VIII, ໂດຍການເປັນປະທານຂອງທ່ານ ນາງ ປານີ ຢາທໍໍ່ຕູ້ ປະທານສະພາແຫ່ງຊາດ ກ່ຽວກັບການບໍລິຫານລັດ ໃນທຸກຂະແໜງ ການ, ອົງການປົກຄອງມີຄຸນນະພາບ, ມີປະສິດທິພາບ ແລະ ມີປະສິດທິຜົນ ສ້າງເງື່ອນໄຂໃຫ້ປະຊາຊົນ ແລະ ຜູ້ປະກອບການເຂົ້າເຖິງການບໍລິຫານລັດ ຢ່າງສະດວກວ່ອງໄວຍຸຕິທຳ ແລະ ຖືກຕ້ອງຕາມກົດໝາຍ ລັດຖະບານຊຸດນີ້, ຈຶ່ງຖືສຳຄັນໃນການປັງປຸງກົງຈັກຂອງລັດໃຫ້ກະທັດຮັດທາງດ້ານການຈັດຕັ້ງ ແບ່ງຄວາມຮັບຜິດຊອບ ແລະ ມອບສິດອຳນາດໃຫ້ກົງຈັກແຕ່ຂັ້ນສູນກາງລົງຮອດທ້ອງຖິ່ນ ເພື່ອໃຫ້ປະຕິບັດໜ້າທີ່ດ້ວຍຄວາມເປັນເຈົ້າການ ແກ້ໄຂບັນຫາຂອງຕົນດ້ວຍຄວາມຮັບຜິດຊອບສູງຂຶ້ນ, ບໍ່ໃຫ້ເອື່ອຍອີງ, ບໍ່ໃຫ້ຖິ້ມພຸ້ນຖິ້ມພີ້ ລວມທັງການບັນຊາວຽກງານທີ່ຖືກມອບໝາຍ ດ້ວຍຄວາມເປັນເຈົ້າການຢ່າງແທ້ຈິງ.
ພ້ອມນີ້, ທ່ານ ທອງລຸນ ສີສຸລິດ ໄດ້ຊີ້ແຈງຕື່ມວ່າ: ສິ່ງທີ່ເວົ້າມາເຈດຕະນາກໍຄື ການດຳເນີນງານຂອງລັດຖະບານ ພາຍຫລັງທີ່ໄດ້ມາຮັບໜ້າທີ່ ໄດ້ມອບສິດໃຫ້ປັບປຸງກົງຈັກ, ກົນໄກທີ່ຕົນນຳໃຊ້, ພະນັກງານທີ່ຢູ່ພາຍໃຕ້ການບັງຄັບບັນຊາຂອງຕົນ ເພາະວ່າພະນັກງານການນຳ ໃນຂະແໜງທ້ອງຖິ່ນນັ້ນ ຈະເປັນຄົນທີ່ຮູ້ດີກ່ຽວກັບວຽກງານ ແລະ ບຸກຄະລາກອນທີ່ຕົນນຳໃຊ້ຢູ່, ເຊິ່ງລັດຖະບານໄດ້ຕິດຕາມກວດກາຊີ້ນຳຢ່າງໃກ້ຊິດ ແລະ ໄດ້ອອກມະຕິຄຳສັ່ງທາງການ ໃຊ້ບັນດາກົງຈັກຕິດຕາມກວດກາໃນການປະຕິບັດໜ້າທີ່ ຂອງຂະແໜງການທ້ອງຖິ່ນຢ່າງເປັນປະຈຳ ແລະ ເຫັນໄດ້ຫລາຍຈຸດຍັງອ່ອນ, ຂໍ້ຄົງຄ້າງບໍ່ທັນບຸກທະລຸໄດ້. ສັງລວມໄດ້ ຄື: ກົງຈັກຍັງມີການເກະກະ ບໍ່ທັນກະທັດຮັດ, ຮັດກຸມ ຄົນໃນກົງຈັກຈຳນວນໜຶ່ງ ຍັງສືບຕໍ່ເຮັດວຽກຕາມຄວາມຊິນເຄີຍ, ຄວາມຮັບຜິດຊອບບໍ່ທັນສູງ, ອາດຍາສິດຫ່າງເຫີນມະຫາຊົນຫ່າງເຫີນ ຄວາມເປັນຈິງ, ຍັງບໍ່ທັນຕັ້ງໜ້າແກ້ບັນຫາ, ຍັງຈົມຢູ່ໃນວົງຈອນແຫ່ງການສວຍໃຊ້ຖານະຕຳແໜ່ງ ວົນວຽນນຳການສໍ້ຫລາດບັງຫລວງ ສະແຫວງຫາຜົນປະໂຫຍດຕ່າງໆນາໆ ຍ້ອນວ່າກົງຈັກຫລາຍບ່ອນ ຫລາຍອົງກອນ ຍັງບໍ່ທັນຫລຸດອອກຈາກວົງໂຄຈອນດັ່ງກ່າວນີ້, ຈຶ່ງກະທົບເຖິງວຽກບໍລິຫານຊັກຊ້າແກ່ຍາວຂາດປະສິດທິຜົນ, ປະສິດທິພາບກໍ່ຕ່ຳຍັງເປັນລັກສະນະທົ່ວໆໄປ, ແຕ່ກົງຈັກແຕ່ເທິງຮອດລຸ່ມ ຍັງເປັນລັກສະນະແຜ່ລາມ ຕາມການດຳເນີນຊີວິດການເມືອງພາຍໃນພັກ ແຕ່ເທິງລົງລຸ່ມຢ່າງກວ້າງຂວາງ ກົມການເມືອງສູນກາງພັກ ຈຶ່ງເຫັນບັນຫານີ້ແຈ້ງຂຶ້ນ ແລະ ມີທິດຈະຕ້ອງໄດ້ແກ້ໄຂປັບປຸງໃຫ້ດີຂຶ້ນເທື່ອລະກ້າວ ເຖິງວ່າ ການແກ້ໄຂອາດຈະບໍ່ແມ່ນເລື່ອງທີ່ງ່າຍດ່າຍກໍຕາມ ເພາະວ່າຂໍ້ຄົງຄ້າງດັ່ງກ່າວ ແມ່ນເປັນພະຍາດຊຳເຮື້ອມາດົນ ແຕ່ລັດຖະບານໃນຖານະທີ່ເປັນຜູ້ບໍລິຫານ ໄດ້ປະກາດໃຊ້ບັນດານະໂຍບາຍ ແລະ ບັນດານິຕິກຳຫລາຍສະບັບ ເຊັ່ນ: ຄຳສັ່ງເລກທີ 15/ນຍ ລົງວັນທີ13 ພຶດສະພາ 2016 ວ່າດ້ວຍການເພີ່ມທະວີຄວາມເຂັ້ມງວດ ໃນການຄຸ້ມຄອງ ແລະ ກວດກາທຸກການຂຸດຄົ້ນໄມ້, ການເຄື່ອນຍ້າຍໄມ້ ແລະ ທຸລະກິດໄມ້; ຄຳສັ່ງສະບັບເລກທີ່ 07/ນຍ ລົງວັນທີ 20 ມີນາ 2017 ວ່າດ້ວຍການຂຶ້ນບັນຊີເຕົ້າໂຮມຊັບສິນ ທີ່ສານຕັດສິນຮີບມາເປັນຂອງລັດ; ຄຳສັ່ງສະບັບເລກທີ 09/ນຍ ລົງວັນທີ 19 ພຶດສະພາ 2017 ວ່າດ້ວຍການປະຢັດລາຍຈ່າຍງົບປະມານຂອງລັດ ແລະ ຄຳສັ່ງອື່ນໆ ອີກ.
ພ້ອມນີ້, ເພື່ອປັບປຸງເຮັດໃຫ້ກົງຈັກລັດສືບຕໍ່ໂປ່ງໃສ ແລະ ມີປະສິດທິພາບ ລັດຖະບານໄດ້ມີກົນໄກຕິດຕາມກວດກາເປັນປະຈຳ ຄື: ເຮັດວຽກຮ່ວມກັບຄະນະຈັດຕັ້ງສູນກາງພັກ, ອົງການກວດກາສູນກາງພັກ ແລະ ອົງການກວດກາລັດຖະບານ, ກະຊວງພາຍໃນ, ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ສະພາແຫ່ງຊາດ, ສະພາທ້ອງຖິ່ນ, ອົງການຈັດຕັ້ງມະຫາຊົນ, ສູນກາງແນວລາວສ້າງຊາດ ແລະ ອື່ນໆ ໂດຍອີງໃສ່ຄະນະພັກແຕ່ລະຂັ້ນ ໃຫ້ມີການສຳຫລວດກວດກາ, ປະເມີນຜົນທັງກົງຈັກ ແລະ ພະນັກງານເປັນປະຈຳ ຖ້າກວດເຫັນຄວາມບົກຜ່ອງຜິດພາດ ຫລື ການລ່ວງລະເມີດຕ່າງໆ ຕ້ອງໄດ້ມີການດຳເນີນແກ້ໄຂ ໃຫ້ເປັນຮູບປະທຳເກີດຂຶ້ນ ເຊິ່ງຄະນະຈັດຕັ້ງສູນກາງ ແລະ ຄະນະລັດຖະບານ ກໍໄດ້ເຮັດວຽກນີ້ເປັນປະຈຳ. ໃນນັ້ນ, ບັນດາການນຳໄດ້ເປັນເອກະພາບກັນວ່າ ຖ້າກວດເຫັນຢູ່ໃສ, ອົງການໃດ, ທ້ອງຖິ່ນໃດ ຕ້ອງມອບໃຫ້ເປັນພາລະ ແລະ ຄວາມຮັບຜິດຊອບຂອງອົງການນັ້ນ ຫລື ທ້ອງຖິ່ນນັ້ນ ຊີ້ນຳແກ້ໄຂແຕ່ຖ້າອົງການນັ້ນ ແລະ ການນຳຢູ່ບ່ອນນັ້ນ ບໍ່ຢາກແກ້ໄຂ, ບໍ່ກ້າແກ້ໄຂ ຫລື ບໍ່ມີຄວາມສາມາດ ຕ້ອງໄດ້ໃຫ້ຂັ້ນເທິງຍື່ນມືເຂົ້າມາແກ້ໄຂ ເຊິ່ງສະແດງອອກເຖິງຄວາມຮັບຜິດຊອບທາງດ້ານການເມືອງຂອງແຕ່ລະຂັ້ນ.
ແຫລ່ງຂ່າວ: ສົມຫວັງ ແລະ ພາບປະກອບ: ໄອ່ຄຳ (ສຳນັກຂ່າວສານປະເທດລາວ)